បរទេស៖ ក្រុមអ្នកយកព័ត៌មាន Reuters កាលពីថ្ងៃម្សិលមិញនេះរាយការណ៍ថា ប្រធានាធិបតីអាមេរិកលោក Joe Biden កំពុងជំរុញដោយស្ងាត់ៗសមាជិកសភាឱ្យយល់ព្រមលើការលក់គ្រាប់កាំភ្លើងសម្រាប់រថក្រោះចំនួន ៤៥០០០ គ្រាប់ទៅឱ្យអ៊ីស្រាអែល ដោយកត់សម្គាល់ថា កិច្ចព្រមព្រៀងនេះកំពុងប្រឈមមុខនឹងការត្រួតពិនិត្យចំពេលមានការព្រួយបារម្ភកាន់តែខ្លាំងឡើងអំពីការបាត់បង់ជីវិតជនស៊ីវិលនៅក្នុងតំបន់ហ្គាហ្សា។
កញ្ចប់អាវុធនេះមានតម្លៃជាង៥០០លានដុល្លារហើយប្រសិនបើជោគជ័យស្តុកទុកឃ្លាំងអាវុធ ១២០មីលីម៉ែត្ររបស់អ៊ីស្រាអែលនឹងត្រូវមានអាវុធប្រើប្រាស់ឡើងវិញ។គ្រាប់កាំភ្លើងទាំងនេះគឺត្រូវបានប្រើប្រាស់ដោយរថក្រោះប្រយុទ្ធដ៏សំខាន់ Merkava នេះបើយោងតាមប្រភពមិនបញ្ចេញឈ្មោះចំនួន៤បានប្រាប់បន្ថែមកាលពីថ្ងៃសុក្រ។
គួរឲ្យដឹងដែរថាសភាជាតិអាមេរិកត្រូវតែអនុញ្ញាតការលក់នេះ ប៉ុន្តែបច្ចុប្បន្នសមាជិកសភាមួយចំនួននៅតែមានការសង្ស័យនិងមិនទាន់សម្រេចយល់ព្រមលើកិច្ចព្រមព្រៀងនេះនៅឡើយទេ។
ទោះបីជាយ៉ាងណាក៏ដោយ លោក Biden ត្រូវបានគេរាយការណ៍ថាកំពុងពិចារណាលើការឆ្លងកាត់សមាជិកសភាទាំងអស់គ្នា ដើម្បីឆ្ពោះទៅមុខលើការលក់គ្រាប់កាំភ្លើងសម្រាប់រថក្រោះចំនួន ១៣០០០គ្រាប់ខណៈដែលអាជ្ញាធរគ្រាអាសន្នក្រោមច្បាប់គ្រប់គ្រងការនាំចេញអាវុធនឹងអនុញ្ញាតឱ្យគាត់សម្រេចចិត្តដោយមិនចាំបាច់ការពិនិត្យឡើងវិញរបស់សភាឡើយ៕ ប្រែសម្រួល៖ស៊ុនលី
