សិង្ហបុរី ៖ ប៉ូលីសសិង្ហបុរីបានរាយការណ៍ថា ជនរងគ្រោះជនជាតិសិង្ហបុរីបានបាត់បង់ទឹកប្រាក់យ៉ាងហោចណាស់ ៣៦ លានដុល្លារអាមេរិកក្នុងរយៈពេលតិចជាង ២ ខែ ដោយការចាញ់បោកពួកឆបោកលើការវិនិយោគលើក្រុមជជែក និងប្រព័ន្ធផ្សព្វផ្សាយសង្គម នាពេលបច្ចុប្បន្ននេះ យោងតាមការចេញផ្សាយ ពីគេហទំព័រ VN Express ។
រាយការណ៍ពី The Straits Times បានប្រាប់ ឲ្យដឹងងា សរុបចំនួន ៨៩៧ ករណីនៃការបោកប្រាស់វិនិយោគ ដែលបានរាយការណ៍ចាប់តាំងពីខែកក្កដា។ ជនរងគ្រោះត្រូវបានបញ្ចូលទៅក្នុងក្រុមជជែកនៅលើវេទិកាដូចជា Telegram ហើយអ្នកបោកប្រាស់បានបន្លំខ្លួនជាមនុស្សល្បី ឬក្រុមហ៊ុនល្បីឈ្មោះ។
មនុស្សមិនស្គាល់អត្តសញ្ញាណក្នុងក្រុមជជែក បន្ទាប់មកនឹងអះអាងថា បានទទួលប្រាក់ចំណេញពីការវិនិយោគរបស់ពួកគេ និងចែករម្លែករូបថតអេក្រង់ នៃប្រាក់ចំណេញរបស់ពួកគេ ក្នុងការប៉ុនប៉ងធ្វើឲ្យជនរងគ្រោះជឿថា ការវិនិយោគនេះគឺពិត ប្រាកដ និងទទួលបានផលចំណេញ ។ បន្ទាប់ពីជនរងគ្រោះបានទាក់ទងអ្នកបោកប្រាស់ ពួកគេត្រូវបានផ្តល់ជូនផែនការ វិនិយោគមួយ ហើយត្រូវបានស្នើសុំឱ្យផ្តល់ព័ត៌មានលម្អិតផ្ទាល់ខ្លួនដូចជា លេខគណនីធនាគារ ឈ្មោះ និងលេខទូរស័ព្ទរបស់ពួកគេ ហើយផ្ទេរប្រាក់ទៅគណនីធនាគារ និង PayNow ដែលបានបញ្ជាក់។
យោងតាមប៉ូលីសបាននិយាយថា អ្នកបោកប្រាស់ក៏បានទាក់ទងជនរងគ្រោះតាមរយៈប្រព័ន្ធផ្សព្វផ្សាយសង្គមដូចជា Facebook WhatsApp ឬកម្មវិធីណាត់ជួបដូចជា Coffee Meets Bagel ជាដើម បន្ទាប់ពីបង្កើតទំនាក់ទំនង និងទទួលបានទំនុកចិត្តពីជនរងគ្រោះ អ្នកបោកប្រាស់នឹងនិយាយជាមួយពួកគេអំពីឱកាសវិនិយោគ។ អ្នកដែលចាប់អារម្មណ៍នឹងធ្វើតាមការណែនាំរបស់អ្នកបោកប្រាស់ដើម្បីផ្ទេរប្រាក់ទៅកាន់គណនីធនាគារ ឬ PayNow បានបញ្ជាក់។
ប៉ូលីសបានបន្តថា ជនរងគ្រោះត្រូវបាននាំ ឲ្យជឿថា ការវិនិយោគនេះគឺពិតប្រាកដ ពីព្រោះពួកគេនឹងទទួល បានប្រាក់ចំណេញ នៅពេលដំបូង ហើយគេហទំព័រ ឬកម្មវិធីវិនិយោគក្លែងក្លាយនឹងបង្ហាញ ប្រាក់ចំណេញកើនឡើងបណ្តាលឲ្យមានការវិនិយោគ ក្នុងបរិមាណកាន់តែច្រើនពីជនរងគ្រោះ។ ជនរងគ្រោះនឹងដឹងថា ពួកគេត្រូវបានបោកប្រាស់ លុះដឹងថា ពួកគេមិនអាចដកប្រាក់បាន បើទោះបីជាបានផ្ទេរប្រាក់យ៉ាងច្រើនក៏ដោយ ។
ដើម្បីជៀសវាងការក្លាយជាជនរងគ្រោះនៃការបោកប្រាស់ ប៉ូលីសបានជំរុញអ្នកប្រើប្រាស់ប្រព័ន្ធផ្សព្វផ្សាយសង្គមបន្ថែម ឬដំឡើងមុខងារសុវត្ថិភាព ដូចជាការមិនអនុញ្ញាតអ្នកប្រើប្រាស់មិនស្គាល់ពីការបញ្ចូលពួកវាទៅក្នុងក្រុមជជែក កំណត់កម្រិតប្រតិបត្តិការសម្រាប់ប្រតិបត្តិការធនាគារតាមអ៊ីនធឺណិត និងបើកការផ្ទៀងផ្ទាត់២កត្តា។ គួរកត់សម្គាល់ថា គ្មានក្រុមហ៊ុនវិនិយោគស្របច្បាប់ណាមួយនឹងបន្ថែមមនុស្សម្នាក់ចូលទៅក្នុងការជជែកជាក្រុមដើម្បីលក់ឱកាសវិនិយោគនោះទេ៕
