រុស្ស៊ី ៖ អ្នកដឹកនាំក្រុមតន្រ្តីរ៉ុក Fusion មកពីស៊ីបេរី ប្រទេសរុស្ស៊ី បានតន្ត្រីលក្ខណៈពិសេសក្នុងការផ្សាយពាណិជ្ជកម្ម ដោយក្រុមហ៊ុនបច្ចេកវិទ្យាយក្ស Apple របស់សហរដ្ឋអាមេរិក និយាយថា លោកមិនដែលទិញផលិតផល ដែលលោកកំពុងផ្សាយ ពាណិជ្ជកម្មនោះឡើយ យោងតាមការចេញផ្សាយ ពីគេហទំព័រ RT ។
យុទ្ធនាការទីផ្សាររបស់ Apple សម្រាប់ iPhone 15 Pro ថ្មីស្រឡាងរបស់ខ្លួន ពាក់ព័ន្ធនឹងការសហការជាមួយតន្ត្រីករដ៏ល្បីម្នាក់មកពីស៊ីបេរី ប្រទេសរុស្ស៊ី លោក Albert Kuvezin ខណៈការផ្សាយពាណិជ្ជកម្ម ទូរស័ព្ទ iPhone ខ្លីមួយដែលមានបទចម្រៀង របស់លោកបានក្លាយ ជាការពេញនិយមយ៉ាងខ្លាំង នៅលើ YouTube ហើយ Kuvezin ខ្លួនឯងបានសារភាពថា លោកមិនដែលប្រើប្រាស់ផលិតផល របស់ Apple នោះទេ ។
ការផ្សាយពាណិជ្ជកម្មសម្រាប់ iPhone 15 Pro Titanium មានបទចម្រៀង ‘Karangailyg Kara Hovaa (Dygyldai)’ ដោយក្រុមតន្ត្រី Kuvezin ឈ្មោះ Yat-Kha ដែលលេងនៅផ្ទៃខាងក្រោយនោះ ទទួលបានការចូលមើលចំនួន ១៤ លានដង ប្រហែល១០ដងច្រើន ជាងការផ្សាយពាណិជ្ជកម្មរបស់ iPhone 15 ផ្សេងទៀត ។ បទចម្រៀង ‘Get Him Back!’ របស់ Olivia Rodrigo ជាតារាប៉ុបដែលមានការពេញនិយមជាសកល អាចប្រមូលបាន ក្នុងពេលតែមួយ។
លោក Kuvezin ជាអ្នកនៅពីក្រោយយុទ្ធនាការទីផ្សារនេះ រស់នៅក្នុងភូមិភ្នំតូចមួយ ក្នុងតំបន់ Tuva ដាច់ស្រយាលរបស់រុស្ស៊ី មានព្រំប្រទល់ជាប់ប្រទេស ម៉ុងហ្គោលី។ លោកដឹកនាំក្រុមតន្ត្រីរ៉ុកចម្រុះ រួមបញ្ចូលគ្នានូវតន្ត្រីប្រជាប្រិយ Tuvan ក្នុងស្រុកជាមួយរ៉ុកខាងលិច ។ បទចម្រៀងដែល Apple ទទួលបានអាជ្ញាប័ណ្ណសម្រាប់ឃ្លីប របស់វាត្រូវបានចេញផ្សាយ ដោយក្រុមតន្រ្តីនៅដើមឆ្នាំ ១៩៩៥ ជាផ្នែកមួយនៃអាល់ប៊ុម ‘Yenisei-Punk’ របស់ខ្លួន ឈ្មោះបទចម្រៀងនេះប្រែថា ‘In the Endless Black Steppe’ ។
លោក Kuvezin បានប្រាប់កាសែត Wall Street Journal បន្ទាប់ពីការជោគជ័យ របស់លោកថា ដំបូងឡើយ លោកមិនយល់នៅពេល Apple ទាក់ទងលោកឲ្យប្រើបទចម្រៀងចាស់ របស់លោក សម្រាប់ការ ផ្សាយពាណិជ្ជកម្ម ។ លោកគ្រាន់តែបញ្ជូនសារ ទៅក្រុមហ៊ុនថតសំឡេង របស់លោក ដែលមានមូលដ្ឋាននៅហ្វាំងឡង់ ។
លោកបានប្រាប់ WSJ ថា បន្ទាប់ពីលោកចាប់ផ្តើម ឮពីការផ្សាយពាណិជ្ជកម្មពីមិត្តភក្តិ និងសាច់ញាតិ ទើបគាត់ដឹងពីអ្វីដែលបានកើតឡើង។ លោក Kuvezin បាននិយាយថា លោកមិនច្បាស់ថាហេតុអ្វី បានជាក្រុមហ៊ុនបច្ចេកវិទ្យាយក្ស របស់សហរដ្ឋអាមេរិកជ្រើសរើស បទចម្រៀងរបស់លោក សម្រាប់ពាណិជ្ជកម្ម ហើយខ្ញុំនៅតែមិនដឹង ។ Apple បានបដិសេធមិន ធ្វើអត្ថាធិប្បាយទេ ៕
ដោយ៖លី ភីលីព
