បរទេស ៖ រដ្ឋមន្ត្រីការពារជាតិចក្រភពអង់គ្លេស លោក Ben Wallace នឹងបន្តទៅមុខជាមួយនឹងផែនការកាត់បន្ថយទំហំកងទ័ពអង់គ្លេស ទោះបីជាមានជម្លោះ អ៊ុយក្រែន និងបង្កើនការចំណាយយោធាក៏ដោយ, នេះបើតាមកាសែត The Times បានរាយការណ៍ កាលពីថ្ងៃសុក្រដោយ ដកស្រង់ប្រភពនានា។
យោងតាមសារព័ត៌មាន RT ចេញផ្សាយនៅថ្ងៃទី១៣ ខែឧសភា ឆ្នាំ២០២៣ បានឱ្យដឹងថា នៅឆ្នាំ ២០២១ ក្រសួងការពារជាតិ បានប្រកាសផែនការកាត់បន្ថយ ចំនួនទាហានពី ៨២ ០០០ នាក់មកត្រឹមតែជាង ៧០ ០០០ នាក់ ខណៈពេលដែលកាត់បន្ថយចំនួនរថក្រោះពី ២២៧ គ្រឿង មកត្រឹម ១៤៨គ្រឿង។ ប៉ុន្តែដោយសារតែជម្លោះ ដែលកំពុងបន្តរវាងទីក្រុងមូស្គូ និងគៀវ គំនិតនៃការកាត់បន្ថយបានធ្វើឱ្យ សមាជិកសភា និងមេបញ្ជាការយោធារបស់ចក្រភពអង់គ្លេស ជាច្រើនមានការមិនសប្បាយចិត្ត ជាមួយនឹងលោក Patrick Sanders ដែលជាប្រមុខនៃកងទ័ព ដោយហៅវាថា ការ “ច្របូកច្របល់” នៅក្នុងបរិបទនៃជម្លោះដ៏ធំនៅអឺរ៉ុប ។
ទោះបីជាមានការព្រួយបារម្ភទាំងនេះក៏ដោយ ហើយជាមួយនឹងសម្ព័ន្ធមិត្តណាតូរបស់ចក្រភពអង់គ្លេស កំពុងព្យាយាមបង្កើនកម្លាំងយោធារបស់ពួកគេ បណ្តារដ្ឋមន្ត្រីអង់គ្លេស ត្រូវបានគេនិយាយដោយជឿថា ទីក្រុងឡុងដ៍ “មិនស្ថិតនៅក្រោមសម្ពាធដ៏ធំ ក្នុងការផ្លាស់ប្តូរផ្លូវនោះទេ” ។ បញ្ហានេះត្រូវបានគេរំពឹងថានឹងត្រូវដោះស្រាយនៅក្នុងឯកសារបញ្ជាការការពារជាតិ ដែលគ្រោងនឹងចេញផ្សាយនៅខែមិថុនា ។
យោងតាមកាសែត Times បានឱ្យដឹងថា រដ្ឋាភិបាលចក្រភពអង់គ្លេស នៅតែមានគម្រោងកាត់បន្ថយចំនួនបុគ្គលិកថ្មើរជើង ដើម្បីគាំទ្រកាំភ្លើងធំ៕
ប្រែសម្រួលៈ ណៃ តុលា
