ប៉េកាំង៖ អ្នកនាំពាក្យក្រសួងការបរទេសចិន បានជំរុញឱ្យភាគីអាមេរិក គោរពយ៉ាងម៉ឺងម៉ាត់នូវគោលការណ៍ចិនតែមួយ និងសេចក្ដីថ្លែងការណ៍រួមចិន-អាមេរិកទាំង៣ ដើម្បីបញ្ឈប់រាល់ទម្រង់នៃការផ្លាស់ប្តូរផ្លូវការជាមួយតៃវ៉ាន់។
យោងតាមរបាយការណ៍ប្រព័ន្ធផ្សព្វផ្សាយ កិច្ចប្រជុំនិម្មិតមួយត្រូវបានធ្វើឡើងកាលពីថ្ងៃពុធរវាងតំណាងពាណិជ្ជកម្មរងសហរដ្ឋអាមេរិក និងតំណាងតៃវ៉ាន់ ដើម្បីចាប់ផ្តើមនូវអ្វីដែលគេហៅថាគំនិតផ្តួចផ្តើមអាមេរិក-តៃវ៉ាន់លើពាណិជ្ជកម្មសតវត្សទី២១ ។
អ្នកនាំពាក្យចិនលោក Zhao Lijian បានឲ្យដឹងនៅក្នុងសន្និសីទសារព័ត៌មានប្រចាំថ្ងៃថា “ប្រទេសចិន ប្រឆាំងដាច់ខាតនូវរាល់ទម្រង់នៃការផ្លាស់ប្តូរផ្លូវការរវាងតៃវ៉ាន់ និងប្រទេស ដែលមានទំនាក់ទំនងការទូតជាមួយប្រទេសចិន រួមទាំងការចរចា និងការចុះហត្ថលេខាលើកិច្ចព្រមព្រៀងដែលមានឥទ្ធិពលអធិបតេយ្យភាព និងលក្ខណៈផ្លូវការ” ។
លោក Zhao បានលើកឡើងថា សហរដ្ឋអាមេរិកបានធ្វើការផ្លាស់ប្តូរជាញឹកញាប់លើសំណួរតៃវ៉ាន់នាពេលថ្មីៗនេះ។ សរុបមក ពួកគេទាំងអស់កំពុងបំពានគោលការណ៍ចិនតែមួយ ពង្រឹងកងកម្លាំងបំបែកខ្លួន “ឯករាជ្យតៃវ៉ាន់” និងរំខានដល់សន្តិភាព និងស្ថិរភាពនៅទូទាំងច្រកសមុទ្រតៃវ៉ាន់។
លោក បានបន្ថែមថា “មានប្រទេសចិន តែមួយគត់នៅលើពិភពលោក ហើយតៃវ៉ាន់ គឺជាផ្នែកដែលមិនអាចកាត់ផ្តាច់បាននៃទឹកដីរបស់ប្រទេសចិន។ លោកបន្ថែមទៀតថា រដ្ឋាភិបាលនៃសាធារណៈរដ្ឋប្រជាមានិតចិន គឺជារដ្ឋាភិបាលស្របច្បាប់តែមួយគត់តំណាងឱ្យប្រទេសចិនទាំងមូល ទាំងនេះមិនត្រឹមតែជាការឯកភាពគ្នាប៉ុណ្ណោះទេ៕ប្រែសម្រួល ឈូក បូរ៉ា
