OTTAWA ៖ នាយករដ្ឋមន្រ្តី Justin Trudeau បានមានប្រសាសន៍ថា Ottawa នឹងបន្តជំរុញឲ្យ Meta គោរពតាមច្បាប់ថ្មី ដែលតម្រូវឲ្យក្រុមហ៊ុនអ៊ីនធើណេតធំៗ បង់ប្រាក់ឲ្យអ្នកផ្សាយ ព័ត៌មានកាណាដា សម្រាប់មាតិការបស់ពួកគេ ប៉ុន្តែមេរបស់ Facebook បានឈរដោយការសម្រេចចិត្ត របស់ខ្លួនក្នុងការទប់ស្កាត់ ការចែករម្លែកព័ត៌មាន ជាជាងបង់ប្រាក់ យោងតាមការចេញផ្សាយ ពីគេហទំព័រជប៉ុនធូដេ ។
រដ្ឋាភិបាលកាលពីថ្ងៃសុក្រ បានចេញផ្សាយបទប្បញ្ញត្តិ ចុងក្រោយ សម្រាប់ច្បាប់ ព័ត៌មានអនឡាញ មុនពេលការអនុវត្ត ចាប់ផ្តើមនៅថ្ងៃអង្គារ។ ច្បាប់នេះតម្រូវឲ្យក្រុមហ៊ុនបច្ចេកវិទ្យាមានអ្នកប្រើប្រាស់ប្រចាំខែពិសេសចំនួន ២០ លាននាក់ និងប្រាក់ចំណូល ប្រចាំឆ្នាំចំនួន ៧៤៨ លានដុល្លារ ឬច្រើនជាងនេះ ដើម្បីទូទាត់សងដល់សារព័ត៌មាន កាណាដាសម្រាប់ការចេញ ផ្សាយភ្ជាប់ទៅកាន់ទំព័ររបស់ពួកគេ ។
Google និង Meta របស់ Alphabet គឺជាវេទិកាតែមួយគត់ស្ថិតនៅក្រោមលក្ខណៈវិនិច្ឆ័យទាំងនោះ ក្នុងប្រទេសកាណាដា។ Google បានយល់ព្រមកាល ពីខែមុនដើម្បីបង់ប្រាក់ចំនួន ១០០ លានដុល្លារ កាដាណា ជារៀងរាល់ឆ្នាំដល់អ្នកចេញ ផ្សាយព័ត៌មាននៅប្រទេស។ ផ្ទុយទៅវិញ Meta បានសម្រេចចិត្តបិទព័ត៌មាននៅលើ Facebook និង Instagram ក្នុងប្រទេសកាណាដា ដើម្បីជៀសវាងការបង់ប្រាក់។
លោក Trudeau បានប្រាប់អ្នកយកព័ត៌មាននៅទីក្រុង Vancouver ថា យើងនឹងបន្តជំរុញឲ្យ Meta ដែលរកបានប្រាក់ចំណេញរាប់ពាន់លានដុល្លារ ទោះបីជាវាបដិសេធក្នុងការវិនិយោគលើភាពតឹងរ៉ឹងផ្នែកសារព័ត៌មាន និងស្ថិរភាពនៃប្រព័ន្ធផ្សព្វផ្សាយក៏ដោយ ។
Meta បាននិយាយថា វានឹងប្រកាន់ខ្ជាប់ នូវការសម្រេចចិត្តរបស់ខ្លួន។ Rachel Curran ប្រធានគោលនយោបាយ សាធារណៈសម្រាប់ Meta Canada បាននិយាយថា បណ្តាញសារព័ត៌មានជ្រើស រើសប្រើប្រាស់សេវាកម្មឥតគិត ថ្លៃរបស់យើង ព្រោះវាជួយដល់ចំណុចសំខាន់របស់ពួកគេ ហើយការចេញ ផ្សាយបទប្បញ្ញត្តិ ចុងក្រោយនៅថ្ងៃនេះ មិនផ្លាស់ប្តូរ ការសម្រេចចិត្តអាជីវកម្មរបស់យើងទេ ។
ច្បាប់ដែលជាផ្នែកមួយ នៃនិន្នាការសកល ត្រូវបានរៀបចំឡើងដើម្បី ដោះស្រាយកង្វល់ឧស្សាហកម្ម ប្រព័ន្ធផ្សព្វផ្សាយ កាណាដាអំពីការធ្លាក់ចុះប្រាក់ចំណូល នៅពេលដែលក្រុមហ៊ុនអ៊ីនធើណេត ដកអាជីវកម្មព័ត៌មានចេញ ពីទីផ្សារផ្សាយពាណិជ្ជកម្មតាមអ៊ីនធឺណិត ។
Meta បានចាប់ផ្តើមបិទការចែករម្លែកព័ត៌មាននៅលើ Facebook និង Instagram ក្នុងខែសីហា ដោយនិយាយថា ព័ត៌មានមិនមានតម្លៃសេដ្ឋកិច្ចសម្រាប់អាជីវកម្មរបស់ខ្លួន។ រដ្ឋមន្ត្រីបេតិកភណ្ឌ Pascale St-Onge បាននិយាយថា គណៈកម្មការវិទ្យុ-ទូរទស្សន៍ និងទូរគមនាគមន៍កាណាដា (CRTC) នឹង យកចិត្តទុកដាក់លើ Facebook និង Meta ជាផ្នែកនៃការអនុវត្តរបស់ខ្លួន។
លោក Paul Deegan នាយកប្រតិបត្តិ នៃស្ថាប័នឧស្សាហកម្ម News Media Canada បាននិយាយថា រដ្ឋាភិបាលបានផ្តល់ នូវក្របខ័ណ្ឌ ឈានមុខគេពិភពលោកដ៏យូរអង្វែង ដែលមានតុល្យភាព និងអាចព្យាករណ៍ បានសម្រាប់អ្នកបោះពុម្ពផ្សាយព័ត៌មាន និងវេទិកានានា ហើយបានអំពាវនាវឲ្យ Meta ធ្វើតាមការដឹកនាំរបស់ Google ៕
ដោយ៖លី ភីលីព
