ទីក្រុងប៉េកាំង៖មន្ទីរពិសោធន៍រុករកអវកាសជ្រៅរបស់ចិន (DSEL) បាននិយាយថា ខ្លួនកំពុងអញ្ជើញអ្នកដែលមានទេពកោសល្យលំដាប់ពិភពលោកឲ្យដាក់ពាក្យសម្រាប់កម្មវិធីទេពកោសល្យវ័យក្មេងឆ្នើមនៅបរទេសឆ្នាំ ២០២៣ ដើម្បីលើកកម្ពស់ការអភិវឌ្ឍន៍នៃការរុករកអវកាសជ្រៅយោងតាមការចេញផ្សាយពីគេហទំព័រឆៃណាឌៀលី។
យោងតាម DSELបានឲ្យដឹងថា កម្មវិធីផ្តល់មូលនិធិដោយមូលនិធិវិទ្យាសាស្ត្រធម្មជាតិជាតិនៃប្រទេសចិនមានគោលបំណងទាក់ទាញអ្នកប្រាជ្ញវ័យក្មេងឆ្នើមពីបរទេសដែលបានបង្កើតស្នាដៃក្នុងវិទ្យាសាស្ត្រធម្មជាតិ វិស្វកម្ម និងបច្ចេកវិទ្យា មកធ្វើការនៅប្រទេសចិន។
DSEL បាននិយាយថា បេក្ខជនត្រូវបានអញ្ជើញឲ្យចូលរួមនៃការស្រាវជ្រាវលើវិទ្យាសាស្ត្រ និងបច្ចេកវិទ្យាអវកាស វិទ្យាសាស្ត្រអវកាស និងបច្ចេកវិទ្យា វិទ្យាសាស្ត្រភពផែនដី រូបវិទ្យា តារាសាស្ត្រ វិទ្យាសាស្ត្រនុយក្លេអ៊ែរ និងបច្ចេកវិទ្យា ជីវវិទ្យា គីមីវិទ្យា និងវិទ្យាសាស្ត្រសម្ភារៈ ពត៌មានអេឡិចត្រូនិក និងបច្ចេកវិទ្យា វិស្វកម្មមេកានិច បញ្ញាសិប្បនិម្មិត និងផ្សេងៗទៀត ព្រមទាំងវិស័យដែលទាក់ទងនឹងការរុករកអវកាសជ្រៅ។
ត្រូវបានបង្កើតឡើងដោយរដ្ឋបាលអវកាសជាតិចិន ខេត្ត Anhui និងសាកលវិទ្យាល័យវិទ្យាសាស្ត្រ និងបច្ចេកវិទ្យានៃប្រទេសចិន DSEL មានទីស្នាក់ការកណ្តាលនៅទីក្រុង Hefei រដ្ឋធានី Anhui និងមានសាខានៅទីក្រុងប៉េកាំង។ ចាប់តាំងពីការបង្កើតឡើងមក មន្ទីរពិសោធន៍បានធ្វើការស្រាវជ្រាវវិទ្យាសាស្ត្រ និងបច្ចេកវិទ្យា ដោយផ្តោតលើគម្រោងជាតិសំខាន់ៗ ក្នុងការរុករកអវកាសជ្រៅ។
DSEL មានគោលបំណងលើកកម្ពស់ការអភិវឌ្ឍន៍រយៈពេលវែងនៃការរុករកអវកាសជ្រៅទាក់ទងនឹងព្រះច័ន្ទ ភពផ្កាយ អាចម៍ផ្កាយ និងគែមនៃប្រព័ន្ធព្រះអាទិត្យ៕ដោយ៖លីភីលីព
