ចិន ៖ អ្នកជំនាញឧស្សាហកម្ម បាននិយាយ កាលពីថ្ងៃអង្គារ ដល់ក្រុមហ៊ុនពហុជាតិថា ការពិភាក្សា បានរាយការណ៍ រវាងអាជ្ញាធរ នៅសហរដ្ឋអាមេរិក និង ក្រុមហ៊ុន Nvidia Corp ស្តីពីការលក់បន្ទះឈីបបញ្ញា សិប្បនិមិត្ត ទៅប្រទេសចិនបង្ហាញថា ប្រទេសជាតិជាទីផ្សារដ៏សំខាន់ សម្រាប់ការរីកចម្រើន នៃក្រុមហ៊ុនបច្ចេកវិទ្យាយក្ស របស់អាមេរិកមួយចំនួន ហើយការគ្រប់គ្រងដែលជំរុញ ដោយនយោបាយ ដោយសហរដ្ឋអាមេរិក នឹងធ្វើឲ្យមានការខាត បង់យ៉ាងច្រើន យោងតាមការចេញផ្សាយ ពីគេហទំព័រឆៃណាឌៀលី បានប្រាប់ឲ្យដឹងថា ។
ការអត្ថាធិប្បាយនេះកើតឡើង បន្ទាប់ពី Reuters បានដកស្រង់សម្តីរដ្ឋមន្ត្រីក្រសួងពាណិជ្ជកម្មអាមេរិក លោកស្រី Gina Raimondo បាននិយាយថា ក្រុមហ៊ុន Nvidia អាចមានឆន្ទៈ និងគួរតែលក់បន្ទះឈីប AI ទៅប្រទេសចិន ប៉ុន្តែមិនមែនជារបស់ទំនើបបំផុតនោះទេ ។ កាលពីមួយសប្តាហ៍មុន លោកស្រី Raimondo បានព្រមានក្រុមហ៊ុនផលិត បន្ទះឈីបរួមទាំង Nvidia នៅក្នុងវេទិកាមួយ ។
លោកស្រី បានបន្តថា ប្រសិនបើក្រុមហ៊ុន ណាមួយព្យាយាមគេចពីច្បាប់ នាំចេញរបស់សហរដ្ឋអាមេរិក ដោយការរចនាបន្ទះឈីបឡើងវិញអាចឲ្យប្រទេសចិនមានជំហានក្នុង AI នាងនឹងហាមឃាត់បន្ទះឈីបថ្មីនៅថ្ងៃបន្ទាប់ ។
លោក Xiang Ligang អគ្គនាយកនៃសម្ព័ន្ធព័ត៌មានអ្នកប្រើប្រាស់ជាសមាគមឧស្សាហកម្មទូរគមនាគមន៍នៅទីក្រុងប៉េកាំង បាននិយាយថា ការកត់សម្គាល់ចុងក្រោយ របស់ Raimondo ឆ្លុះបញ្ចាំងពីសារសំខាន់ នៃទីផ្សារចិន ចំពោះភាពជោគជ័យ របស់ក្រុមហ៊ុនបច្ចេកវិទ្យាយក្ស របស់សហរដ្ឋអាមេរិក។ លោក Xiang បានបន្តថា ទោះបីជារដ្ឋាភិបាលសហរដ្ឋអាមេរិក ចង់ដាក់កម្រិតលើការនាំចេញបន្ទះឈីប AI ទៅកាន់ប្រទេសចិនក៏ដោយ ក៏ខ្លួនត្រូវតែគិតគូរ ពីផលប្រយោជន៍ របស់ក្រុមហ៊ុនអាមេរិក ។
ដោយលើកឡើងពីទំហំដ៏ធំនៃ ទីផ្សារបន្ទះឈីបរបស់ចិន លោកបាននិយាយថា គ្មានអាជីវកម្មណាមាន ឆន្ទៈលះបង់ផលប្រយោជន៍ និងធ្វើឲ្យមានការខាតបង់ផ្នែកហិរញ្ញវត្ថុ សម្រាប់ហេតុផលនយោបាយលម្អៀងនោះទេ។ ការពិតគឺថាការគ្រប់គ្រងដោយហេតុផល នយោបាយរបស់សហរដ្ឋអាមេរិក ក៏បានជំរុញឲ្យក្រុមហ៊ុនបច្ចេកវិទ្យា និងអ៊ីនធឺណិតរបស់ចិន ស្តុកទុកបន្ទះឈីប AI ជាច្រើនប្រភេទជាជាងផលិតផលរបស់ក្រុមហ៊ុនផលិតតែមួយ ហើយក្រុមហ៊ុនជាច្រើន ក៏កំពុងពន្លឿនការអភិវឌ្ឍន៍បន្ទះឈីប ផ្ទាល់ខ្លួនរបស់ពួកគេផងដែរ ដើម្បីជៀសវាងហានិភ័យ ដែលអាចកើតមាន។ នាពេលអនាគត” លោកបានបន្ថែម ។
នៅពេលត្រូវបានសួរថា តើក្រសួងពាណិជ្ជកម្មនឹងឆ្លើយ តបយ៉ាងដូចម្តេច ចំពោះរបកគំហើញ នៃការបង្កើតបន្ទះឈីប នាពេលថ្មីៗនេះក្នុងប្រទេសចិន លោកស្រី Raimondo បាននិយាយថា សហរដ្ឋអាមេរិកនឹងចាត់វិធានការ ខ្លាំងបំផុតអាចធ្វើទៅបាន ដើម្បីការពារសន្តិសុខជាតិរបស់ខ្លួន ។
អ្នកនាំពាក្យក្រសួងការបរទេសលោកស្រី Mao Ning បាននិយាយនៅក្នុងសន្និសីទ សារព័ត៌មានកាលពីថ្ងៃអង្គារថា ប្រទេសចិនប្រឆាំងដាច់ខាត ចំពោះការរំលោភលើវិធានការត្រួតពិនិត្យការនាំចេញ របស់សហរដ្ឋអាមេរិក បានធ្វើឲ្យខូចខាតយ៉ាងធ្ងន់ធ្ងរដល់សិទ្ធិ និងផលប្រយោជន៍ស្របច្បាប់ របស់ក្រុមហ៊ុនចិន ៕
ដោយ៖លី ភីលីព
