អង់ការ៉ា៖ តួកគី បានឲ្យដឹងកាលពីថ្ងៃព្រហស្បតិ៍ម្សិលមិញនេះថា យន្តហោះចម្បាំងក្រិក “រំខាន” យន្តហោះរបស់ខ្លួនម្តងទៀតក្នុងអំឡុងពេលបេសកកម្ម របស់អង្គការណាតូ នៅលើសមុទ្រ Aegean ដែលជាទង្វើបែបនេះលើកទីពីរ ក្នុងរយៈពេល ៣ថ្ងៃ។
អ្នកបើកយន្តហោះក្រិកបានដាក់យន្តហោះ F-16 តួកគីពីរគ្រឿង នៅក្រោមការចាក់សោ រ៉ាដាកាលពីថ្ងៃពុធ ខណៈពេលដែលពួកគេកំពុងបំពេញបេសកកម្មរបស់អង្គការណាតូ ជាមួយនឹងយន្តហោះឈ្លបយកការណ៍ AWACS របស់សម្ព័ន្ធនៅឯសមយុទ្ធ Nexus Ace។
របាយការណ៍បានឲ្យដឹងថា យន្តហោះចម្បាំង F-16 តួកគីបានឆ្លើយតប ដោយដាក់យន្តហោះក្រិក នៅក្រោមការចាក់សោរ៉ាដា វិញផងដែរ នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។
កាលពីថ្ងៃអង្គារ តួកគី បានកោះហៅអនុព័ន្ធយោធាក្រិក នៅទីក្រុងអង់ការ៉ា បន្ទាប់ពីយន្តហោះចម្បាំង F-16 របស់ក្រិក “រំខាន” យន្តហោះចម្បាំងតួកគី ក្នុងអំឡុងពេលបេសកកម្ម របស់អង្គការណាតូមួយផ្សេងទៀត នៅភាគខាងកើតមេឌីទែរ៉ាណេ។
ប្រទេសក្រិក បានបដិសេធការអះអាងរបស់តួកគី កាលពីថ្ងៃអង្គារដោយលើកឡើងថា យន្តហោះតួកគីចំនួន ៥គ្រឿងបានបង្ហាញខ្លួនដោយគ្មានការជូនដំណឹងជាមុន ដើម្បីអមដំណើរយន្តហោះ ទម្លាក់គ្រាប់បែកអាមេរិក B-52 នៅក្នុងតំបន់មួយដែលស្ថិតនៅក្រោមការគ្រប់គ្រងការហោះហើររបស់ក្រិក។
គួរបញ្ជាក់ថា សម្ព័ន្ធមិត្តរបស់អង្គការណាតូទាំងពីរ មានជម្លោះជាយូរមកហើយ លើបញ្ហាជាបន្តបន្ទាប់ រួមទាំងជម្លោះដែនសមុទ្រ និងថាមពលនៅសមុទ្រ Aegean និងសមុទ្រមេឌីទែរ៉ាណេ៕ ប្រែសម្រួល ឈូក បូរ៉ា
