បរទេស ៖ ទីប្រឹក្សាសន្តិសុខជាតិ សេតវិមានលោក Jake Sullivan បាននិយាយនៅថ្ងៃអាទិត្យ ប៉ុន្មានថ្ងៃមុនប្រធានាធិបតី និងមេដឹកនាំចិន គ្រោងនឹងជួបប្រជុំគ្នាថា ប្រធានាធិបតីសហរដ្ឋអាមេរិកលោក Joe Biden ចង់បង្កើតទំនាក់ទំនងយោធា និងយោធាឡើងវិញជាមួយប្រទេសចិន ។
យោងតាមសារព័ត៌មាន VOA ចេញផ្សាយនៅថ្ងៃទី១២ ខែវិច្ឆិកា ឆ្នាំ២០២៣ បានឱ្យដឹងថា លោក Biden នៅថ្ងៃពុធ នឹងជួបជាមួយប្រធានាធិបតីចិន លោក ស៊ី ជិនពីង ដោយផ្ទាល់ជាលើកដំបូងក្នុងរយៈពេលមួយឆ្នាំ ក្នុងអំឡុងពេលកិច្ចប្រជុំកំពូលកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិកនៅទីក្រុង San Francisco ។ នេះគ្រាន់តែជាជំនួបផ្ទាល់លើកទី២ រវាងមេដឹកនាំទាំងពីរ ចាប់តាំងពីលោក Biden ចូលកាន់តំណែងក្នុងខែមករា ឆ្នាំ២០២១។
លោក Sullivan បាននិយាយ នៅក្នុងបទសម្ភាសន៍មួយជាមួយទូរទស្សន៍ CBS ថា “ប្រធានាធិបតីមានការប្តេជ្ញាចិត្តថា នឹងឃើញពីការបង្កើតឡើងវិញ នូវទំនាក់ទំនងយោធា និងយោធា ពីព្រោះលោកជឿថា វាស្ថិតនៅក្នុងផលប្រយោជន៍សន្តិសុខជាតិ របស់សហរដ្ឋអាមេរិក” ។ “យើងត្រូវការខ្សែ ទំនាក់ទំនងទាំងនោះ ដើម្បីកុំឱ្យមានកំហុស ឬការគណនាខុស ឬទំនាក់ទំនងខុស”។
លោក Sullivan បានបន្តថា ទំនាក់ទំនងយោធា ដែលបានស្តារឡើងវិញ អាចកើតឡើងនៅគ្រប់កម្រិតចាប់ពីថ្នាក់ដឹកនាំជាន់ខ្ពស់ រហូតដល់កម្រិតប្រតិបត្តិការ យុទ្ធសាស្ត្រ ក៏ដូចជា “នៅលើទឹក និងនៅលើអាកាសនៅឥណ្ឌូប៉ាស៊ីហ្វិក”។
លោក Sullivan បាននិយាយជាមួយសារព័ត៌មាន CNN ថាលោក Biden នឹងស្វែងរក “ជំរុញទៅមុខ” លើទំនាក់ទំនងយោធា ក្នុងអំឡុងពេលកិច្ចប្រជុំ របស់លោកជាមួយលោក ស៊ី ជិនពីង ប៉ុន្តែបានបដិសេធ ផ្តល់ព័ត៌មានលម្អិតបន្ថែមនោះទេ។
លោក Sullivan បាននិយាយទៀតថា “ភាគីចិនបានកាត់ផ្តាច់ទំនាក់ទំនងទាំងនេះជាមូលដ្ឋាន។ ប្រធានាធិបតីអាមេរិក លោក Biden ចង់បង្កើតវាឡើងវិញ” , “នេះជាធាតុរបៀបវារៈកំពូល។
ជំនួបរវាងលោក Biden និងលោក ស៊ី ត្រូវបានគេរំពឹងថា នឹងគ្របដណ្តប់លើបញ្ហាសកល ពីសង្គ្រាមអ៊ីស្រាអែល-ហាម៉ាស ដល់ការឈ្លានពាន របស់រុស្ស៊ីនៅអ៊ុយក្រែន ទំនាក់ទំនងរបស់កូរ៉េខាងជើងជាមួយរុស្ស៊ី, បញ្ហាកោះតៃវ៉ាន់, ឥណ្ឌូប៉ាស៊ីហ្វិក , សិទ្ធិមនុស្ស, ការផលិត fentanyl , បញ្ញាសិប្បនិម្មិត ក៏ដូចជា “យុត្តិធម៌ ពាណិជ្ជកម្ម និងសេដ្ឋកិច្ច ៕
ប្រែសម្រួលៈ ណៃ តុលា
