បរទេស៖ នាយកប្រតិបត្តិក្រុមហ៊ុន Raytheon Technologies លោក Greg Hayes បាននិយាយថា សហរដ្ឋអាមេរិកកំពុងធ្វើការដើម្បីផ្លាស់ទី ប្រព័ន្ធមីស៊ីលលើផ្ទៃទៅអាកាសកម្រិតខ្ពស់ជាតិ (NASAMS) មួយចំនួនពីបណ្តាប្រទេសមជ្ឈិមបូព៌ាទៅកាន់ប្រទេសអ៊ុយក្រែន។ ក្រុមហ៊ុនផលិតសព្វាវុធដែលមានមូលដ្ឋាននៅរដ្ឋ Virginia បានបង្កើតអាវុធនេះដោយសហការជាមួយក្រុមហ៊ុន Kongsberg Defense & Aerospace របស់ប្រទេសន័រវេស។
យោងតាមសារព័ត៌មាន RT ចេញផ្សាយនៅថ្ងៃទី២ ខែធ្នូ ឆ្នាំ២០២២ បានឱ្យដឹងថា Hayes បានប្រាប់ទស្សនាវដ្តី Politico កាលពីថ្ងៃព្រហស្បតិ៍ គឺមានប្រព័ន្ធមីស៊ីល NASAMS ត្រូវបានដាក់ពង្រាយនៅទូទាំងមជ្ឈិមបូព៌ា ហើយសម្ព័ន្ធមិត្តណាតូមួយចំនួនរបស់យើង និងយើង [សហរដ្ឋអាមេរិក] ពិតជាកំពុងធ្វើការជាមួយប្រទេសមួយចំនួននៅមជ្ឈិមបូព៌ា ដែលបច្ចុប្បន្នប្រើ NASAMS និងព្យាយាមដឹកនាំប្រព័ន្ធមីស៊ីលទាំងនោះសម្រាប់ទៅគាំទ្រដល់អ៊ុយក្រែន” ។ លោកបន្ថែមថា ការដាក់ពង្រាយអាវុធដែលមានស្រាប់ឡើងវិញនឹងលឿនជាងការផលិតអាវុធថ្មី។
លោកបានបន្តថា៖ «ដោយសារវាត្រូវចំណាយពេល ២៤ ខែក្នុងការសាងសង់ វាមិនមានន័យថានឹងត្រូវចំណាយពេល ២៤ ខែដើម្បីប្រទេសនោះទទួលបានទេ»។ លោកបានបន្ថែមថា គោលដៅគឺដើម្បីបញ្ជូន NASAMS ទៅកាន់ប្រទេសអ៊ុយក្រែនក្នុងរយៈពេលពី ៣ ទៅ ៦ ខែខាងមុខ ដោយសហរដ្ឋអាមេរិកនឹងផ្គត់ផ្គង់អាវុធនៅមជ្ឈិមបូព៌ាក្នុងរយៈពេលពីរឆ្នាំខាងមុខ៕
ប្រែសម្រួលៈ ណៃ តុលា
