អាមេរិក៖ មហាសេដ្ឋីបច្ចេកវិទ្យាយក្សអាមេរិក លោក Elon Mask បានព្រមានថា សហរដ្ឋអាមេរិក បាន លេងលើសកមិ្រតក្នុងការប្រើប្រាស់អាវុធដែលជាប្រាក់ដុល្លារជាមួយនឹងទណ្ឌកម្ម ដោយជំរុញឲ្យប្រទេសជាច្រើនទៀត នៅជុំវិញពិភពលោកកាត់បន្ថយប្រតិបត្តិការ ដោយប្រើរូបិយប័ណ្ណយោងតាមការចេញផ្សាយពីគេហទំព័រ RT។
ម្ចាស់ក្រុមហ៊ុន X (អតីត Twitter) បាននិយាយក្នុងអំឡុងពេលវគ្គ Twitter Spaces ដែលរៀបចំដោយសហគ្រិនអាមេរិក David Sachs កាលពីថ្ងៃចន្ទថា ឥឡូវនេះ អ្នកកំពុងមើលឃើញប្រទេសជាច្រើនដកប្រាក់ដុល្លារ ពីប្រតិបត្តិការរបស់ពួកគេ ដោយសារយើងបានបង្ខំវា។
លោក Musk បានគូសបញ្ជាក់ពីការផ្លាស់ប្តូរក្នុងការធ្វើពាណិជ្ជកម្មរូបិយប័ណ្ណជាតិ ជាពិសេសក្នុងចំណោមប្រទេស BRICS ដោយបន្ថែមថា វាមិនមែនជាជម្រើសធ្វើឡើងដោយប្រទេសទាំងនេះទេ ប៉ុន្តែជាភាពចាំបាច់បង្ខំពួកគេដោយទណ្ឌកម្មលោកខាងលិច ដែលទាក់ទងនឹងអ៊ុយក្រែន ប្រឆាំងនឹងទីក្រុងម៉ូស្គូ។ ប្រទេសដូចជាប្រេស៊ីល ឬឥណ្ឌានៅតែចង់ធ្វើប្រតិបត្តិការជាមួយរុស្ស៊ី។
ពួកគេមិនអាចធ្វើវាដោយប្រើប្រាក់ដុល្លារបានទេ ដូច្នេះហើយយើងបានបង្ខំពួកគេឲ្យដកប្រាក់ដុល្លារពីប្រតិបត្តិការរបស់ពួកគេ ដែលធ្វើឲ្យកម្លាំងប្រាក់ដុល្លារនៅលើពិភពលោកចុះខ្សោយ។
ការប្រើប្រាស់អាវុធនៃ Greenback បានជំរុញឲ្យប្រទេសជាច្រើនស្វែងរកជម្រើសជំនួស បន្ទាប់ពីទណ្ឌកម្មបានកាត់ផ្តាច់រុស្ស៊ីយ៉ាងមានប្រសិទ្ធភាពចេញពីប្រព័ន្ធហិរញ្ញវត្ថុលោកខាងលិច។
អ្នកសេដ្ឋកិច្ចលេចធ្លោមួយចំនួនធំបានព្រមានម្តងហើយម្តងទៀតថា ឥទ្ធិពល នៃស្ថាប័នហិរញ្ញវត្ថុដែលមានមូលដ្ឋានលើប្រាក់ដុល្លារ និងគោលនយោបាយសេដ្ឋកិច្ចរបស់សហរដ្ឋអាមេរិក ដ៏គឃ្លើននឹងជំរុញឲ្យប្រទេសជាច្រើនទៀត នៅជុំវិញពិភពលោកបោះបង់ចោលប្រតិបត្តិការប្រាក់ដុល្លារ និងផ្លាស់ទីទៅរូបិយប័ណ្ណក្នុងស្រុកក្នុងពាណិជ្ជកម្ម៕ ដោយ៖លី ភីលីព
