អាល្លឺម៉ង់ ៖ យោងតាមការចេញផ្សាយ ពីគេហទំព័រស្គាយញ៉ូវ បានប្រាប់ឲ្យដឹងថា អ្នកវិទ្យាសាស្ត្របានប្រដូចបេសកកម្មរយៈពេល ៥ ឆ្នាំរបស់ពួកគេ ទៅនឹងការស្វែងរកម្ជុល នៅក្នុងវាលស្មៅ ហើយការរុករកដំបូង ដោយផ្តោតលើផ្ទៃដីប្រហែល ពាក់កណ្តាលទំហំ នៃប្រទេសអាល្លឺម៉ង់ ។
កាមេរ៉ាមួយត្រូវ បានបញ្ជូនទៅក្រោមដី ៩៣ ម៉ែត្រ ដើម្បីបង្ហាញពីអ្វីដែលអាចជាទឹកកកចំណាស់បំផុតរបស់ផែនដី។ វីដេអូបង្ហាញថា វាបានធ្លាក់ចូល ទៅក្នុងរណ្តៅមួយ ខណៈអ្នកស្រាវជ្រាវបានប្រមូលសំណាក ដែលពួកគេប៉ាន់ស្មានថា មានអាយុកាលជាងពីរលានឆ្នាំ ។
និស្សិតបណ្ឌិត Austin Carter បានថតវីដេអូឃ្លីបនៅ Allan Hills ភាគខាងកើតអង់តាក់ទិក កាលពីថ្ងៃទី ២៣ ខែធ្នូ ។ លោក និងអ្នកស្រាវជ្រាវផ្សេងទៀត បានធ្វើដំណើរជាមួយមជ្ឈមណ្ឌល សម្រាប់ការរុករកទឹកកកចាស់ (COLDEX) ស្ថិតក្នុងបេសកកម្មស្វែងរក និងទាញយកទឹកកក ចាស់បំផុតរបស់ទ្វីបនេះ។
COLDEX សង្ឃឹមថា ការស្រាវជ្រាវ របស់ខ្លួននឹងជួយឲ្យយល់ពីការវិវត្តន៍ និងអនាគត នៃអាកាសធាតុរបស់ផែនដី រួមទាំងរបៀបដែលផ្ទាំងទឹកកក មានភាពរសើប ចំពោះកម្រិតខ្ពស់នៃឧស្ម័នផ្ទះកញ្ចក់ និងរបៀបដែលផ្ទាំងទឹកកក របស់អង់តាក់ទិកអាចឆ្លើយ តបទៅនឹងអាកាសធាតុក្តៅ។
ការស្ទាបស្ទង់រ៉ាដា និង GPS ត្រូវបានប្រើដើម្បីកំណត់ទីតាំងសក្តានុពល ប៉ុន្តែតំបន់ស្វែងរកគឺធំទូលាយ ដោយសារផ្ទាំង ទឹកកក ភាគខាងកើតអង់តាក់ទិក មានទំហំប៉ុនអាមេរិក។ យើងកំពុងស្វែងរកទីតាំងដ៏ល្អ ឥតខ្ចោះនោះជាកន្លែងដែលអ្នកនឹងមានផ្ទាំងទឹកកក ពេញលេញដែលមានកម្រាស់ ២ ម៉ាយ។
ព័ត៌មានអំពីអាកាសធាតុ របស់ផែនដី ដូចជាបរិមាណកាបូនឌីអុកស៊ីត (CO2) មានវត្តមានលើអាកាស អាចត្រូវបានវាស់វែងដោយការ វិភាគពពុះខ្យល់ដែលជាប់នៅក្នុងទឹកកក ។ បច្ចុប្បន្ននេះ អ្នកវិទ្យាសាស្ត្រមានការយល់ដឹងអំពីអាកាសធាតុ និងកម្រិត CO2 ថយក្រោយ ៨០០,០០០ឆ្នាំ ដោយសារស្នូលទឹកកកដែលបានខួង នៅអង់តាក់ទិកខាងកើតកាលពី ២០ ឆ្នាំមុន ។
ទោះជាយ៉ាងណាក៏ដោយ គម្រោងបច្ចុប្បន្ននេះសង្ឃឹមថា នឹងត្រលប់ទៅក្រោយច្រើនទៀត។ អ្នកស្រាវជ្រាវអាកាសធាតុ និងនាយក COLDEX លោក Edward Brook បានប្រាប់កាសែត Antarctic Sun ថា គោលដៅគឺដើម្បីពង្រីកកំណត់ត្រាស្នូល ទឹកកកនៃការប្រែប្រួលអាកាសធាតុឡើង វិញតាមអាចធ្វើទៅបាន ៕
