ញូវយ៉ក ៖ ឧបនាយករដ្ឋមន្រ្តីកាណាដាលោកស្រី Chrystia Freeland បានឲ្យដឹងថា ប្រទេសកាណាដា កំពុងផ្អាកសកម្មភាពរបស់ខ្លួន ជាមួយធនាគារវិនិយោគហេដ្ឋារចនាសម្ព័ន្ធអាស៊ី ដែលដឹកនាំដោយប្រទេសចិន ដើម្បីស៊ើបអង្កេតការចោទប្រកាន់ថា ធនាគារនេះត្រូវបានគ្រប់គ្រងដោយបក្សកុម្មុយនិស្តចិន។
លោកស្រី Freeland បានប្រាប់អ្នកយកព័ត៌មានថា រដ្ឋាភិបាលកាណាដា “នឹងបញ្ឈប់ភ្លាមៗរាល់សកម្មភាព ដែលដឹកនាំដោយរដ្ឋាភិបាលនៅធនាគារ” ដោយបន្ថែមថា លោកស្រីបាន “ណែនាំនាយកដ្ឋានហិរញ្ញវត្ថុឱ្យដឹកនាំការ ត្រួតពិនិត្យជាបន្ទាន់លើការចោទប្រកាន់ ដែលបានលើកឡើង និងការចូលរួមរបស់កាណាដានៅក្នុងធនាគារ AIIB” ។
លោកស្រីក៏បានឲ្យដឹងផងដែរថា លោកស្រីមិនបានច្រានចោល “លទ្ធផលណាមួយ” នៃការពិនិត្យនោះទេ ដោយបង្ហាញថា ទីក្រុងអូតាវ៉ា អាចដកខ្លួនចេញពីធនាគារ នេះបើយោងតាមការចុះផ្សាយរបស់ទីភ្នាក់ងារសារព័ត៌មានក្យូដូជប៉ុន។
ការអត្ថាធិប្បាយនេះបានកើតឡើងនៅពេលដែលលោក Bob Pickard ដែលជានាយកផ្នែកទំនាក់ទំនងសកលរបស់ AIIB និងជាជនជាតិកាណាដា បានបង្ហោះសារកាលពីថ្ងៃពុធថា លោកបានលាលែងពីតំណែងដោយអះអាងថា ធនាគារត្រូវបានគ្រប់គ្រងដោយសមាជិកបក្សកុម្មុយនិស្ត។
លោកបន្ដថា “ខ្ញុំជឿថា ផលប្រយោជន៍របស់ប្រទេសរបស់ខ្ញុំ មិនត្រូវបានបម្រើដោយសមាជិកភាព AIIB របស់ខ្លួននោះទេ។ នៅក្នុងនោះដែរលោកស្រី Freeland បានលើកឡើងថា ប្រទេសកាណាដា នឹងពិភាក្សាអំពីបញ្ហានេះជាមួយប្រទេស សមាជិកផ្សេងទៀតរបស់ធនាគារ។
អ្នកនាំពាក្យក្រសួងការបរទេសចិន លោក Wang Wenbin បានឲ្យដឹងថា ធនាគារ AIIB បានដើរតួជា “ស្ថាប័នអន្តរជាតិ ផ្អែកលើច្បាប់ និងស្តង់ដារខ្ពស់” ជាមួយនឹងកិច្ចខិតខំប្រឹងប្រែងរួមគ្នារបស់សមាជិក។
លោក ក៏បានសង្កត់ធ្ងន់នៅក្នុងសន្និសីទសារព័ត៌មាន នៅទីក្រុងប៉េកាំងថា ធនាគារជ្រើសរើស និងគ្រប់គ្រងបុគ្គលិក របស់ខ្លួនមកពី ៦៥ ប្រទេស និងសេដ្ឋកិច្ច “ស្របតាមគោលការណ៍បើកចំហ គុណធម៌ និងតម្លាភាព”៕ ប្រែសម្រួល ឈូក បូរ៉ា
