វ៉ាស៊ីនតោន៖ រដ្ឋមន្ត្រីការពារជាតិអាមេរិក លោក Lloyd Austin បានឲ្យដឹងថា មន្ទីរបញ្ចកោណ កំពុងបញ្ជូននាវាចម្បាំង និងយន្តហោះចម្បាំង ទៅកាន់តំបន់ មេឌីទែរ៉ាណេខាងកើត ក្នុងការបង្ហាញការគាំទ្រ សម្រាប់អ៊ីស្រាអែល ចំពេលមានជម្លោះកាន់តែខ្លាំងឡើងរវាងកងកម្លាំងអ៊ីស្រាអែល និងក្រុមយុទ្ធជនហាម៉ាស់ ។
លោក Austin បានឲ្យដឹងនៅក្នុងសេចក្តីថ្លែងការណ៍មួយថា លោកបានដឹកនាំចលនារបស់ USS Gerald R. Ford Carrier Strike Group ដែលមាននាវាផ្ទុកយន្តហោះ នាវាដឹកកាំជ្រួច និងនាវាពិឃាតមីស៊ីលដឹកនាំចំនួន ៤ ទៅកាន់សមុទ្រមេឌីទែរ៉ាណេខាងកើត។
ប្រមុខការពារជាតិបានឲ្យដឹងថា មន្ទីរបញ្ចកោណក៏បានចាត់វិធានការ ដើម្បីបង្កើនកងយន្តហោះចម្បាំង F-35, F-15, F-16 និង A-10 របស់កងទ័ពអាកាសអាមេរិកនៅក្នុងតំបន់។
លោកបានបន្ថែមថា រដ្ឋាភិបាលសហរដ្ឋអាមេរិក “នឹងផ្តល់ឱ្យកងកម្លាំងការពារអ៊ីស្រាអែលយ៉ាងឆាប់រហ័សនូវឧបករណ៍ និងធនធានបន្ថែម រួមទាំងអាវុធយុទ្ធភណ្ឌ”។
លោក Austin បានលើកឡើងថា ជំនួយផ្នែកសន្តិសុខរបស់សហរដ្ឋអាមេរិកជុំទីមួយដល់អ៊ីស្រាអែល “នឹងចាប់ផ្តើមធ្វើចលនា” នៅថ្ងៃអាទិត្យ “ហើយនឹងមកដល់ក្នុងប៉ុន្មានថ្ងៃខាងមុខ”៕
ប្រែសម្រួល ឈូក បូរ៉ា
