អ៊ុយក្រែន៖ បេក្ខនារីដែលចូលរួមការប្រកួតប្រជែងបវរកញ្ញាអ៊ុយក្រែន ២០២៣ ៣ នាក់ត្រូវបានដកសិទ្ធិ និង២រូបបានដកខ្លួនចេញកាលពីថ្ងៃពុធ បន្ទាប់ពីកម្មវិធីប្រកួតបានបង្កើតក្រុមប្រឹក្សាភិបាលពិនិត្យក្រមសីលធម៌ ធ្វើការស៊ើបអង្កេតពីការអះអាងរបស់តារាកំប្លែងអ៊ុយក្រែនថា បេក្ខនារីមួយចំនួនមានទំនាក់ទំនងជាមួយរុស្ស៊ី យោងតាមការចេញផ្សាយពីគេហទំព័រ RT ។
អ្នករៀបចំកម្មវិធីប្រកួតបាននិយាយលើការបង្ហោះ Instagram កាលពីល្ងាចថ្ងៃពុធថា ដោយផ្អែកលើលទ្ធផល នៃការស៊ើបអង្កេតដែលធ្វើឡើងដោយក្រុមប្រឹក្សាក្រមសីលធម៌ពិសេស យើងជូនដំណឹងដល់អ្នកថា ការពិតមិនមានសីលធម៌ទាក់ទងនឹងអ្នកចូលរួមការប្រកួតត្រូវបានបញ្ជាក់ជាអកុសល ដូច្នេះ គណៈកម្មាធិការត្រូវបង្ខំចិត្តដកអ្នកចូលរួម ៣ នាក់ចេញពីការប្រកួត ។
យោងតាមបណ្តាញ Telegram របស់រុស្ស៊ី Mash បេក្ខនារី ២ នាក់ទៀតបានស្ម័គ្រចិត្តដកខ្លួនចេញពីការប្រកួត។
អ្នករៀបចំកម្មវិធីមិនបានបញ្ជាក់ថា នរណាពិតប្រាកដត្រូវបានគេដកចេញ និងសម្រាប់ការបំពានបែបណាទេ ហើយឈ្មោះរបស់ពួកគេក៏មិនត្រូវបានគេបង្ហាញផងដែរ។
អ្នករៀបចំបន្ថែមថា យើងមានអំណរគុណយ៉ាងស្មោះចំពោះព័ត៌មានទាំងអស់ដែលមកដល់យើង។ វាក៏សំខាន់ ដែលពួកយើងម្នាក់ៗ បំបែកពាក្យមិនច្បាស់លាស់ចេញពីការពិតជាក់ស្តែង អនុវត្តការគិតពិចារណា និងផ្ទៀងផ្ទាត់ព័ត៌មានដែលមកពីប្រភពផ្សេងៗ។
រឿងនេះបានចាប់ផ្តើមកាលពីថ្ងៃចន្ទ នៅពេលតារាកំប្លែងអ៊ុយក្រែន និងបុគ្គលិកប្រព័ន្ធផ្សព្វផ្សាយសង្គម Andrey Luzan បានសរសេរនៅលើ Instagram របស់លោកអំពីទំនាក់ទំនងមួយចំនួនដែលបេក្ខនារី ‘Miss Ukraine 2023’ អាចនឹងមានជាមួយរុស្ស៊ី។
លោក Luzan បានអះអាងថា តារាម៉ូដែលម្នាក់ក្នុងចំណោមតារាម៉ូដែល Kseniya Magera គឺជាមិត្តភក្តិជាមួយជនជាតិរុស្ស៊ី ហើយបានទៅលេងភោជនីយដ្ឋានរបស់អ្នកជំនួញរុស្ស៊ី Arkady Novikov បានចូលរួមជាមួយយុទ្ធនាការបោះឆ្នោតប្រធានាធិបតី លោក Vladimir Putin ។
លោក Luzan បាននិយាយថា Magera ធ្លាប់រស់នៅក្នុងទីក្រុងមូស្គូបានចូលរួមក្នុងការប្រកួត ហើយបានបន្តទំនាក់ទំនងជាមួយតារាម៉ូដែលរុស្ស៊ី សូម្បីតែបន្ទាប់ពីផ្លាស់ទៅទីក្រុងឌូបៃកាលពីឆ្នាំមុនក៏ដោយ៕ ដោយ៖លី ភីលីព
