ប៉ារីស ៖ មន្ត្រីទីក្រុងក្នុង តំបន់ បាននិយាយថា ទឹកស្អុយប្រហែល ៥០,០០០ ម៉ែត្រគូបហូរក្នុងទន្លេ Seine ក្នុងរយៈពេល ប៉ុន្មានសប្តាហ៍ កន្លងមកនេះ ។ ហេតុការណ៍នេះ បានកើតឡើងតែ ២ ខែមុនពេលចាប់ផ្តើម នៃកីឡាអូឡាំពិករដូវក្តៅ នៅពេលអាជ្ញាធរបារាំងមានគម្រោង រៀបចំប្រកួតកីឡា ទ្រីយ៉ាត្លុងនៅទន្លេនេះ ។
អភិបាលក្រុង Laurent Brosse បានប្រាប់ La Gazette du Val d’Oise កាលពីថ្ងៃពុធថា មានដំណើរការខុស ប្រក្រតីដ៏ធំមួយ ក្នុងបណ្តាញដែលចែកចាយទឹកសំណល់ពី Conflans-Sainte-Honorine ទៅកាន់រោងចក្រប្រព្រឹត្តិកម្ម ។ ម៉ាស៊ីនបូមចំនួន ៣3 នៅជាយក្រុងមួយនៅភាគពាយព្យនៃទីក្រុងប៉ារីសបានឈប់ដំណើរការដោយសារការដាច់ចរន្តអគ្គិសនី ហើយម៉ាស៊ីនបូមបណ្តោះអាសន្ន ត្រូវបានដំឡើង ។
យោងតាមរដ្ឋបាល នៃតំបន់ Grand Paris Seine et Oise បានឲ្យដឹងថា ទឹកសំណល់ប្រមាណ ៥០,០០០ ម៉ែត្រគូបត្រូវបាន បញ្ចេញទៅក្នុងទន្លេដែលជាលទ្ធផល នៃឧប្បត្តិហេតុនេះ ។ មន្ត្រីបាននិយាយថា ការបង្ហូរទឹកកខ្វក់ចេញ ពីប្រព័ន្ធបូមទឹកដែល ខូចត្រូវបានបញ្ឈប់ ។
ក្រុមមន្ត្រីជឿជាក់ថា ជាពិសេសភ្លៀ ងធ្លាក់ខ្លាំងក្នុងរដូវវស្សាបានបង្កការខូចខាតដល់ឧបករណ៍។ អ្នកស្រុកបានចូលបណ្តាញ សង្គមដើម្បីត្អូញត្អែរអំពីក្លិនស្អុយចេញពីទន្លេ ហើយបានរាយការណ៍ថា ឃើញក្រដាសអនាម័យ និងក្រដាសជូតមាត់ អណ្តែតក្នុងទឹក។ វីដេអូផ្សព្វផ្សាយ នៅលើ X (អតីត Twitter) បង្ហាញពីទឹកត្នោតហូរចូលទៅក្នុងទន្លេ ។ អាជ្ញាធរទីក្រុងប៉ារីសបានបណ្តាក់ទុនចំនួន 1.4 ពាន់លានអឺរ៉ូ (1.5 ពាន់លានដុល្លារ) ក្នុងការជួសជុលហេដ្ឋារចនាសម្ព័ន្ធទឹកក្នុងទីក្រុង រួមទាំងអាងស្តុកទឹកថ្មី និងម៉ាស៊ីនបូមទឹកមុនពេលការប្រកួតក្នុងខែនេះ។
France 24 បានរាយការណ៍ កាលពីថ្ងៃពុធថា ទោះបីជាយ៉ាងណាក៏ដោយ ទោះជាមានការខិតខំប្រឹងប្រែង យ៉ាងអស់ពីសមត្ថភាពក៏ដោយ ការធ្វើតេស្តចុងក្រោយដែលធ្វើឡើងដោយអង្គការសប្បុរសធម៌ទឹក Surfrider បង្ហាញថា កម្រិតនៃ E. coli និងបាក់តេរី Cnterococci ក្នុងទន្លេ Seine គឺខ្ពស់ជាងការអនុញ្ញាត ដោយសហព័ន្ធកីឡា និងស្តង់ដារងូត ទឹកអឺរ៉ុប ដើម្បីបំបាត់កង្វល់ ប្រធានាធិបតីបារាំង Emmanuel Macron និងអភិបាលក្រុងប៉ារីស Anne Hidalgo បានសន្យាថានឹងហែលទឹក នៅទន្លេមុនព្រឹត្តិការណ៍ការប្រកួតកីឡាអូឡាំពិក៕
ដោយ៖លី ភីលីព
