អាមេរិក៖ នេះបើយោងតាមការចេញផ្សាយពី គេហទំព័រឌៀលីម៉ែលបានប្រាប់ឲ្យដឹងថា ជាមួយនឹងធុងបាសដែលមានទំហំប៉ុនហោប៉ៅភ្ជាប់ មកជាមួយនូវតួអង្គរីករាយជាច្រើន Pez គឺជាស្ករគ្រាប់ដ៏ពេញនិយមបំផុត មួយនៅជុំវិញពិភពលោក។
ឥឡូវនេះលោក Elon Musk បានទទួលយកការបំផុសគំនិតពី Pez សម្រាប់រ៉ុក្កែត Starship របស់លោក។ ស្ថាបនិក និងជានាយកប្រតិបត្តិ SpaceX បានចែករម្លែកចលនាថ្មីមួយបង្ហាញពីរបៀបរ៉ុក្កែត ដែលមានទម្ងន់ធ្ងន់តម្លៃ ២១៦ លានដុល្លារអាចបាញ់ចេញពីផ្កាយរណប Starlink ក្នុងលំហ ដូចជាបង្អែមនៅក្នុងឧបករណ៍ចែកចាយ Pez ។
លោក Musk បានចែករម្លែកគំនូរជីវចលរបស់ Starship ស្ថិតក្នុងសកម្មភាពនៅលើ Twitter ក្នុងសប្តាហ៍នេះ ហើយថែមទាំងបាននិយាយកំប្លែងថា SpaceX គួរតែបង្កើតគំរូ Starship ពិតប្រាកដដែលចែកចាយ pez សម្រាប់ហាងទំនិញរបស់យើង។ Starship គឺជាគ្រាប់រ៉ុក្កែតដែកអ៊ីណុកអាចប្រើឡើងវិញបានរបស់ SpaceX ត្រូវបានរចនាឡើងដើម្បីដឹកទាំងនាវិក និងទំនិញទៅកាន់ឋានព្រះច័ន្ទ និងសូម្បីតែភពអង្គារនាពេលអនាគត។
SpaceX ពន្យល់ថា Starship នឹងក្លាយជាយានបាញ់បង្ហោះដ៏មានឥទ្ធិពលបំផុត ដែលមិនធ្លាប់មានក្នុងពិភពលោកដែលផលិតឡើង ដោយមានសមត្ថភាពផ្ទុកលើសពី ១០០តោនទៅកាន់គន្លងផែនដី។ឥឡូវនេះ គំនូរជីវចលថ្មីមួយបានបង្ហាញក្នុងអំឡុងពេលកិច្ចប្រជុំ All-Hands របស់ SpaceX នៅថ្ងៃទី ៥ ខែមិថុនា មុនពេលត្រូវបានចែករម្លែកនៅលើ Twitter ដោយ Musk បានបង្ហាញថា SpaceX គ្រោងនឹងប្រើប្រាស់ Starship ដើម្បីដាក់ពង្រាយផ្កាយរណប Starlink ជំនាន់ក្រោយរបស់ខ្លួន៕
ដោយ៖លី ភីលីព
