លោក Mike Pompeo ដែលជាអតីតរដ្ឋមន្ត្រីការបរទេសអាមេរិក ក្រោមរដ្ឋបាលអតីតប្រធានាធិបតីអាមេរិក Donald Trump បានស្រកទម្ងន់ជិត ៤០គីឡូ ក្រោយចាកចេញពីតំណែង។
រូបរាងរបស់លោកប្រែប្រួលពីធាត់ទៅស្គមនេះ ត្រូវបានគេចែកចាយពាសពេញបណ្ដាញសង្គម ដោយមតិមួយចំនួនមិនជឿនឹងរូបភាពមួយនេះ និងមួយចំនួនទៀតថាលោកមានស្រកទម្ងន់ដោយសារតែជំងឺ។
យ៉ាងណាអតីតរដ្ឋមន្ត្រីការបរទេសអាមេរិករូបនេះក៏បកស្រាយដោយបានធ្វើការសម្ភាសន៍តាមរយៈទូរស័ព្ទជាមួយនឹងសារព័ត៌មាន Fox News Digital កាលពីថ្ងៃសៅរ៍ កន្លងទៅនេះថា លោកបានស្រកទម្ងន់៩០ផោន (ប្រមាណ៤០គីឡូក្រាម) ក្នុងរយៈពេល៦ខែបន្ទាប់ពីលោកបានអស់តំណែង ក្រោយគណបក្សរបស់លោកបានចាញ់ឆ្នោត។
វិធីនៃការសម្រកទម្ងន់របស់លោកគឺលោកបានរៀបចំដោយខ្លួនឯងមិនបានជួលអ្នកជំនាញឡើយ។ វិធីរបស់លោកតាមរយៈបង្រួមរបបអាហារឲ្យតូច កាត់បន្ថយអាហារដែលងាយធ្វើឲ្យធាត់ និង ហាត់ប្រាណនៅផ្ទះលោកសឹងតែរៀងរាល់ថ្ងៃតែម្ដង ដោយលោកមិនបានទៅវះកាត់បញ្ចុះទម្ងន់ឡើយ។
ទោះជាបកស្រាយយ៉ាងណាក៏ដោយនៅតែមានមតិ ក៏ដូចជាអ្នកជំនាញមួយចំនួនមិនជឿលើលើវិធីដែលលោកអនុវត្តនេះ។
គួរបញ្ជាក់ផងដែរថា នេះមិនមែនជាលើកទីមួយទេសម្រាប់អតីតមន្ត្រីជាន់ខ្ពស់អាមេរិកស្រកទម្ងន់ដោយកន្លងទៅក៏មានអតីតមន្ត្រីជាន់ខ្ពស់ជាច្រើនបានធ្វើការសម្រកទម្ងន់បែបនេះផងដែរតាមរយៈ ហាត់ប្រាណ កាត់បន្ថយរបបអាហារ និងវះកាត់ជាដើមក្រោយចាកចេញពីតំណែង ដែលធ្វើឲ្យពួកគេមានពេលវេលាគ្រប់គ្រាន់ដើម្បីមើលថែសុខភាព៕
ប្រភព៖sabay
