ទីក្រុងឡុងដ៍៖ នេះបើយោងតាមការចេញផ្សាយ ពីគេហទំព័រឌៀលីម៉ែល បាននិយាយថា បុរស៣នាក់ត្រូវបានចាប់ខ្លួន បន្ទាប់ពីខ្មាន់កាំភ្លើងភ្ជង់កាំភ្លើងប្លន់នាឡិកា ប្រណីតតម្លៃ ៧២,000ផោន របស់អតីតម្ចាស់ជើងឯកពិភពលោក អ្នកប្រដាល់ Amir Khan ពេលកំពុងដើរលេងជាមួយប្រពន្ធរបស់លោក ចាកចេញពីភោជនីយដ្ឋាន នៅតាមដងផ្លូវនៃភាគខាងកើតទីក្រុងឡុងដ៍ ។
អ្នកប្រដាល់វ័យ ៣៥ ឆ្នាំរូបនេះ និងប្រពន្ធរបស់លោកត្រូវបាន វាយប្រហារនៅខាងក្រៅ Sahara Grill ក្នុង Leyton កាលពីថ្ងៃទី ១៨ ខែមេសា ជាកន្លែងដែលក្រុមចោរ បានធ្វើសកម្មភាពយក នាឡិកាFranck Muller Vanguard Chronograph ដែលស្រោបដោយពេជ្ររបស់លោក។ បុរស២នាក់ បានរត់ទៅរកអតីតជើងឯកពិភពលោក នៅតាមផ្លូវ ហើយម្នាក់បានភ្ជង់កាំភ្លើង ចំមុខរបស់លោក មុនពេលឆក់យកនាឡិកា។
ព្រឹកនេះប៉ូលិសបានចាប់ខ្លួនបុរស៣ នាក់ គឺអាយុ២៥ឆ្នាំ ៣៤ឆ្នាំ និង២០ឆ្នាំដោយសង្ស័យពីបទប្លន់ ចំណែកពួកគេ២នាក់ក៏ត្រូវបានចាប់ខ្លួនពីបទសង្ស័យមានកាំភ្លើង ក្នុងចេតនាបង្កការភ័យខ្លាច នឹងអំពើហិង្សាជាមួយម្នាក់ទៀត កាន់អាវុធរំសេវផងដែរ។ ប៉ុន្មានម៉ោងមុនកើតហេតុ លោក Khan ត្រូវបានថតជាមួយអ្នកគាំទ្រម្នាក់ ពេលកំពុងដើរទិញឥវ៉ាន់នៅផ្លូវ Oxford ដោយពាក់នាឡិការដ៏ភ្លឺស្វាងរបស់លោក មានតម្លៃប្រហែល ៧២,000 ផោន និងត្រូវបានបំពាក់ដោយត្បូងពេជ្រចំនួន ៧១៩។
ហើយម្ចាស់មេដាយអូឡាំពិក ក៏បានពាក់វានៅក្នុងការបង្ហោះ Instagram ពីកម្មវិធីសប្បុរសធម៌មួយ នៅឯសណ្ឋាគារ Grosvenor House កាលពីយប់មុន ដោយបង្កើនការភ័យខ្លាចថា លោកប្រហែលជាត្រូវបាន គេកំណត់គោលដៅជាក់លាក់។
លោក Amir បានរីករាយជាមួយល្ងាចដ៏គួរឲ្យស្រឡាញ់ ជាមួយប្រពន្ធរបស់លោក ហើយបានដើរទិញឥវ៉ាន់នៅមុនថ្ងៃ។ វាបង្កើនការភ័យខ្លាចពិតប្រាកដថា លោកជាគោលដៅដោយចេតនា វាធ្ងន់ធ្ងរណាស់ ហើយលោកត្រូវបានទុកចោលយ៉ាងភ័យខ្លាច៕ ដោយ៖លី ភីលីព
