ប្រជាជន ម៉ាឡេស៊ី ខាតបង់ទឹកប្រាក់ជាង ១២ ពាន់លានដុល្លារ ចំពោះការបោកប្រាស់ក្នុងមួយឆ្នាំ

ម៉ាឡេស៊ី ៖ យោងតាមក្រុមហ៊ុន បច្ចេកវិទ្យាជឿទុកចិត្ត Gogolook បានឲ្យដឹងថា ប្រជាជនម៉ាឡេស៊ី បានខាតបង់ទឹកប្រាក់ ប្រមាណ ១២.៨ ពាន់លានដុល្លារអាមេរិក ចំពោះការបោកប្រាស់កាលពីឆ្នាំមុន ដែលតំណាងឲ្យ ៣ ភាគរយ នៃផលិតផលក្នុងស្រុកសរុបរបស់ប្រទេស យោងតាមការចេញផ្សាយពីគេហទំព័រ VN Express ។

របាយការណ៍ស្ថានភាពនៃការបោកប្រាស់ឆ្នាំ ២០២៤ ធ្វើឡើងដោយសម្ព័ន្ធប្រឆាំងការបោកប្រាស់សកល (GASA) ក្នុងការសម្របសម្រួល ជាមួយ Whoscall និង ScamAdviser បានរកឃើញថា ៧៤ ភាគរយនៃអ្នកឆ្លើយ តបបានជួបប្រទះការបោកប្រាស់យ៉ាង ហោចណាស់ម្តងក្នុងមួយខែ ហើយ ៣២ភាគរយនៃពួកគេ បានជួបប្រទះ ការបាត់បង់ប្រាក់។

របាយការណ៍នេះផ្អែកលើការស្ទង់មតិលើជនជាតិម៉ាឡេស៊ីចំនួន ១,២០២ នាក់ បាននិយាយថា មានតែជនរងគ្រោះ ២ភាគរយប៉ុណ្ណោះដែលអាចទទួលបានមូលនិធិរបស់ពួកគេពេញលេញបើប្រៀបធៀបទៅនឹង ៨ភាគរយនៅឆ្នាំមុន។ ទោះជាយ៉ាងណាក៏ដោយ ចំនួនជនរងគ្រោះនាពេលបច្ចុប្បន្នអាចកើនឡើងកាន់តែច្រើន ដោយសារតែ ៧០ភាគរយនៃពួកគេមិនបានរាយការណ៍ករណីរបស់ពួកគេទៅអាជ្ញាធរគឺធ្លាក់ចុះ ៥ភាគរយបើប្រៀបធៀបទៅនឹងឆ្នាំមុន។

របាយការណ៍នេះបានបង្ហាញពីការកើនឡើងនៃការបោកប្រាស់ដែលដំណើរការដោយបញ្ញាសិប្បនិមិត្ត (AI) កំពុងមានបញ្ហាជាពិសេស ដោយសារតែ ២៥ភាគរយនៃប្រជាជនម៉ាឡេស៊ីបានបង្ហាញពីភាពមិនប្រាកដប្រជាអំពីថា តើ AI ពាក់ព័ន្ធនឹងការបោកប្រាស់ដែលពួកគេជួបប្រទះឬអត់។

ប្រធានផ្នែកប្រតិបត្តិការ Gogolook លោក Manwoo Joo បាននិយាយថា របាយការណ៍នេះ បានសង្កត់ធ្ងន់លើសារសំខាន់ នៃការទប់ស្កាត់ការក្លែងបន្លំ យ៉ាងសកម្មនៅក្នុងទិដ្ឋភាពឌីជីថលនាពេលបច្ចុប្បន្ននេះ ៕