ស៊ីដនី ៖ អ្នកជំនាញមកពី CSIRO ដែលជាអង្គការស្រាវជ្រាវ វិទ្យាសាស្ត្រ និងឧស្សាហកម្ម នៃ Commonwealth និយាយថា ទីភ្នាក់ងារវិទ្យាសាស្ត្រជាតិ របស់ប្រទេសអូស្ត្រាលី បានដំឡើងឧបករណ៍ ចាប់សញ្ញាឯកទេសនៅផ្នែកខាងត្បូង នៃតំបន់ថ្មប៉ប្រះទឹក Great Barrier Reef ដើម្បីជួយតាមដាន និងព្យាករណ៍ ការហូរនៃដីល្បាប់ ព្រោះការហូរទឹករំអិលនេះ អាចប៉ះពាល់ ដល់ប្រព័ន្ធអេកូឡូស៊ីសមុទ្រ របស់តំបន់បេតិកភណ្ឌពិភពលោក របស់អង្គការយូណេស្កូ យោងតាមការចេញ ផ្សាយពីគេហទំព័រ VOA ។
ក្រុមអ្នកស្រាវជ្រាវមកពី CSIRO និយាយថា ប្រព័ន្ធឧបករណ៍ចាប់ សញ្ញារបស់ពួកគេ បានដំឡើង ក្នុងរយៈពេលប៉ុន្មានខែថ្មីៗនេះនៅផ្នែកខាងត្បូង នៃតំបន់ Great Barrier Reef ជាប្រព័ន្ធដំបូងគេក្នុងពិភពលោក។ វាពិនិត្យគុណភាពទឹក ដោយប្រើឧបករណ៍ ចាប់សញ្ញាឯកទេស និងទិន្នន័យផ្កាយរណបរួមបញ្ចូលគ្នា ហើយព័ត៌មានលម្អិត ត្រូវបានចេញផ្សាយ កាលពីថ្ងៃពុធ ។
អ្នកជំនាញសង្ឃឹមថា នឹងបង្កើត បណ្តាញត្រួតពិនិត្យគុណភាពទឹកពីដី ទៅអវកាសរួមបញ្ចូលគ្នា ដោយប្រើឧបករណ៍ ចាប់សញ្ញានៅក្នុងទឹក និងផ្កាយរណបសង្កេតផែនដី ដែលមានស្រាប់ ។ បញ្ញាសិប្បនិម្មិតក៏នឹងត្រូវ បានប្រើដើម្បីជួយវិភាគ ទិន្នន័យផងដែរ ។ ពួកគេនិយាយថា គុណភាពផ្លូវទឹកតាមឆ្នេរ និងផ្លូវទឹករបស់អូស្ត្រាលី កំពុងត្រូវបានគំរាមកំហែង ដោយការឡើងកំដៅផែនដី នគរូបនីយកម្ម ការកាប់បំផ្លាញព្រៃឈើ និងការបំពុល ។
ប្រព័ន្ធនេះវិភាគលំហូរនៃដីល្បាប់ និងកាបូនសរីរាង្គដែលរលាយចេញពីទន្លេ Fitzroy ចូលទៅក្នុងឈូងសមុទ្រ Keppel នៅកណ្តាល Queensland ស្ថិតនៅភាគខាងត្បូងនៃ Great Barrier Reef ។ ប្រព័ន្ធនេះត្រូវបានរចនាឡើងដើម្បីផ្តល់ការព្រមានជាមុនអំពីវត្តមានរបស់សារាយដែលបង្កគ្រោះថ្នាក់ និងសារធាតុកខ្វក់។
ថ្មប៉ប្រះទឹកគឺជាកន្លែងសាកល្បងមួយក្នុងចំណោមកន្លែងសាកល្បងចំនួន ៧ សម្រាប់បេសកកម្ម AquaWatch Australia របស់ CSIRO ។ នេះគឺជាឈ្មោះគម្រោងត្រួតពិនិត្យទឹកពីដីទៅលំហ។ ក្រុមស្រាវជ្រាវសង្ឃឹមថានឹងមានរហូតដល់ទៅ ១៥ កន្លែងសាកល្បងប្រព័ន្ធនៅឆ្នាំ ២០២៦។
លោក Alex Held ប្រធានគម្រោង បានប្រាប់ VOA នៅថ្ងៃព្រហស្បតិ៍ថា ដីល្បាប់អាចបញ្ឈប់ពន្លឺព្រះអាទិត្យមិនឲ្យទៅដល់បាតសមុទ្រ។ លោក Hold បាននិយាយថា ជាការពិតណាស់ ដីល្បាប់អាចរារាំងពន្លឺ ហើយដូច្នេះវាក៏កាត់បន្ថយការលូតលាស់ និងការសំយោគរស្មីនៃស្មៅសមុទ្រ និងសារាយផ្សេងទៀតនៅក្នុងតំបន់ឆ្នេរ ។
លោក Hold បានបន្តថា ឧបករណ៍ចាប់សញ្ញា និងផ្កាយរណបនឹងត្រួតពិនិត្យ ប្រសិទ្ធភាពនៃកម្មវិធីដើម្បីកាត់បន្ថយ ការហូរចេញនៃដីល្បាប់ទន្លេ ចូលទៅក្នុងសមុទ្រ ៕
ដោយ៖លី ភីលីព
