អវកាសយានិក ៦នាក់ របស់ចិន បំពេញបេសកកម្ម ចំនួន ២ ដោយធ្វើការប្រមូលផ្តុំ ជាប្រវត្តិសាស្ត្រ ក្នុងលំហ

ចិន ៖ យោងតាមការចេញ ផ្សាយពីគេហទំព័រឆៃណាឌៀលី បានប្រាប់ឲ្យដឹងថា នាវិកបេសកកម្ម Shenzhou XV បានចូលទៅក្នុងស្ថានីយអវកាស Tiangong នៅព្រឹកថ្ងៃពុធ ហើយពួកគេ ត្រូវបានគេផ្តល់ឥ្យ នូវការឱបដ៏កក់ក្តៅពីមិត្តភក្តិ Shenzhou XIV របស់ពួកគេដោយ បានគោចររួចហើយ អស់រយៈពេលជិត ៦ ខែ ។

បន្ទាប់ពីការងាររៀបចំប្រហែល ២ ម៉ោង បន្ទាប់ពីការចតយានអវកាស Shenzhou XV ជាមួយស្ថានីយ Tiangong ក្នុងគន្លងផែនដីទាបប្រហែល ៤០០ គីឡូម៉ែត្រពីលើផែនដី លោកឧត្តមសេនីយ Fei Junlong ជាមេបញ្ជាការបេសកកម្ម Shenzhou XV បានបើកទ្វារនៅលើយាន អវកាសរបស់លោក ហើយអណ្តែតចូល ទៅក្នុងកាប៊ីនតភ្ជាប់ របស់ស្ថានីយ៍នៅម៉ោង ៧:៣៤ ព្រឹក ។

លោកត្រូវបានស្វាគមន៍ ដោយវរសេនីយ៍ឯក Chen Dong មេដឹកនាំនាវិក Shenzhou XIV ដែលបានរង់ចាំ នៅខាងក្នុងកាប៊ីនមួយរយៈ។ មេបញ្ជាការទាំង២ បានឱបគ្នាដោយនិយាយថា “ស្វាគមន៍! តោះឱប” ។ ហើយបន្ទាប់មកលោក Chen បានប្រាប់ Fei ថា នៅមាន២នាក់ទៀត កំពុងរង់ចាំអ្នក ដោយសំដៅទៅលើវរសេនីយឯក Liu Yang និងវរសេនីយ៍ឯក Cai Xuzhe កំពុងរង់ចាំនៅខាងក្នុងម៉ូឌុល មន្ទីរពិសោធន៍ Wentian របស់ស្ថានីយ៍ ។

នៅប៉ុន្មាននាទីបន្ទាប់ វរសេនីយ៍ឯក Deng Qingming និងវរសេនីយ៍ឯក Zhang Lu បានផ្លាស់ប្តូរចូលទៅ ក្នុងបន្ទប់តភ្ជាប់ម្តងមួយៗ ហើយពួកគេក៏ត្រូវ បានស្វាគមន៍ដោយ Chen ផងដែរ ។ អវកាសយានិក៣នាក់ ក្នុងShenzhou XV បន្ទាប់មកចូលទៅក្នុងម៉ូឌុល មន្ទីរពិសោធន៍ Wentian ហើយបានឱប Liu និង Cai ដែលរង់ចាំនៅទីនោះ ៕