ប្រភពពីចារកម្មអង់គ្លេសថា ការប្រយុទ្ធគ្នាយ៉ាងខ្លាំងក្លា រវាងរុស្ស៊ី និងអ៊ុយក្រែន បណ្តាលឱ្យកងទ័ពភាគី ទាំងពីរស្លាប់ និងរបួសច្រើនដូចគ្នា

បរទេស៖ រុស្ស៊ី និងអ៊ុយក្រែន កំពុងរាយការណ៍ ពីការប្រយុទ្ធគ្នាយ៉ាងខ្លាំងក្លា និងចំនួនអ្នកស្លាប់ដោយយោធាខ្ពស់, នេះបើយោងតាមរបាយការណ៍ ពីចារកម្មអង់គ្លេស កាលពីថ្ងៃអាទិត្យ។

យោងតាមសារព័ត៌មាន VOA ចេញផ្សាយ កាលពីថ្ងៃទី១៨ ខែមិថុនា ឆ្នាំ២០២៣ បានឱ្យដឹងដោយផ្អែកតាមមន្ត្រីអង់គ្លេស បាននិយាយកាលពីថ្ងៃអាទិត្យថា យុទ្ធជនអ៊ុយក្រែនកំពុងព្យាយាមបណ្តេញ កងកម្លាំងរុស្ស៊ីចេញពីតំបន់កាន់កាប់។ មន្ត្រីយោធារបស់ចក្រភព អង់គ្លេស បាននិយាយនៅក្នុងការវាយតម្លៃ ជាប្រចាំរបស់ពួកគេថា ការបំផ្លាញរបស់រុស្ស៊ី គឺប្រហែលជាកម្រិតខ្ពស់បំផុត ចាប់តាំងពីកំពូលនៃការប្រយុទ្ធ សម្រាប់តំបន់ បាក់មុត ក្នុងខែមីនា។

យោងតាមការស៊ើបការណ៍ សម្ងាត់របស់អង់គ្លេស ការប្រយុទ្ធដ៏ខ្លាំងក្លាបំផុតគឺផ្តោតលើភាគអាគ្នេយ៍ ខេត្ត ហ្សាប៉ូរីស៊ា ជុំវិញតំបន់ បាក់មុត និងឆ្ងាយទៅភាគខាងលិច ក្នុងខេត្ត ដូនេត ភាគខាងកើតនៃប្រទេសអ៊ុយក្រែន ។ យោងតាមការធ្វើបច្ចុប្បន្នភាព គឺប្រទេស អ៊ុយក្រែនបាន “មានការជឿនលឿនតិចតួច” ប៉ុន្តែកងកម្លាំងរុស្ស៊ីកំពុងធ្វើ “ប្រតិបត្តិការការពារប្រកបដោយប្រសិទ្ធភាព” នៅភាគខាងត្បូងនៃប្រទេសអ៊ុយក្រែន។

យោធាអ៊ុយក្រែន បាននិយាយនៅក្នុងការធ្វើបច្ចុប្បន្នភាពជាទៀងទាត់នៅព្រឹកថ្ងៃអាទិត្យថា ក្នុងរយៈពេល ២៤ ម៉ោងចុងក្រោយនេះ ប្រទេសរុស្ស៊ីបានធ្វើការ វាយប្រហារតាមអាកាសចំនួន ៤៣ លើក ការវាយប្រហារដោយមីស៊ីលចំនួន ៤ ដង និងការវាយប្រហារចំនួន ៥១ លើកពីមីស៊ីលជាច្រើនគ្រាប់។

អ្នកនាំពាក្យកងទ័ពអាកាស អ៊ុយក្រែន គឺលោក យូរី អ៊ីណាត់ បាននិយាយ កាលពីថ្ងៃអាទិត្យថា កងកម្លាំងអ៊ុយក្រែន បានវាយប្រហារឃ្លាំង គ្រាប់របស់រុស្ស៊ីនៅក្នុងភូមិ ផាធីហ្សានី នៅភាគខាងត្បូងតំបន់ ខេសុន ។ ភូមិ ផាធីហ្សានី ស្ថិតនៅជិតព្រំដែនរដ្ឋបាល ជាមួយតំបន់ ហ្សាប៉ូរីស៊ា ជិតខាងដែលមានចម្ងាយ ៤៥ គីឡូម៉ែត្រ ភាគខាងលិចនៃទីក្រុង ម៉េលីតូប៉ូល ដែលកាន់កាប់ដោយរុស្ស៊ី ៕