មហាសេដ្ឋីមានបំផុត នៅអាស៊ីផ្តល់ អំណោយចិញ្ចៀនមាស ខ្សែក និងមូលប្បទានប័ត្រ គូស្វាមីភរិយាក្រីក្រជាង ៥០ គូ

ឥណ្ឌា៖នេះបើតាមការរាយការណ៍ ដោយ India Today បានប្រាប់ឲ្យដឹងថា ដើម្បីអបអរសាទរពិធីមង្គលការ កូនប្រុសពៅរបស់ លោក គឺលោក Anant Ambani មហាសេដ្ឋីឥណ្ឌា លោក Mukesh Ambani បានផ្តល់អំណោយ ជាចិញ្ចៀនមាស ខ្សែក និងមូលប្បទានប័ត្រដល់គូស្វាមីភរិយាក្រីក្រចំនួន ៥២ គូក្នុងពិធីមង្គលការដ៏ធំមួយនេះ។

នេះបើតាម India Today បានបន្តថា ពិធីមង្គលការ ដ៏ធំបានធ្វើឡើងនៅថ្ងៃទី ២ ខែកក្កដា នៅឧទ្យាន Reliance Corporate Park ក្នុងទីក្រុង Thane ដោយមានការចូលរួមពី សមាជិកគ្រួសាររបស់គូ ស្នេហ៍ប្រមាណ ៨០០ គូ ។ គូស្វាមីភរិយានីមួយៗទទួលបានគ្រឿងលម្អមាស រួមទាំងខ្សែកមួយ (ខ្សែកចងជាប់មានកូនក្រមុំ និងកូនកំលោះ) ចិញ្ចៀនអាពាហ៍ពិពាហ៍ និងចិញ្ចៀនពាក់ច្រមុះ។ ពួកគេក៏ត្រូវបានផ្តល់គ្រឿងលម្អប្រាក់ដូចជាចិញ្ចៀនម្រាមជើង និងកជើង។

លើសពីនេះ កូនក្រមុំម្នាក់ៗត្រូវបានប្រគល់ជូននូវមូលប្បទានប័ត្រជាទឹកប្រាក់ចំនួន ១.០១ លានរូពីឥណ្ឌា ស្មើនឹង១,២០០ ដុល្លារអាមេរិកជាថ្លៃបណ្ណាការ ជាកម្មសិទ្ធិផ្តាច់មុខរបស់ស្ត្រី ។ គូស្វាមីភរិយានេះក៏ ត្រូវបានផ្តល់គ្រឿងទេស និងរបស់របរប្រើប្រាស់ក្នុងផ្ទះគ្រប់គ្រាន់ រួមទាំងរបស់របរសំខាន់ៗចំនួន ៣៦ គ្រឿង ប្រដាប់ប្រើប្រាស់ដូចជា ចង្ក្រានហ្គាស ម៉ាស៊ីនលាយ និងកង្ហារ ព្រមទាំងពូក និងខ្នើយ។

នេះបើយោងតាមទស្សនាវដ្តី Forbes បានចេញផ្សាយ ជាផ្លូវការថា លោក Mukesh Ambani អាយុ ៦៧ ឆ្នាំ គឺជាបុរសមានបំផុតទី ៩ របស់ពិភពលោក ដែលមានទ្រព្យសម្បត្តិ ១១៦ ពាន់លានដុល្លារ ហើយលោកក៏ជាអ្នកមានបំផុតនៅអាស៊ី។

ក្រុមហ៊ុន Reliance Industries ជាក្រុមហ៊ុនដ៏ធំមួយដែលមានប្រាក់ចំណូលប្រចាំឆ្នាំជាង ១០០ ពាន់លានដុល្លារ ហើយលោកមានអាជីវកម្មរួមមាន គីមីឥន្ធនៈ ប្រេង និងឧស្ម័នរហូតដល់ទូរគមនាគមន៍ និងការលក់រាយ។

ពិធីមង្គលការរបស់កូនប្រុសពៅរបស់លោក គឺលោកAnant Ambani អាយុ ២៩ ឆ្នាំគ្រោងនឹងធ្វើឡើងនៅថ្ងៃទី ១២-១៤ ខែកក្កដា ឆ្នាំ២០២៤ ។ លោក Anant បានបញ្ចប់ថ្នាក់បរិញ្ញាបត្រពីសាកលវិទ្យាល័យ Brown និងគ្រប់គ្រងការពង្រីក ថាមពលកកើតឡើងវិញ និងបៃតងរបស់ក្រុមហ៊ុន។

នេះបើយោងតាម Vogue បាននិយាយថា កូនក្រមុំ នាង Radhika Merchant អាយុ ២៩ ឆ្នាំ ជាកូនស្រីរបស់មហាសេដ្ឋី ឱសថ Viren Merchant និងជានាយកទីផ្សាររបស់ក្រុមហ៊ុន Encore Healthcare ៕