វ៉ាស៊ីនតោន៖ កងទ័ពអាកាសអាមេរិក កាលពីថ្ងៃសុក្រ បានបង្ហាញយន្តហោះបំបាំងកាយ ចុងក្រោយបំផុតរបស់ខ្លួនគឺ B-21 Raider ដែលជាយន្តហោះទម្លាក់គ្រាប់បែករយៈចម្ងាយឆ្ងាយ ដែលត្រូវបានរចនាឡើង ដើម្បីហោះហើរ ដោយអ្នកបើកយន្តហោះផ្ទាល់ ឬបញ្ជាពីចម្ងាយ។
រដ្ឋមន្ត្រីការពារជាតិលោក Lloyd Austin និងឧត្តមសេនីយ៍លោក Mark Milley ប្រធានអគ្គសេនាធិការចម្រុះ ស្ថិតក្នុងចំណោមភ្ញៀវប្រហែល ៦០០នាក់នៅឯរោងចក្រ Northrop Grumman ក្នុងទីក្រុង Palmdale រដ្ឋកាលីហ្វ័រញ៉ា ដើម្បីធ្វើជាសាក្សី ក្នុងការបង្ហាញយន្តហោះនេះ។
អ្នកទស្សនាត្រូវបានតម្រូវ ឱ្យប្រគល់ទូរស័ព្ទដៃរបស់ពួកគេ មុនពេលត្រូវបានអនុញ្ញាតឱ្យមើលឃើញ យន្តហោះពីចម្ងាយយ៉ាងហោចណាស់ ២៣ម៉ែត្រ នេះបើយោងតាមការចុះផ្សាយ របស់ទីភ្នាក់ងារសារព័ត៌មាន The National។
អ្នកថតរូបប្រព័ន្ធផ្សព្វផ្សាយ ត្រូវបានអនុញ្ញាតឱ្យថតរូបយន្តហោះពីមុំ ដែលគ្រប់គ្រងយ៉ាងតឹងរ៉ឹង ដោយឆ្លុះបញ្ចាំងពីការប្តេជ្ញាចិត្ត របស់មន្ទីរបញ្ចកោណក្នុងការរក្សាព័ត៌មានលម្អិត នៃបច្ចេកវិទ្យារបស់យន្តហោះទម្លាក់គ្រាប់បែក ជាការសម្ងាត់។
យន្តហោះ B-21 គឺជាអ្នកស្នងតំណែងរបស់យន្តហោះទម្លាក់គ្រាប់បែក B-2 ដែលមានវ័យចំណាស់ ដែលត្រូវបានសាងសង់ដោយ Northrop ដែលបានចាប់ផ្តើមនៅទសវត្សរ៍ឆ្នាំ១៩៨០ ។
យន្តហោះថ្មីនេះ ដែលត្រូវបានរចនាឡើង ដើម្បីផ្ទុកទាំងអាវុធនុយក្លេអ៊ែរ និងគ្រាប់បែករយៈចម្ងាយឆ្ងាយ ដែលដឹកនាំដោយភាពជាក់លាក់ធម្មតា គឺជាផ្នែកសំខាន់ នៃផែនការរបស់មន្ទីរបញ្ចកោណ ដើម្បីទប់ទល់នឹងប្រទេសចិន ក្នុងនាមជាគូប្រជែងសកលចម្បង របស់ទីក្រុងវ៉ាស៊ីនតោន៕ ប្រែសម្រួល ឈូក បូរ៉ា
