បរទេស៖ ប្រធានគោលនយោបាយការបរទេស របស់ប្លុក (អឺរ៉ុប) លោក Josep Borrell បាននិយាយថា សហភាពអឺរ៉ុបគួរតែរឹងមាំក្នុងការធានាថា ជម្លោះយោធាមិនផ្ទុះឡើងលើកោះតៃវ៉ាន់ ដែលវាចាត់ទុកថាជាផ្នែកមួយនៃ “ប្រទេសចិនតែមួយ” ឡើយ។
យោងតាមសារព័ត៌មាន RT ចេញផ្សាយកាលពីថ្ងៃទី១៧ ខែឧសភា ឆ្នាំ២០២៤ បានឱ្យដឹងថា ភាពតានតឹងជុំវិញកោះដែលគ្រប់គ្រងដោយខ្លួនឯង ដែលទីក្រុងប៉េកាំងចាត់ទុកថា ជាផ្នែកដែលមិនអាចកាត់ផ្តាច់បានរបស់ប្រទេសចិន គឺបានកំពុងកើនឡើង ខណៈដែលសហរដ្ឋអាមេរិក រក្សាទំនាក់ទំនងក្រៅផ្លូវការជាមួយរដ្ឋាភិបាលតៃវ៉ាន់ និងផ្គត់ផ្គង់កោះនេះជាមួយនឹងអាវុធការពារ។
ថ្លែងទៅកាន់ទស្សនាវដ្ដី Foreign Policy ក្នុងអំឡុងពេលធ្វើដំណើរទៅកាន់រដ្ឋកាលីហ្វ័រញ៉ាក្នុងសប្តាហ៍នេះ ដើម្បីជួបមេដឹកនាំបច្ចេកវិទ្យា និងមន្ត្រីរដ្ឋ លោក Borrell បាននិយាយអំពីបញ្ហាមួយចំនួន រួមទាំងបទប្បញ្ញត្តិបច្ចេកវិទ្យា ទំនាក់ទំនង EU-អាមេរិក ប្រទេសចិន និងជម្លោះភូមិសាស្ត្រនយោបាយ ក៏ដូចជាជំហររបស់ EU ស្តីពី កោះតៃវ៉ាន់ និងជម្លោះយោធាដ៏មានសក្តានុពល។
លោក Borrell បានប្រាប់អ្នកសារព័ត៌មានថា “យើងបន្តនិយាយដូចគ្នា៖ យើងជឿថា យើងត្រូវកាត់បន្ថយភាពតានតឹង យើងត្រូវគោរពលក្ខន្តិកៈនៃសង្រ្គាម ហើយយើងត្រូវតែដកចេញនូវលទ្ធភាពនៃដំណោះស្រាយយោធាចំពោះបញ្ហា”។
លោកបន្តថា “ជំហរថេររបស់យើង គឺយើងមិនទទួលស្គាល់ភាពជារដ្ឋរបស់កោះតៃវ៉ាន់ ហើយយើងនឹងមិនធ្វើវានោះទេ។ វា (តៃវ៉ាន់) ជាប្រទេសចិនតែមួយ។ វាមានន័យថា យើងនឹងមិនទទួលស្គាល់ភាពជារដ្ឋរបស់តៃវ៉ាន់ទេ។ យើងនឹងមានទំនាក់ទំនងសេដ្ឋកិច្ច និងវប្បធម៌ជាមួយនឹងទឹកដីនេះដោយមិនមានការទទួលស្គាល់ពីភាពជារដ្ឋ»។
លោកបានបន្ថែមថា សហភាពអឺរ៉ុបអំពាវនាវឲ្យគ្រប់ប្រទេសទាំងអស់ «យល់ថាគ្មានដំណោះស្រាយយោធាចំពោះបញ្ហានេះទេ»៕
ប្រែសម្រួលៈ ណៃ តុលា
