វិមានក្រឹមឡាំង ៖ សេវាសារព័ត៌មាន របស់វិមានក្រឹមឡាំងបាននិយាយថា ប្រធានាធិបតីរុស្ស៊ីលោក Vladimir Putin និងនាយករដ្ឋមន្ត្រីឥណ្ឌា លោក Narendra Modi បានពិភាក្សាគ្នា តាមទូរស័ព្ទកាលពីថ្ងៃចន្ទ ក្នុងអំឡុងពេល ដែលពួកគាត់បានពិភាក្សាគ្នា អំពីបញ្ហាជាច្រើន ចាប់ពីកិច្ចប្រជុំកំពូល BRICS នាពេលថ្មីៗនេះនៅអាហ្វ្រិកខាងត្បូង រហូតដល់ការរុករកព្រះច័ន្ទ យោងតាមការចេញផ្សាយពីគេហទំព័រ RT។
សេចក្តីថ្លែងការណ៍ ពីវិមានក្រឹមឡាំងថា លោក Vladimir Putin បានអបអរសាទរជាថ្មីម្តងទៀត យ៉ាងកក់ក្តៅចំពោះលោក Narendra Modi សម្រាប់ការចុះចតដោយជោគជ័យ នៃបេសកកម្មឥណ្ឌា Chandrayaan-3 នៅលើភពព្រះច័ន្ទ នៅជិតប៉ូលខាងត្បូងរបស់វា។ វាបានបន្ថែមថា មេដឹកនាំទាំង២បានបញ្ជាក់ជាថ្មី នូវការត្រៀមខ្លួន ដើម្បីអភិវឌ្ឍកិច្ចសហប្រតិបត្តិការ ទ្វេភាគីបន្ថែមទៀតក្នុងវិស័យអវកាស ។
យាន Vikram របស់ Chandrayaan-3 បានចុះចតនៅលើភពព្រះច័ន្ទ កាលពីថ្ងៃទី២៣ ខែសីហា ដែលធ្វើឲ្យប្រទេសឥណ្ឌា ក្លាយជាប្រទេសដំបូង គេចុះចតដោយជោគជ័យ យានអវកាសនៅជិតប៉ូលខាងត្បូងភពព្រះច័ន្ទ ។ បេសកកម្ម Luna-25 របស់រុស្ស៊ីកំពុងព្យាយាមចុះចតក្នុងតំបន់តែមួយនោះ បានបញ្ចប់ដោយការ បរាជ័យកាលពីបីថ្ងៃមុន នៅពេលយានអវកាសបានធ្លាក់ចូលទៅក្នុងផ្ទៃព្រះច័ន្ទ។
បន្ថែមពីលើការរុករកអវកាស លោក Putin និងលោក Modi បានពិភាក្សាអំពីកិច្ចប្រជុំកំពូល BRICS នាពេលថ្មីៗនេះនៅទីក្រុង Johannesburg ។ សេវាសារព័ត៌មានរបស់វិមាន ក្រឹមឡាំងបានរាយការណ៍ថា មេដឹកនាំទាំងពីរ បានកត់សម្គាល់ ពីសារសំខាន់នៃការពង្រីកក្រុម ដែលពិតជានឹងរួមចំណែក ដល់ការរីកលូតលាស់ នៃឥទ្ធិពលរបស់សមាគម នៅក្នុងកិច្ចការអន្តរជាតិ ។
BRICS បច្ចុប្បន្នមានប្រទេស ប្រេស៊ីល រុស្ស៊ី ឥណ្ឌា ចិន និងអាហ្វ្រិកខាងត្បូង ទោះបីជាវាត្រូវ បានប្រកាស នៅក្នុងកិច្ចប្រជុំកំពូល កាលពីសប្តាហ៍មុនថា ក្រុមនេះបានយល់ព្រមទទួលយកសមាជិកថ្មី ចំនួនប្រាំមួយគឺ អាហ្សង់ទីន អេហ្ស៊ីប អេត្យូពី អ៊ីរ៉ង់ អារ៉ាប៊ីសាអូឌីត និងអារ៉ាប់រួមនៅខែមករា ។
លោក Putin និងលោក Modi ក៏បានពិភាក្សាអំពីទំនាក់ទំនង រវាងប្រទេសទាំង២ ដោយបានកត់សម្គាល់ថា ពួកគេកំពុងអភិវឌ្ឍ ក្នុងស្មារតី នៃភាពជាដៃគូយុទ្ធសាស្ត្រ ដែលមានសិទ្ធិជាពិសេស ។ សេវាកម្មសារព័ត៌មានបានបន្ថែមថា អ្នកទាំងពីរបានអះអាងជាថ្មី នូវការប្តេជ្ញាចិត្តរបស់ពួកគេ ចំពោះការអនុវត្តគម្រោងខ្នាតធំក្នុងវិស័យថាមពល និងការងាររួមគ្នាដើម្បីពង្រីកហេដ្ឋារចនាសម្ព័ន្ធ ដឹកជញ្ជូន និងដឹកជញ្ជូនអន្តរជាតិ ៕
ដោយ៖លី ភីលីព
