ចិន ៖ យោងតាមរដ្ឋបាលអវកាសជាតិចិនបានឲ្យដឹងថា ផ្កាយរណបរបស់ប្រទេស ដែលបានបញ្ជូនបន្តដ៏សំខាន់សម្រាប់បេសកកម្មភពព្រះច័ន្ទ Chang’e 6 នាពេលខាងមុខ និងកម្មវិធីរុករកនៅលើភពព្រះច័ន្ទផ្សេងទៀតគ្រោងនឹងបាញ់បង្ហោះ ក្នុងរយៈពេលប៉ុន្មានថ្ងៃខាងមុខនេះ ។
ការរួមបញ្ចូលគ្នានៃផ្កាយរណប បញ្ជូនត Queqiao 2 ឬ Magpie Bridge 2 និងរ៉ុក្កែត Long March 8 ដែលមានភារកិច្ចលើកផ្កាយរណប ត្រូវបានផ្លាស់ប្តូរនៅព្រឹក ថ្ងៃអាទិត្យទៅកាន់ប៉មបាញ់បង្ហោះនៅមជ្ឈមណ្ឌលបាញ់បង្ហោះអវកាស Wenchang ខេត្ត Hainan ។
រដ្ឋបាលអវកាសបាននិយាយក្នុងសេចក្តីប្រកាសព័ត៌មានមួយថា ផ្កាយរណប និងរ៉ុក្កែតត្រូវបានដឹកជញ្ជូន ជាលក្ខណៈបុគ្គលកាលខែកុម្ភៈ ទៅកាន់មជ្ឈមណ្ឌល Wenchang ជាកន្លែងដែលពួកគេត្រូវបានពិនិត្យ និងប្រមូលផ្តុំ ។ គ្រាប់រ៉ុក្កែតនឹងឆ្លងកាត់ការត្រួតពិនិត្យចុងក្រោយ មុនពេលដែលឧបករណ៍ជំរុញត្រូវបានផ្ទុក វាបានកត់សម្គាល់ថា ការបាញ់បង្ហោះនឹងធ្វើឡើងក្នុងពេលកំណត់ ។
Queqiao 1 ជាជំនាន់មុនរបស់ Queqiao 2 ត្រូវបានលើកដោយរ៉ុក្កែត Long March 4C ពីមជ្ឈមណ្ឌលបង្ហោះផ្កាយរណប Xichang ខេត្ត Sichuan កាលខែឧសភា ឆ្នាំ ២០១៨ ហើយបច្ចុប្បន្ននេះ វាបម្រើជាវេទិកាបញ្ជូនបន្តសម្រាប់បេសកកម្ម Chang’e 4 នៅភពព្រះច័ន្ទ ។
យាន Chang’e 4 បានចុះចតនៅអាង South Pole-Aitken Basin នៅផ្នែកឆ្ងាយនៃព្រះច័ន្ទកាលខែមករា ឆ្នាំ២០១៩ បានក្លាយជាយានអវកាសដំបូងគេ ដែលត្រូវបានដំណើរការនៅលើ ពាក់កណ្តាលត្រូវគេស្គាល់តិចតួច ។
ប្រសិនបើអ្វីៗដំណើរការទៅតាមផែនការ យាន Chang’e 6 នឹងត្រូវបាញ់បង្ហោះនៅឆមាសទីមួយនៃឆ្នាំនេះ ហើយនឹងក្លាយជាយានអវកាសទី២ ទៅដល់ផ្នែកឆ្ងាយរបស់ព្រះច័ន្ទ។ វាមានភារកិច្ចដើម្បីយកគំរូពីខាងព្រះច័ន្ទមកវិញ ជាកិច្ចការដែលមានការលំបាក ស្មុគស្មាញ និងមិនធ្លាប់ធ្វើពីមុនមក។ សេវាកម្មទំនាក់ទំនងរវាងយានអវកាស Chang’e 4 និង Chang’e 6 និងផែនដី ត្រូវការផ្កាយរណបបញ្ជូនបន្ត ដោយសារទីតាំងពិសេសរបស់វា។ ដូច្នេះការបញ្ជូនសញ្ញាគឺជាភារកិច្ចចម្បងរបស់ Queqiao 1 និង 2 ។
លោក Pang Zhihao អ្នកជំនាញផ្នែកបច្ចេកវិទ្យារុករកអវកាស ធ្វើការនៅបណ្ឌិត្យសភាបច្ចេកវិទ្យាអវកាសចិនអស់ជាច្រើនទសវត្សរ៍ បាននិយាយថា ការពិតដែលថា Queqiao 2 នឹងត្រូវដឹកជញ្ជូនដោយប្រើរ៉ុក្កែត Long March 8 បង្ហាញថា ផ្កាយរណបបញ្ជូនតនេះមានទំហំធំ និងធ្ងន់ជាងជំនាន់មុនរបស់វា។
លោកបាននិយាយថា តាមដែលខ្ញុំយល់ យាន Queqiao 2 ត្រូវបានរចនាឡើងដើម្បីឲ្យមានមុខងារកាន់តែច្រើន និងអាយុវែងជាងមុន។ វានឹងក្លាយជាគន្លឹះនៃបេសកកម្មភពព្រះច័ន្ទជាច្រើនលើកក្រោយរបស់ប្រទេសចិន៕
ដោយ៖លី ភីលីព
