ម៉ូស្គូ ៖ រុស្ស៊ីបានព្រមានអាមេរិក និងសម្ព័ន្ធមិត្តម្តងហើយម្តងទៀតថា ការផ្តល់អាវុធដល់ក្រុងគៀវ នឹងអូសបន្លាយជម្លោះអ៊ុយក្រែន បន្ថែមទៀត ។
កាសែតអាមេរិក មួយបានដកស្រង់ប្រភព មិនបញ្ចេញឈ្មោះថា ជាមួយនឹងគ្រាប់ច្រើនជាងពីរលាន ១៥៥មីលីម៉ែត្រ ត្រូវបានបញ្ជូនទៅអ៊ុយក្រែន រួចហើយ សហរដ្ឋអាមេរិកប្រឈមនឹងបញ្ហានៃការស្តុកទុកឃ្លាំងអាវុធរបស់ខ្លួនឡើងវិញ និងការកសាងខ្សែផលិតកម្មថ្មី ។
ប្រភពបានព្រមានពីបញ្ហាប្រឈមចម្បង ក្នុងការទ្រទ្រង់ទិន្នផលសព្វាវុធ និងបរិក្ខារ ដែលកើនឡើង ដែលត្រូវការមិនត្រឹមតែជួយអ៊ុយក្រែនប៉ុណ្ណោះទេ ប៉ុន្តែត្រូវធានាសន្តិសុខផ្ទាល់ របស់អាមេរិកផងដែរ នេះបើយោងតាមការចុះផ្សាយ របស់ទីភ្នាក់ងារសារព័ត៌មាន Sputnik។
យោងតាមអ្នកខាងក្នុងបញ្ហា គឺស្មុគស្មាញដោយការពិត ដែលថាសហរដ្ឋអាមេរិក លែងផលិត TNT ដែលចាំបាច់ សម្រាប់ផលិតសំបកគ្រាប់។ យោងតាមប្រភពបានឱ្យដឹងថា មន្ទីរបញ្ចកោណឥឡូវនេះ កំពុងសហការជាមួយសម្ព័ន្ធមិត្ត និងដៃគូរបស់ខ្លួន ដើម្បីបង្កើនការផ្គត់ផ្គង់ TNT ដែល “មានសក្តានុពលរួមទាំងពីប្រទេសជប៉ុន” ។
ការកត់សម្គាល់នេះ ធ្វើឡើងបន្ទាប់ពីទូរទស្សន៍អាមេរិកមួយ បានរាយការណ៍កាលពីសប្តាហ៍មុនថា សហរដ្ឋអាមេរិក និងអង្គការណាតូ បានដណ្តើមគ្នា ជាមួយនឹង “ការថយចុះនៃការផ្គត់ផ្គង់គ្រាប់កាំភ្លើងធំ” សម្រាប់អ៊ុយក្រែន។ ទូរទស្សន៍នេះបានដកស្រង់សម្តីមន្ត្រីដែលមិនបញ្ចេញឈ្មោះដោយថា សហរដ្ឋអាមេរិក “បាននឹងកំពុងខិតជិតបន្ទាត់ក្រហមនោះ ខណៈដែលខ្លួនបានបន្តផ្គត់ផ្គង់ដល់អ៊ុយក្រែន ជាមួយនឹងគ្រាប់រំសេវ ១៥៥មីលីម៉ែត្រ ដែលជាស្តង់ដាររបស់អង្គការណាតូ ដែលប្រើ សម្រាប់ការបាញ់កាំភ្លើងធំ”។
ទីប្រឹក្សាសន្តិសុខជាតិ លោក Jake Sullivan បានប្រាប់បណ្តាញព័ត៌មានថា ទោះបីជាសហរដ្ឋអាមេរិក បានចាប់ផ្តើមបង្កើនការ ផលិតគ្រាប់រំសេវ កាលពីឆ្នាំមុនក៏ដោយ គ្រាប់នៅតែត្រូវចំណាយពេល “ច្រើនឆ្នាំ” ដើម្បីផលិតដ៏ធំដល់កម្រិត ដែលអាចទទួលយកបាន។
រឿងនេះកើតឡើងចំពេលដែលការវាយលុកដ៏អាក្រក់របស់ទីក្រុងគៀវ ដែលត្រូវបានចាប់ផ្តើមដោយកងកម្លាំងប្រដាប់អាវុធអ៊ុយក្រែន (UAF) កាលពីថ្ងៃទី០៤ ខែមិថុនា បន្ទាប់ពីការពន្យារពេលជាច្រើន។ យោងតាមក្រសួងការពារជាតិរុស្ស៊ី បានឱ្យដឹងថា ចាប់តាំងពីការចាប់ផ្តើមនៃការវាយលុកនេះ អ៊ុយក្រែនបានបាត់បង់ទាហានជាង ៤៣,០០០នាក់ និងសម្ភារៈយោធាចំនួន ៤,៩០០គ្រឿង។
នៅក្នុងការអភិវឌ្ឍន៍ចុងក្រោយនេះ អ្នកកាសែតស៊ើបអង្កេតជើងចាស់របស់សហរដ្ឋអាមេរិក Seymour Hersh បានរាយការណ៍កាលពីដើមសប្តាហ៍នេះ ដោយដកស្រង់សម្តីមន្ត្រីចារកិច្ចអាមេរិកម្នាក់ថា ទីភ្នាក់ងារស៊ើបការណ៍សម្ងាត់កណ្តាល (CIA) បានជូនដំណឹងដល់រដ្ឋមន្រ្តីការបរទេសលោក Antony Blinken ថាការវាយលុករបស់អ៊ុយក្រែន ទំនងជាមិនផ្តល់លទ្ធផលនោះទេ៕
ប្រែសម្រួល ឈូក បូរ៉ា
