តេអេរ៉ង់ ៖ អ្នកនាំពាក្យក្រសួងការបរទេសអ៊ីរ៉ង់ បានស្តីបន្ទោសការកត់សម្គាល់ របស់រដ្ឋមន្ត្រីការបរទេសសហរដ្ឋអាមេរិក អំពីកម្មវិធីយោធារបស់ទីក្រុងតេអេរ៉ង់ ដោយលើកឡើងថា ពួកគេមានគោលបំណង លក់អាវុធអាមេរិក។
លោក Nasser Kanaani បានធ្វើការឆ្លើយតបទៅនឹងសារថ្មីៗនេះដោយលោក Antony Blinken ដែលក្នុងនោះលោកបានលើកឡើងថា ពួកគេ “ប្តេជ្ញាចិត្តយ៉ាងមុតមាំក្នុងការរំខាន ដល់សកម្មភាពលទ្ធកម្មយោធារបស់អ៊ីរ៉ង់” នេះបើយោងតាមសេចក្តីថ្លែងការណ៍ ដែលបានចេញផ្សាយនៅលើគេហទំព័រ របស់ក្រសួងការបរទេសអ៊ីរ៉ង់។
លោក Kanaani បានលើកឡើងថា “សុន្ទរកថាបង្កហេតុរបស់រដ្ឋលេខាធិការ សហរដ្ឋអាមេរិកអំពីកម្មវិធីយោធារបស់អ៊ីរ៉ង់ គឺមានបំណងតែមួយគត់ ដើម្បីបន្តទីផ្សារអាវុធ របស់អាមេរិកតាមរយៈការផ្សព្វផ្សាយអំពីភាពភ័យខ្លាច ចំពោះអ៊ីរ៉ង់ ក៏ដូចជាការសាបព្រួសភាព មិនចុះសម្រុងក្នុងចំណោមប្រទេសក្នុងតំបន់”។
លោកបានរំលឹកឡើងវិញថា កម្មវិធីយោធារបស់អ៊ីរ៉ង់គឺ “ការពារ និងរារាំង” នៅក្នុងធម្មជាតិ ហើយមិនមែនប្រឆាំងនឹងប្រទេសណាមួយ ដែលមិនប្រកាន់យកគំនិតនៃ “ការឈ្លានពាន” ប្រឆាំងនឹងអ៊ីរ៉ង់នោះទេ។
លោក Kanaani បានស្តីបន្ទោសសកម្មភាព “មិនសមហេតុផល និងខុសឆ្គង” របស់សហរដ្ឋអាមេរិក ក្នុងរយៈពេលមួយទសវត្សរ៍កន្លងមកនេះថា ជាប្រភពនៃអសន្តិសុខ អស្ថិរភាព និងសង្រ្គាមនៅក្នុងតំបន់ ដោយបន្ថែមថា វានឹងស្ថិតនៅក្នុងផលប្រយោជន៍របស់សហរដ្ឋអាមេរិក ប្រសិនបើវាបញ្ឈប់វិធីសាស្រ្តខុស ការជ្រៀតជ្រែក និងគ្មានការទទួលខុសត្រូវ ឆ្ពោះទៅកាន់ប្រទេស និងតំបន់ទាំងមូល៕
ប្រែសម្រួល ឈូក បូរ៉ា
