អាមេរិក៖ កាសែត Mint បានរាយការណ៍ដោយដកស្រង់ការអត្ថាធិប្បាយ លើប្លុកមធ្យមដោយអ្នកវិភាគចិន Ming-Chi Kuo កាលពីដើមសប្តាហ៍នេះថា ក្រុមហ៊ុនបច្ចេកវិទ្យាយក្សអាមេរិក Apple នឹងផលិត iPhone 7 របស់ខ្លួន ត្រូវបានគេរំពឹងថា នឹងចេញលក់នៅឆ្នាំ ២០២៥ ក្នុងប្រទេសឥណ្ឌាជំនួសឲ្យប្រទេសចិន។
លោក Kuo បានសរសេរថា វាជាលើកដំបូងសម្រាប់ Apple ក្នុងការចាប់ផ្តើមបង្កើត iPhone ម៉ូដែលថ្មីនៅខាងក្រៅប្រទេសចិន។ លោកបានកត់សម្គាល់ថា ចំណែក នៃទូរស័ព្ទ iPhone ផលិតនៅប្រទេសឥណ្ឌា អាចកើនឡើងដល់ ២០-២៥ភាគរយនៅឆ្នាំ ២០២៤ ពី ១២-១៤ភាគរយក្នុងឆ្នាំសារពើពន្ធបច្ចុប្បន្នប្រសិនបើអ្វីៗដំណើរការល្អ។
ខណៈឧបករណ៍ទាំងនេះភាគច្រើនត្រូវបានប្រមូលផ្តុំនៅរោងចក្រឥណ្ឌាដែលដំណើរការដោយក្រុមហ៊ុនផលិតកិច្ចសន្យាអេឡិចត្រូនិកពហុជាតិរបស់តៃវ៉ាន់ Foxconn កិច្ចព្រមព្រៀងថ្មីៗនេះរបស់ក្រុមហ៊ុន Apple ជាមួយក្រុមហ៊ុនឥណ្ឌា Tata Group ដើម្បីប្រមូលផ្តុំ iPhone នឹងធ្វើឲ្យក្រុមហ៊ុនយក្សរបស់សហរដ្ឋអាមេរិកពង្រឹងទំនាក់ទំនងរបស់ខ្លួនជាមួយរដ្ឋាភិបាលឥណ្ឌា។
កាលពីដើមឆ្នាំនេះ រដ្ឋមន្ត្រីក្រសួងពាណិជ្ជកម្មឥណ្ឌា លោក Piyush Goyal បាននិយាយថា Apple កំពុងស្វែងរកការបង្កើនចំណែកនៃផលិតផលរបស់ខ្លួនដែលផលិតនៅប្រទេសឥណ្ឌាដល់ ២៥ ភាគរយ នៅឆ្នាំ ២០២៥។
ការប្រកាសរបស់លោក Kuo កើតឡើងមួយសប្តាហ៍បន្ទាប់ពី Tata ជាក្រុមចម្រុះមានទ្រព្យសម្បត្តិរ៉ែ និងដែក ហើយផលិតរថយន្ត អាវុធ និងគ្រឿងអេឡិចត្រូនិច ហើយក៏ជាម្ចាស់ក្រុមហ៊ុនអាកាសចរណ៍ជាតិរបស់ឥណ្ឌា Air India បានប្រកាសថាខ្លួននឹងចាប់ផ្តើមដំឡើង iPhone សម្រាប់ទីផ្សារក្នុងស្រុក និងពិភពលោក។ ក្រុមហ៊ុនបានទិញយកអង្គភាពផលិតក្នុងស្រុករបស់ក្រុមហ៊ុន Wistron Corp មានមូលដ្ឋាននៅតៃវ៉ាន់មួយទៀតក្នុងតម្លៃប្រមាណ ១២៥ លានដុល្លារ៕ ដោយ៖លី ភីលីព
