តូក្យូ ៖ ក្រុមអ្នកវិទ្យាសាស្ត្រជប៉ុន មួយក្រុមបាននិយាយថា អំប្រ៊ីយ៉ុងសត្វកណ្ដុរ ត្រូវបានលូតលាស់នៅលើស្ថានីយ៍ អវកាសអន្តរជាតិ ហើយត្រូវបានអភិវឌ្ឍ ជាធម្មតាសម្រាប់ការសិក្សាដំបូង ដោយបង្ហាញថា វាអាចទៅរួចសម្រាប់មនុស្ស ក្នុងការបន្តពូជនៅទីអវកាស យោងតាមការចេញ ផ្សាយពីគេហទំព័រជប៉ុនធូដេ ។
អ្នកស្រាវជ្រាវរួមមាន Teruhiko Wakayama សាស្រ្តាចារ្យនៃមជ្ឈមណ្ឌលជីវបច្ចេកវិទ្យាកម្រិតខ្ពស់ នៃសាកលវិទ្យាល័យ Yamanashi និងក្រុមមកពីទីភ្នាក់ងារ អវកាសជប៉ុន (JAXA) បានបញ្ជូនអំប្រ៊ីយ៉ុងសត្វកណ្ដុរ នៅលើយន្តហោះរ៉ុក្កែត ទៅកាន់ ISS កាលខែសីហា ឆ្នាំ ២០២១។ អវកាសយានិកបានរំលាយអំប្រ៊ីយ៉ុង ដំណាក់កាលដំបូងដោយប្រើឧបករណ៍ ពិសេសដែលបានរចនាឡើង ក្នុងគោលបំណងនេះ ហើយដុះពួកវានៅលើ ស្ថានីយរយៈពេល ៤ ថ្ងៃ ។
អ្នកវិទ្យាសាស្ត្របាននិយាយថា “អំប្រ៊ីយ៉ុងដែលត្រូវបានដាំដុះក្រោមលក្ខខណ្ឌមីក្រូ ទំនាញបានអភិវឌ្ឍ ជាធម្មតាចូលទៅក្នុងកោសិកាដែលវិវត្តទៅជាទារក និងសុក ។ អ្នកស្រាវជ្រាវបាននិយាយ លើការសិក្សាមួយបានចេញផ្សាយ តាមអ៊ីនធើណេតលើទស្សនាវដ្តី វិទ្យាសាស្ត្រ iScience កាលពីថ្ងៃសៅរ៍ថា ការពិសោធន៍នេះបានបង្ហាញយ៉ាងច្បាស់ថា ទំនាញផែនដីមិនមានផល ប៉ះពាល់អ្វីគួរឲ្យកត់សម្គាល់នោះទេ ។
ពួកគេក៏បាននិយាយថា មិនមានការផ្លាស់ប្តូរគួរឲ្យកត់ សម្គាល់នៅក្នុងស្ថានភាពនៃ DNA និងហ្សែននោះទេ បន្ទាប់ពីពួកគេបានវិភាគ លើកោសិកាត្រូវបានបញ្ជូន ត្រឡប់ ទៅមន្ទីរពិសោធន៍ របស់ពួកគេវិញនៅលើផែនដី ។ សាកលវិទ្យាល័យ Yamanashi និងវិទ្យាស្ថានស្រាវជ្រាវជាតិ Riken បាននិយាយនៅក្នុងសេចក្តីថ្លែងការណ៍រួម មួយកាលពីថ្ងៃសៅរ៍ថា នេះគឺជាការសិក្សាលើកដំបូង មិនធ្លាប់មានដែលបង្ហាញថា ថនិកសត្វអាចលូតលាស់ នៅក្នុងលំហ ។
សេចក្តីថ្លែងការណ៍បាននិយាយថា វាជាការពិសោធន៍ដំបូង គេរបស់ពិភពលោក ដែលបានបណ្តុះអំប្រ៊ីយ៉ុងថនិកសត្វដំណាក់កាលដំបូង ក្រោមមីក្រូទំនាញពេញលេញនៃ ISS ។ ការស្រាវជ្រាវបែបនេះអាចមានសារសំខាន់ សម្រាប់ការរុករកអវកាស និងបេសកកម្មអាណានិគមនាពេលអនាគត ៕
ដោយ៖លី ភីលីព
