វ៉ាស៊ីនតោន ៖ ធនាគារកណ្តាលអាមេរិក កាលពីថ្ងៃពុធបានអនុម័តការដំឡើងពិន្ទុ ០,២៥ភាគរយនៅក្នុងអត្រាការប្រាក់គោលរបស់ខ្លួន ដោយបន្តជាមួយ នឹងយុទ្ធនាការរឹត បន្តឹងរូបិយវត្ថុរបស់ខ្លួនក្នុងការប៉ុនប៉ង ដើម្បីទប់ស្កាត់អតិផរណា ទោះបីជាថ្មីៗ នេះមានការព្រួយ បារម្ភអំពីស្ថិរភាព នៃប្រព័ន្ធធនាគារក៏ដោយ។
ការសម្រេចចិត្តលើកអត្រាមូលនិធិ សហព័ន្ធដែលធនាគារគិតថ្លៃគ្នាទៅវិញ ទៅមកសម្រាប់ការខ្ចីប្រាក់មួយយប់ ទៅជួរគោលដៅថ្មីពី ៤,៧៥ ទៅ ៥ ភាគរយដែលជាកម្រិតខ្ពស់បំផុតចាប់តាំងពីឆ្នាំ២០០៧។ ធនាគារកណ្ដាលអាមេរិក រំពឹងថាអត្រានេះនឹងមកដល់ ៥,១ភាគរយនៅចុងឆ្នាំ២០២៣ ដោយមិនផ្លាស់ប្តូរពីការព្យាករណ៍របស់ខ្លួនក្នុងខែធ្នូ មុនពេលធ្លាក់ចុះដល់ ៤,៣ ភាគរយនៅឆ្នាំក្រោយ។
ការដំឡើងលើកទី៩ ជាប់ៗ គ្នាត្រូវបានប្រកាស បន្ទាប់ពីកិច្ចប្រជុំរយៈពេលពីរថ្ងៃ នៃគណៈកម្មាធិការទីផ្សារបើកចំហសហព័ន្ធ ដែលកំណត់គោលនយោបាយ ទោះបីជាអ្នកសេដ្ឋកិច្ចមួយចំនួន បានស្នើឱ្យមានការផ្អាកមួយ ដើម្បីផ្តល់អាទិភាពដល់ស្ថិរភាពហិរញ្ញវត្ថុ បន្ទាប់ពីការដួលរលំនៃធនាគារអាមេរិក ចំនួនពីរកាលពីដើមខែនេះ។
គណៈកម្មាធិការបានឲ្យដឹងថា ការបង្កើនអត្រាការប្រាក់គឺនៅតែចាំបាច់ ដើម្បីបំពេញតាមគោលដៅរបស់ខ្លួនក្នុងការសម្រេចបាននូវការងារអតិបរមា និងមើលឃើញអត្រាអតិផរណា ២ ភាគរយក្នុងរយៈពេលវែងជាងនេះ។
ខណៈដែលសង្កត់ធ្ងន់ថា ប្រព័ន្ធធនាគារ របស់សហរដ្ឋអាមេរិកគឺ “រឹងមាំ និងធន់” ប្រភពក៏បានឲ្យដឹងនៅក្នុងសេចក្តីថ្លែង ការណ៍មួយថា “ការវិវឌ្ឍន៍ថ្មីៗទំនងជាបណ្តាលឱ្យមាន លក្ខខណ្ឌឥណទានកាន់តែតឹងរ៉ឹង សម្រាប់គ្រួសារ និងអាជីវកម្ម និងដើម្បីថ្លឹងថ្លែងលើសកម្មភាពសេដ្ឋកិច្ច ការជួល និងអតិផរណា ហើយផលប៉ះពាល់ទាំងនេះ មិនប្រាកដប្រជានោះទេ” ។
បន្ទាប់ពីបានប្រកាសពីការដំឡើងអត្រាការប្រាក់ ដែលភាគច្រើនស្របតាមការព្យាករ របស់អ្នកវិភាគ ប្រធានធនាគារកណ្ដាលអាមេរិកលោក Jerome Powell បានប្រាប់សន្និសីទសារព័ត៌មានថា ដំណើរការ នៃការធ្វើឱ្យអតិផរណាធ្លាក់ចុះដល់ ២ ភាគរយមាន “ផ្លូវដ៏វែងឆ្ងាយដែលត្រូវទៅ ហើយទំនងជាមានភាពរដិបរដុប” សម្រាប់ការកាត់បន្ថយអត្រា ការប្រាក់នៅចុងឆ្នាំនេះ ៕
