ក្រុមបាតុកររាប់ម៉ឺននាក់ បានប្រមូលផ្តុំគ្នា នៅទូទាំងសហរដ្ឋអាមេរិក ដើម្បីប្រឆំាងនឹងការប្រើប្រាស់អាវុធ បង្កជាហិង្សាសម្លាប់មនុស្ស

វ៉ាស៊ីនតោន៖ ទូរទស្សន៍សិង្ហបុរី Channel News Asia បានផ្សព្វផ្សាយនៅថ្ងៃទី១២ ខែមិថុនា ឆ្នាំ២០២២ថា កាលពីថ្ងៃសៅរ៍ បាតុកររាប់ម៉ឺននាក់បានចុះមកទីក្រុងវ៉ាស៊ីនតោន និងនៅឯការប្រមូលផ្តុំរាប់រយនាក់នៅទូទាំងសហរដ្ឋអាមេរិក ដើម្បីទាមទារឱ្យសមាជិកសភាអនុម័តច្បាប់ដែលមានគោលបំណងទប់ស្កាត់អំពើហិង្សាដោយកាំភ្លើងបន្ទាប់ពីការសម្លាប់រង្គាលកាលពីខែមុននៅសាលាបឋមសិក្សារដ្ឋតិចសាស់ ។

នៅក្នុងរដ្ឋធានីរបស់ប្រទេសនេះ អ្នករៀបចំកម្មវិធីមួយឈ្មោះថា March for Our Lives (MFOL) ដែលបានប៉ាន់ប្រមាណថា មានមនុស្ស៤០.០០០នាក់បានប្រមូលផ្តុំគ្នានៅឯ National Mall ក្បែរវិមាន Washington ក្រោមភ្លៀងធ្លាក់ ។ ក្រុមសុវត្ថិភាពកាំភ្លើងត្រូវបានបង្កើតឡើងដោយ​ សិស្សដែលនៅរស់រានមានជីវិតពីការសម្លាប់រង្គាលឆ្នាំ២០១៨ នៅវិទ្យាល័យ Parkland រដ្ឋ Florida ។

លោកស្រី Courtney Haggerty បណ្ណារក្សស្រាវជ្រាវអាយុ៤១ឆ្នាំមកពី Lawrenceville រដ្ឋ New Jersey បានធ្វើដំណើរទៅ រដ្ឋធានី Washington ជាមួយកូនស្រីអាយុ១០ឆ្នាំ ឈ្មោះ Cate និងកូនប្រុសអាយុ៧ឆ្នាំ ឈ្មោះ Graeme ។

លោកស្រី Haggerty បាននិយាយថា ការបាញ់ប្រហារនៅសាលាកាលពីខែធ្នូ ឆ្នាំ២០១២ នៅសាលាបឋមសិក្សា Sandy Hook ក្នុងទីក្រុង Newtown រដ្ឋ Connecticut នៅគ្រាដែលខ្មាន់កាំភ្លើងម្នាក់បានសម្លាប់មនុស្ស២៦នាក់ ដែលភាគច្រើនជាក្មេងអាយុ៦ឆ្នាំ និង៧ឆ្នាំបានកើតឡើងមួយថ្ងៃបន្ទាប់ពី ថ្ងៃកំណើតកូនស្រីដំបូងរបស់នាង ។

លោកស្រី Kay Klein គ្រូបង្វឹកគ្រូបង្រៀនអាយុ៦៥ឆ្នាំ មកពីទីក្រុង Fairfax រដ្ឋ Virginia ដែលបានចូលនិវត្តន៍កាលពីដើមខែនេះបានលើកឡើងថា ប្រជាជនអាមេរិកគួរតែបោះឆ្នោតឱ្យអ្នកនយោបាយ ដែលបដិសេធមិនធ្វើសកម្មភាពនៅក្នុងការបោះឆ្នោត ពាក់កណ្តាលអាណត្តិនៅខែវិច្ឆិកា នៅគ្រាដែលការគ្រប់គ្រងរបស់សភា នឹងត្រូវជាប់គាំង ។

លោកស្រីបានលើកឡើងថា “ប្រសិនបើយើងពិតជាយកចិត្តទុកដាក់ចំពោះកុមារ និងគ្រួសារ យើងត្រូវតែបោះឆ្នោតឲ្យ” ៕

ប្រែសម្រួលដោយ៖ ម៉ៅ បុប្ផាមករា