ចិន ៖ កាសែត Wall Street Journal បានរាយការណ៍ ដោយដកស្រង់សម្តីអ្នកប្រើប្រាស់ បណ្តាញឲ្យដឹងថា អ៊ីស្រាអែល មិនអាចត្រូវបានរកឃើញ នៅលើផែនទីឌីជីថលអនឡាញ ឈានមុខគេរបស់ប្រទេសចិន នៅលើវេទិកានានារួមទាំង Baidu និង Alibaba ទៀតឡើយ យោងតាមការចេញ ផ្សាយពីគេហទំព័រ RT ។
យោងតាមរបាយការណ៍ថា ផែនទីជាភាសាចិនរបស់ Baidu នៅតែបង្ហាញព្រំដែនទាំងអ៊ីស្រាអែល និងទឹកដីប៉ាឡេស្ទីន ក៏ដូចជាទីក្រុងសំខាន់ៗក្នុងតំបន់។ ទោះជាយ៉ាងណា ពួកគេលែងកំណត់អត្តសញ្ញាណ អ៊ីស្រាអែល តាមឈ្មោះ ។ យោងតាមរបាយការណ៍ថា Amap របស់ Alibaba ក៏លែងបង្ហាញឈ្មោះ អ៊ីស្រាអែលដែរ។ វេទិកានេះ ជាធម្មតាត្រូវបានគេស្គាល់សម្រាប់ការយកចិត្តទុកដាក់ ចំពោះព័ត៌មានលម្អិត ដោយសូម្បីតែប្រទេសតូចៗ ដូចជាលុចសំបួ បានដាក់ស្លាកយ៉ាងច្បាស់ ។
ក្រុមហ៊ុនទាំងនោះ មិនបានឆ្លើយតបនឹងសំណើ របស់ប្រព័ន្ធផ្សព្វផ្សាយ សម្រាប់ការអត្ថាធិប្បាយទេ ។ យោងតាមការចេញផ្សាយនោះថា វាមិនច្បាស់ទេថា នៅពេលណាពិតប្រាកដដែលឈ្មោះ អ៊ីស្រាអែល ត្រូវបានដក ចេញពីផែនទី របស់ពួកគេ ប៉ុន្តែអ្នកប្រើប្រាស់បណ្តាញ ជាក់ស្តែងបានពិភាក្សា អំពីការអភិវឌ្ឍន៍ ចាប់តាំងពីការកើនឡើង នៃជម្លោះអ៊ីស្រាអែល និង ក្រុមហាម៉ាស់កាលពីដើមខែនេះ ។
យោងតាមរបាយការណ៍ក្នុងស្រុកថា ប្រព័ន្ធអ៊ីនធើណេតចិនបានហក់ឡើងជាមួយនឹងការបញ្ចេញមតិប្រឆាំង នឹងពួកយូដាក្នុងរយៈពេលមួយខែកន្លងមកនេះ អាចជាហេតុផលនៅពីក្រោយការបាត់ឈ្មោះរបស់អ៊ីស្រាអែលពីផែនទី។ ថ្មីៗនេះ ស្ថានទូតអ៊ីស្រាអ៊ែលប្រចាំប្រទេសចិន ត្រូវបានបង្ខំឲ្យបិទផ្នែកមតិយោបល់ ក្រោមគណនីផ្លូវការរបស់ខ្លួន នៅលើវេទិកា Weibo បន្ទាប់ពីមានការវាយប្រហារ ដោយពាក្យសំដីពីអ្នកប្រើប្រាស់ ។
រដ្ឋាភិបាលចិន មិនបានចូលរួមក្នុងជម្លោះមជ្ឈិមបូព៌ាទេ ដោយអំពាវនាវ ឲ្យក្រុមបះបោរបញ្ចប់អរិភាព និងថ្កោលទោសការវាយប្រហារលើជនស៊ីវិល។ យ៉ាងណាមិញ ទីក្រុងប៉េកាំងមានប្រវត្តិជាយូរមកហើយក្នុងការគាំទ្រប៉ាឡេស្ទីន។ វាបានទទួលស្គាល់អង្គការរំដោះប៉ាឡេស្ទីននៅឆ្នាំ ១៩៦៤ និងអធិបតេយ្យភាពប៉ាឡេស្ទីននៅឆ្នាំ ១៩៨៨ ហើយក្រោយមកបានបង្កើតទំនាក់ទំនង ការទូត ពេញលេញជាមួយអាជ្ញាធរប៉ាឡេស្ទីន នៅឆ្នាំ ១៩៨៩។
ក្នុងដំណើរទស្សនកិច្ចទៅកាន់ប្រទេស អារ៉ាប៊ីសាអូឌីត កាលឆ្នាំ ២០២២ ប្រធានាធិបតីចិនលោក Xi Jinping បានហៅការពិតថា សហគមន៍ពិភពលោក ភាគច្រើននៅតែមិនទទួលស្គាល់ប៉ាឡេស្ទីនជាប្រទេសអយុត្តិធម៌ជាប្រវត្តិសាស្ត្រ ហើយបាននិយាយថា ប្រទេសចិននឹងគាំទ្រការបង្កើតរដ្ឋប៉ាឡេស្ទីន ដែលមានទីក្រុង យេរូសាឡឹមខាងកើត ជារដ្ឋធានីរបស់ខ្លួន ៕
ដោយ៖លី ភីលីព
