សេអ៊ូល៖ កូរ៉េខាងត្បូងបានឲ្យដឹងថា ខ្លួនបានបន្តសមយុទ្ធបាញ់គ្រាប់ពិត នៅជិតព្រំដែន ជាមួយកូរ៉េខាងជើង ជាលើកដំបូងក្នុងរយៈពេល ៦ឆ្នាំបន្ទាប់ពីការផ្អាកថ្មីៗ នេះនៃកិច្ចព្រមព្រៀង យោធាទ្វេភាគី ដែលបានចុះហត្ថលេខាក្នុង ឆ្នាំ២០១៨ ដើម្បីកាត់បន្ថយភាពតានតឹង។
យោធាកូរ៉េខាងត្បូងបានឲ្យដឹងថា សមយុទ្ធកម្លាំងអាវុធ បានធ្វើឡើងនៅជួរកាំភ្លើងធំ ដែលស្ថិតនៅចម្ងាយប្រាំគីឡូម៉ែត្រ ពីខ្សែព្រំដែនយោធា ដោយផ្តោតលើការពង្រឹងសមត្ថភាព ឆ្លើយតបរបស់ខ្លួនក្នុងករណីមានការបង្កហេតុរបស់សត្រូវ។
ចំណាត់ការនេះបានធ្វើឡើងបន្ទាប់ពីកូរ៉េខាងត្បូងបានផ្អាក “កិច្ចព្រមព្រៀងយោធាថ្ងៃទី១៩ ខែកញ្ញា” បន្ទាប់ពីកូរ៉េខាងជើងបានបន្តបាញ់បង្ហោះបាឡុងជាច្រើន ដែលផ្ទុកដោយកាកសំណល់ឆ្លងកាត់ព្រំដែននៅចុងខែឧសភា។
កិច្ចព្រមព្រៀងដែលសម្រេចបានក្នុងឆ្នាំ២០១៨ ដោយប្រធានាធិបតីកូរ៉េខាងត្បូង លោក មូន ជេអ៊ីន និងមេដឹកនាំកូរ៉េខាងជើង លោក គីម ជុងអ៊ុន បានចែងថាប្រទេសទាំងពីរបញ្ឈប់រាល់ សកម្មភាពអរិភាព ប្រឆាំងនឹងគ្នាទៅវិញទៅមក។
កិច្ចព្រមព្រៀងនេះត្រូវបានផ្អាកមួយ ផ្នែកដោយទីក្រុងសេអ៊ូលកាលពីខែវិច្ឆិកាឆ្នាំមុន បន្ទាប់ពីទីក្រុងព្យុងយ៉ាង បានបាញ់បង្ហោះផ្កាយរណបចារកម្មយោធា ។ ជាការឆ្លើយតប កូរ៉េខាងជើងបានឲ្យដឹងថា ខ្លួននឹងស្ដារឡើងវិញ នូវរាល់វិធានការយោធា ដែលត្រូវបានបញ្ឈប់ បន្ទាប់ពីកិច្ចព្រមព្រៀងនេះ។
យោធាកូរ៉េខាងត្បូងកាលពីថ្ងៃពុធសប្តាហ៍ មុនបានបន្តធ្វើសមយុទ្ធបាញ់គ្រាប់ពិតនៅលើកោះ នៅជិតខ្សែបន្ទាត់ព្រំដែន ភាគខាងជើង ដែលជាព្រំដែនដែនសមុទ្រពិតប្រាកដ របស់ប្រទេសទាំងពីរជាលើកដំបូងក្នុងរយៈពេលប្រហែល ៧ឆ្នាំ៕
ប្រែសម្រួល ឈូក បូរ៉ា
