ស៊ីដនី ៖ យោងតាមការចេញផ្សាយ ពីគេហទំព័រជប៉ុនធូដេ បានប្រាប់ឲ្យដឹងថា ឯកអគ្គរដ្ឋទូតអ៊ុយក្រែន ប្រចាំប្រទេសអូស្ត្រាលី នៅថ្ងៃសុក្រនេះបានអំាវនាវ ឲ្យមន្ត្រីកីឡាវាយកូនបាល់ ហាម ឃាត់ឪពុករបស់កីឡាករ Novak Djokovic ក្នុងព្រឹត្តិការណ៍ Australian Open បន្ទាប់ពីលោក ត្រូវបានគេថតជាមួយអ្នកគាំទ្រ ដែលពាក់ទង់ជាតិរុស្ស៊ី ។
ឯកអគ្គរដ្ឋទូត Vasyl Myroshnychenko បានប្រាប់ AFP ថា លោកគួរតែត្រូវបានដកហូតការទទួលស្គាល់របស់លោក ។ លោក Myroshnychenko ក៏បានអំពាវនាវឲ្យកីឡាករ Djokovic កំពុងត្រៀមជួប Tommy Paul ក្នុងវគ្គពាក់កណ្តាលផ្តាច់ព្រ័ត្រ នៃការប្រកួតនេះឲ្យ សុំទោសដោយផ្ទាល់ និងបញ្ជាក់ពីជំហររបស់លោក ចំពោះការលុកលុយរបស់រុស្ស៊ី ។
លោកបានបន្តថា វាមានសារសំខាន់ សម្រាប់កីឡាករ Novak ដើម្បីដោះស្រាយស្ថានភាពនេះ ។ លោកគួរតែសុំទោស ចំពោះអ្វីដែលបានកើតឡើង ហើយថ្កោលទោសការឈ្លានពាន របស់រុស្ស៊ីលើអ៊ុយក្រែន ។
វីដេអូមួយត្រូវបានបង្ហោះចូលទៅក្នុងគណនី YouTube ជនជាតិអូស្ត្រាលីគាំទ្ររុស្ស៊ីកាលពីថ្ងៃព្រហស្បតិ៍បានបង្ហាញឪពុករបស់កីឡាករ Djokovic លោក Srdjan ឈរជាមួយបុរសម្នាក់កាន់ទង់ជាតិរុស្ស៊ីជាមួយនឹងមុខរបស់លោក Vladimir Putin នៅលើវា។
វីដេអូនោះត្រូវបានគេ ដាក់ចំណងជើងថា ឪពុករបស់ Novak Djokovic ធ្វើសេចក្តីថ្លែងការណ៍ នយោបាយយ៉ាងក្លាហាន។ អ្នកយកព័ត៌មានកីឡាវាយកូនបាល់ ជនជាតិស៊ែប៊ីបានអះអាងថា វាគឺជាឪពុករបស់ Djokovic ហើយកាសែត Melbourne Age បានរាយការណ៍ថា លោកបាននិយាយជាភាសាស៊ែប៊ីថា រស់នៅប្រទេសរុស្ស៊ីឲ្យបានយូរ ។
បុរសម្នាក់ទៀតត្រូវបាន AFP ថតរូបនៅកីឡដ្ឋានអំឡុង ពេលប្រកួតរបស់កីឡាករ Djokovic ជាមួយនឹងអាវយឺតដែលមាននិមិត្តសញ្ញា “Z” គាំទ្រសង្រ្គាម។ លោក Myroshnychenko បាននិយាយថា ការឆ្លើយតបរបស់ Djokovic ចំពោះភាពចម្រូងចម្រាស អាចបញ្ចប់ការប្រកួតនៅឆ្នាំនេះ ពោលគឺមួយឆ្នាំបន្ទាប់ ពីលោកត្រូវបានគេនិរទេស ពីប្រទេសអូស្ត្រាលី សម្រាប់ការបដិសេធមិន ទទួលថ្នាំបង្ការប្រឆាំងនឹង COVID-19៕
