អាមេរិក ៖ របាយការណ៍ថ្មីរបស់ NBC News បានអះអាងថា មន្ត្រីមកពីរដ្ឋបាលរបស់ប្រធានាធិបតីអាមេរិក លោក Joe Biden ដំបូងឡើយសង្ឃឹមថានឹងលាក់បាំង ឧប្បត្តិហេតុប៉ាឡុង របស់ប្រទេសចិន នៅដើមឆ្នាំនេះពីសាធារណជន និងសូម្បីតែសភា ខណៈមន្ត្រីបារម្ភថា រឿងនេះអាចបង្កឲ្យមានការ តវ៉ាជាសាធារណៈ និងបំផ្លាញទំនាក់ទំនងជាមួយចិន យោងតាមការចេញ ផ្សាយពីគេហទំព័រ RT ។
កាលពីដើមខែកុម្ភៈ សហរដ្ឋអាមេរិកបានបាញ់ ទម្លាក់នូវអ្វីដែលខ្លួនបានពិពណ៌នាថា ជាប៉ាឡុងចារកម្ម សង្ស័យថា ជាប៉ាឡុងចារកម្មរបស់ចិននៅឆ្នេរសមុទ្រនៃរដ្ឋ South Carolina ដោយអះអាងថា ទីក្រុងប៉េកាំងកំពុងប្រើប្រាស់ វាដើម្បីឃ្លាំមើលទីតាំង យុទ្ធសាស្ត្រក្នុងប្រទេស ។ ទោះយ៉ាងណាក៏ដោយ ក្រោយមក មន្ទីរបញ្ចកោណបានសារភាពថា កប៉ាល់នេះមិនបានប្រមូលព័ត៌មានសម្ងាត់ទេ ។
ប្រទេសចិនបានពណ៌នាប៉ាឡុងនេះថា ជានាវាអាកាសស៊ីវិលដែលបានវង្វេងចូលទៅក្នុងដែនអាកាសរបស់សហរដ្ឋអាមេរិក ដោយសារតែកាលៈទេសៈដ៏ធ្ងន់ធ្ងរ នៅពេលនោះ ខណៈប្រព័ន្ធផ្សព្វផ្សាយ អាមេរិក បានសង្កត់ធ្ងន់ទៅលើការ ឈ្លានពានរបស់ចិន ឧបទ្ទវហេតុនេះបាននាំឲ្យមានភាពតានតឹង យ៉ាងខ្លាំង នៅក្នុងទំនាក់ទំនងរវាងទីក្រុងប៉េកាំង និងទីក្រុងវ៉ាស៊ីនតោន ។
យោងតាមអត្ថបទ របស់ NBC បានចេញ ផ្សាយកាលពីថ្ងៃសុក្រថា មេបញ្ជាការកងទ័ពអាកាស ទទួលបន្ទុកដែន អាកាសអាមេរិក ឧត្តមសេនីយ៍ Glen VanHerck បានប្រាប់ទីប្រឹក្សាយោធាកំពូលរបស់លោក Biden គឺឧត្តមសេនីយ Mark Milley នៅថ្ងៃទី ២៧ ខែមករាថា អស់រយៈពេលប្រហែល១០ថ្ងៃហើយ ដែលពួកគេបាន តាមដានវត្ថុអាថ៌កំបាំង មួយដែលកំពុងហោះហើរជុំវិញ អាស៊ីប៉ាស៊ីហ្វិក ។ សម្រាប់ការហៅទូរសព្ទដែលមិនបានរាយការណ៍ពីមុនមក លោក VanHerck បាននិយាយថា មន្ទីរបញ្ចកោណគ្រោងនឹងបញ្ជូន យន្តហោះយោធាអាមេរិក ដើម្បីវាយតម្លៃវត្ថុនោះ ។
យោងតាម NBC ថា លោក Biden មិនត្រូវបានគេរាយការណ៍ សង្ខេបអំពីប៉ាឡុង រហូតដល់ថ្ងៃទី ៣១ ខែមករា បន្ទាប់មកលោកបានស្នើឲ្យយោធាបង្កើតផែនការសម្រាប់វិធីដោះស្រាយវា។ កាលពីថ្ងៃទី ១ ខែកុម្ភៈ ខណៈប៉ាឡុងកំពុង ហោះហើរលើទឹកដី សហរដ្ឋអាមេរិក NBC News បានស្នើសុំការអត្ថាធិប្បាយពីសេតវិមាន ហើយមាន តែពេលនោះទេ ទើបក្រុមមន្ត្រីរៀបចំការ សង្ខេប សម្រាប់សមាជិកសភា ដោយមានការដឹង ជាសាធារណៈអំពីឧបទ្ទវហេតុនេះ មួយថ្ងៃក្រោយមក ៕
ដោយ៖លី ភីលីព
