បារាំង នឹងអនុវត្តការត្រួតពិនិត្យភោជនីយដ្ឋាន និងសណ្ឋាគារ ១០,០០០កន្លែង មុនពេលការប្រកួតនៅទីក្រុងប៉ារីស ជៀសវាងការឡើងថ្លៃ

ប៉ារីស៖ យោងតាមការចេញផ្សាយពីគេហទំព័រជប៉ុនធូដេ បានប្រាប់ឲ្យដឹងថា អាជ្ញាធរបារាំងនឹងអនុវត្តការត្រួតពិនិត្យនៅសណ្ឋាគារ និងភោជនីយដ្ឋានចំនួន ១០,០០០ កន្លែង នៅទូទាំងប្រទេសបារាំង មុនព្រឹត្តិការណ៍កីឡាអូឡាំពិកទីក្រុងប៉ារីសនៅឆ្នាំក្រោយ ដើម្បីកំណត់ការឡើងថ្លៃដ៏ច្រើនដែលរំពឹងទុកក្នុងអំឡុងពេលការប្រកួតចាប់ផ្តើម។

រដ្ឋមន្ត្រីក្រសួងទេសចរណ៍ លោក Olivia Gregoire បាននិយាយកាលពីថ្ងៃពុធថា សណ្ឋាគារទាំង ១៦០០ មានទីតាំងក្នុងរដ្ឋធានីរបស់ប្រទេសបារាំង នឹងត្រូវបានត្រួតពិនិត្យដោយភ្នាក់ងារត្រួតពិនិត្យការក្លែងបន្លំរបស់បារាំងនៅរដូវក្តៅនេះ។ 2024 Paris Games នឹងដំណើរការចាប់ពីថ្ងៃទី ២៦ ខែកក្កដាដល់ថ្ងៃទី១១ ខែសីហា ប៉ារ៉ាឡាំពិក “Paralympics”នឹងប្រព្រឹត្តទៅចាប់ពីថ្ងៃទី ២៨ ខែសីហាដល់ថ្ងៃទី៨ ខែកញ្ញា។

ប្រព័ន្ធផ្សព្វផ្សាយបារាំងបានរាយការណ៍កាលពីខែមុនថា ការិយាល័យទេសចរណ៍ទីក្រុងប៉ារីសបានមើលឃើញការកើនឡើងយ៉ាងខ្លាំងនៃអត្រាសណ្ឋាគារ ៣១៤ ភាគរយក្នុងអំឡុងពេលនៃព្រឹត្តិការណ៍កីឡាអូឡាំពិក និងប៉ារ៉ាឡាំពិក ជាមួយនឹងតម្លៃជាមធ្យមនៃការស្នាក់នៅមួយយប់ក្នុងតំបន់ប៉ារីសកើនឡើងពី ១៦៩ អឺរ៉ូ (១៨២ ដុល្លារ)នៅខែកក្កដា ឆ្នាំ ២០២៣ ដល់ ៦៩៩ អឺរ៉ូ (៧៥៥) ក្នុងមួយឆ្នាំក្រោយមក។

ប្រទេសបារាំង អត្រាតម្លៃសណ្ឋាគារត្រូវបានកំណត់ដោយសេរី ហើយនឹងមិនត្រូវបានកំណត់ក្នុងអំឡុងពេលហ្គេម ប៉ុន្តែអាជ្ញាធរបារាំងសង្ឃឹមថា ការត្រួតពិនិត្យនឹងរក្សាតម្លៃក្នុងការត្រួតពិនិត្យ។ ថ្លែងទៅកាន់វិទ្យុ Sud លោកស្រី Gregoire បាននិយាយថា ម្ចាស់អាជីវកម្មអាចត្រូវបានដាក់ទណ្ឌកម្មយ៉ាងខ្លាំង ប្រសិនបើពួកគេត្រូវបានរកឃើញថាបំពានលើបទប្បញ្ញត្តិ។ លោកស្រីបានបន្តថា តម្លៃបន្ទប់នឹងត្រូវបង្ហាញឲ្យបានត្រឹមត្រូវ ហើយតម្លៃដែលអ្នកប្រើបានបង់មិនអាចលើសពីតម្លៃដែលបានផ្សាយនោះទេ។

សេចក្តីថ្លែងការណ៍ដាច់ដោយឡែកមួយ ទីភ្នាក់ងារត្រួតពិនិត្យការក្លែងបន្លំបាននិយាយថា ការត្រួតពិនិត្យនឹងកំណត់គោលដៅលើសណ្ឋាគារ ការជួលគ្រឿងសង្ហារឹម កន្លែងបោះជំរុំ ភោជនីយដ្ឋាន ហាងកាហ្វេ និងរថយន្តដឹកអាហារ។ ទីភ្នាក់ងារនេះបានបន្តថា សណ្ឋាគារ និងរមណីយដ្ឋានវិស្សមកាលជាង ១៧០០ រួមទាំង ៦០០ នៅទីក្រុងប៉ារីស ត្រូវបានត្រួតពិនិត្យរួចហើយនៅឆ្នាំ ២០២៣៕ ដោយ៖លី ភីលីព