តូក្យូ ៖ នាយករដ្ឋមន្ត្រីជប៉ុន លោក ហ្វូមីអូ គីស៊ីដា នៅថ្ងៃពុធនេះ បានរុះរើគណៈរដ្ឋមន្ត្រីរបស់លោក ដោយបានបំបែកឯកទកម្មស្ត្រី ៥នាក់ជារដ្ឋមន្ត្រី ក្នុងគោលបំណង ដើម្បីផ្លាស់ប្តូរនិន្នាការ ធ្លាក់ចុះ នៃប្រជាប្រិយភាព នៃរដ្ឋាភិបាល របស់លោកជាមួយនឹងការរំពឹងទុកថា លោកគ្រោងនឹងរំលាយសភា ជាន់ទាបក្នុងពេលឆាប់ៗនេះ ។
លោក គីស៊ីដា ដែលជាអ្នកតំណាងរាស្រ្តមធ្យម សង្ឃឹមថា ការកែប្រែនេះ នឹងផ្តល់ការជំរុញ ដល់រដ្ឋបាល របស់លោក ដោយបើកផ្លូវ ឱ្យគណបក្សប្រជាធិបតេយ្យ សេរីរបស់លោក ទទួលបានជ័យជំនះពីការបោះឆ្នោតសភា តំណាងរាស្ដ្របន្ទាប់ និងការពង្រឹងការគាំទ្រពីក្នុងបក្សរបស់លោក មុនពេលការប្រជែងតំណែងប្រធានLDP នៅឆ្នាំ២០២៤ ។
ក្នុងចំណោមរដ្ឋមន្ត្រីទាំង ១៩រូប លោក គីស៊ីដា បានជ្រើសរើសមុខតំណែងថ្មីចំនួន ១១ ខណៈដែល លោកផ្លាស់ប្តូរ ដើម្បីបង្កើតរូបភាពថ្មី នៃគណៈរដ្ឋមន្ត្រីរបស់លោក ខណៈពេលដែលរក្សាសមាជិកសំខាន់ៗ មួយចំនួន ដើម្បីរក្សាស្ថិរភាព។ អតីតរដ្ឋមន្ត្រីក្រសួង យុត្តិធម៌លោកស្រី Yoko Kamikawa សមាជិកសភាស្ត្រីជើងចាស់ ត្រូវបានតែងតាំងជារដ្ឋមន្ត្រីការបរទេស ។
រដ្ឋមន្ត្រីក្រសួងហិរញ្ញវត្ថុ Shunichi Suzuki ប្រធានខុទ្ទកាល័យលោក Hirokazu Matsuno និងរដ្ឋមន្ត្រីឧស្សាហកម្ម Yasutoshi Nishimura នៅតែស្ថិតក្នុងតួនាទីរបស់ពួកគេ នេះបើយោងតាមការចុះផ្សាយ របស់ទីភ្នាក់ងារសារព័ត៌មានក្យូដូជប៉ុន។
ការរុះរើនេះកើតឡើង នៅពេលដែលអត្រា គាំទ្រ សម្រាប់គណៈរដ្ឋមន្ត្រីរបស់លោក គីស៊ីដា បានបន្តធ្លាក់ចុះមួយផ្នែក ដោយសារបញ្ហាជាមួយ ប្រព័ន្ធអត្ត សញ្ញាណប័ណ្ណជាតិ “My Number” និងការខកចិត្តជាសាធារណៈ ចំពោះការកើនឡើងតម្លៃ នៅពេលអវត្តមាន នៃការដំឡើងប្រាក់ខែ។
ដោយមានបំណងចង់បានការបន្តគោលនយោបាយ លោក គីស៊ីដា បានរក្សារដ្ឋមន្ត្រីឌីជីថល លោក Taro Kono ដែលជានិស្សិតបញ្ចប់ការសិក្សានៅសាកលវិទ្យាល័យ Georgetown និងជាបុគ្គលដ៏មានប្រជាប្រិយភាព ដែលធ្លាប់បម្រើការជារដ្ឋមន្ត្រីការបរទេសពីមុន ដើម្បីដោះស្រាយបញ្ហាអត្ដសញ្ញាណប័ណ្ណជាតិ My Number៕
ប្រែសម្រួល ឈូក បូរ៉ា
