ប៉េកាំង៖ អ្នកជំនាញបានប្រាប់កាសែត Sputnik ថា សហរដ្ឋអាមេរិក កំពុងបំផ្លាញខ្លួនឯង ដោយបំផ្លិចបំផ្លាញកំណើនសេដ្ឋកិច្ចបច្ចេកវិទ្យាខ្ពស់របស់ខ្លួន ដោយហាមឃាត់ការវិនិយោគ របស់ក្រុមហ៊ុនអាមេរិក ក្នុងសមត្ថភាពបញ្ញាសិប្បនិម្មិត (AI) របស់ចិន។
កាលពីសប្តាហ៍មុន ប្រធានាធិបតីអាមេរិក លោក ចូ បៃដិន បានចុះហត្ថលេខាលើបទបញ្ជាប្រតិបត្តិមួយ ដែលដាក់កំហិតក្រុមហ៊ុនអាមេរិក ពីការវិនិយោគលើសមត្ថភាព និងបច្ចេកវិទ្យាបញ្ញាសិប្បនិមិត្ត (AI) របស់ចិន រួមទាំងឧបករណ៍ semiconductors និង quantum computing។
រដ្ឋបាលលោក បៃដិន បានឲ្យដឹងថា វិធានការនេះគឺមានគោលបំណងការពារបច្ចេកវិទ្យាបែបនេះពីការពង្រឹងសមត្ថភាពយោធា ការស៊ើបការណ៍សម្ងាត់ និងការឃ្លាំមើលរបស់ចិន ។ នៅក្នុងបញ្ជាប្រតិបត្តិ លោក បៃដិន បានឲ្យដឹងថា រដ្ឋបាលរបស់លោក មានការព្រួយបារម្ភ ចំពោះការវិនិយោគរបស់អាមេរិកមួយចំនួន អាចនឹងពន្លឿន ការអភិវឌ្ឍផលិតផលដែលចិន អាចប្រើប្រឆាំងនឹងសហរដ្ឋអាមេរិក។
វរសេនីយ៍ឯកកងទ័ពអាមេរិក ចូលនិវត្តន៍ និងជាទីប្រឹក្សាអន្តរជាតិ Earl Rasmussen អតីតអនុប្រធានមជ្ឈមណ្ឌល Eurasia បានពណ៌នាគោលនយោបាយថ្មី នេះថាជា “ការពន្លឿនការធ្វើអត្តឃាតសេដ្ឋកិច្ច”។
លោក Rasmussen បានប្រាប់កាសែត Sputnik ថា “ខណៈដែលការសម្រេចចិត្តមានគោលបំណង កំណត់កំណើនរបស់ចិន វាទំនងជានឹងប៉ះពាល់ ដល់សេដ្ឋកិច្ច របស់សហរដ្ឋអាមេរិក និងអឺរ៉ុបកាន់តែខ្លាំង។ វាត្រូវបានគេប៉ាន់ប្រមាណថា ក្រុមហ៊ុនអាមេរិកចំនួន ៧០០០០ អាចនឹងរងផលប៉ះពាល់ យ៉ាងធ្ងន់ធ្ងរ” ។
លោក Rasmussen បានបន្ថែមថា ដោយសារការហាមឃាត់បន្ទះឈីបរបស់លោក បៃដិន កាលពីមុន ក្រុមហ៊ុនអាមេរិកត្រូវបានគេរំពឹងថា នឹងខាតបង់រហូតដល់ ៨០ពាន់លានដុល្លារ។
លោកបានបន្ដថា “មានការពិភាក្សាជាច្រើនអំពីការកាត់ ផ្តាច់ពីប្រទេសចិន សម្រាប់សហរដ្ឋអាមេរិក និងអឺរ៉ុប។ វាទំនងជាមានផលប៉ះពាល់អវិជ្ជមាន ច្រើនលើសហរដ្ឋអាមេរិក និងអឺរ៉ុប ជាងប្រទេសចិន” ៕
ប្រែសម្រួល ឈូក បូរ៉ា
