បាងកក ៖ ប្រទេសចិនបានប្រកាស កាលពីថ្ងៃអង្គារថា ខ្លួនកំពុងហាមឃាត់ការនាំ ចេញទៅកាន់អាមេរិក នូវសារធាតុហ្គាលីយ៉ូម អាល្លឺម៉ង់ អង់ទីម៉ូនី និងសម្ភារៈបច្ចេកវិទ្យា ខ្ពស់សំខាន់ៗ ផ្សេងទៀត ជាមួយនឹងកម្មវិធី យោធាមាន សក្តានុពល ជាគោលការណ៍ទូទៅ ដោយបានច្រានចោលដែន កំណត់របស់អាមេរិកលើការ នាំចេញដែលទាក់ទង នឹងបន្ទះឈីប យោងតាមការចេញផ្សាយពីគេហទំព័រ Japan Today ។
ក្រសួងពាណិជ្ជកម្មចិនបានប្រកាសពីការផ្លាស់ប្តូរនេះ បន្ទាប់ពីទីក្រុងវ៉ាស៊ីនតោនបានពង្រីកបញ្ជីឈ្មោះក្រុមហ៊ុនចិនរបស់ខ្លួន ស្ថិតនៅក្រោម ការគ្រប់គ្រងលើការ នាំចេញលើឧបករណ៍ ផលិតបន្ទះឈីបកុំព្យូទ័រ កម្មវិធី និងបន្ទះឈីប អង្គចងចាំ ល្បឿនលឿន ហើយបន្ទះឈីបបែបនេះ គឺត្រូវការ សម្រាប់កម្មវិធីកម្រិតខ្ពស់។
ការដាក់កម្រិតលើការរឹត បន្តឹងពាណិជ្ជកម្មនេះ កើតឡើងនៅពេលប្រធានាធិបតីជាប់ឆ្នោតលោក Donald Trump បាននឹងកំពុងគម្រាមដំឡើង ពន្ធយ៉ាងខ្លាំងលើការនាំចូលពីប្រទេសចិន និងប្រទេសដទៃទៀត ដែលអាចធ្វើឲ្យមានភាពតាន តឹងកាន់តែខ្លាំងឡើងជុំវិញ ពាណិជ្ជកម្ម និងបច្ចេកវិទ្យា។
ក្រសួងការបរទេសចិន ក៏បានចេញសេចក្តីស្តីបន្ទោសយ៉ាងចាស់ដៃ។ លោក Lin Jian អ្នកនាំពាក្យក្រសួង ការបរទេសចិន បាននិយាយក្នុងសន្និសីទសារព័ត៌មាន មួយកាលពីថ្ងៃអង្គារថា ប្រទេសចិនបានធ្វើការតវ៉ា យ៉ាងម៉ឺងម៉ាត់ជាមួយអាមេរិក សម្រាប់ការអាប់ដេត របស់ខ្លួននៃវិធានការ ត្រួតពិនិត្យការនាំចេញបន្ទះឈីប ការដាក់ទណ្ឌកម្មប្រឆាំងនឹងក្រុមហ៊ុនចិន និងការគាបសង្កត់ ដោយព្យាបាទចំពោះវឌ្ឍនភាព បច្ចេកវិទ្យារបស់ប្រទេសចិន។
លោក Lin បានបញ្ជាក់ថា ខ្ញុំចង់បញ្ជាក់ជាថ្មីថា ប្រទេសចិនប្រឆាំង យ៉ាងម៉ឺងម៉ាត់ចំពោះអាមេរិក ដែលលាតសន្ធឹង លើគោលគំនិត នៃសន្តិសុខជាតិ ការរំលោភលើវិធានការត្រួតពិនិត្យការនាំចេញ និងការដាក់ទណ្ឌកម្ម ឯកតោភាគីខុសច្បាប់ និងយុត្តាធិការអាវុធវែង ប្រឆាំងនឹងក្រុមហ៊ុនចិន ។
ប្រទេសចិនបាននិយាយ នៅខែកក្កដា ឆ្នាំ ២០២៣ ថា វានឹងតម្រូវ ឲ្យអ្នកនាំចេញ ស្នើសុំអាជ្ញាប័ណ្ណ ដើម្បីផ្ញើទៅអាមេរិក នូវសម្ភារៈសំខាន់ៗជាយុទ្ធសាស្ត្រដូចជាហ្គាលីយ៉ូម និងហ្គេម៉ាញ៉ូម។ កាលពីខែសីហា ក្រសួងពាណិជ្ជកម្មចិនបាននិយាយថា ខ្លួននឹងដាក់កម្រិតលើការនាំចេញសារធាតុអង់ទីម៉ូនី ប្រើប្រាស់ក្នុងផលិតផលជាច្រើន ចាប់ពីអាគុយរហូតដល់អាវុធ ហើយដាក់ការត្រួតពិនិត្យយ៉ាងតឹងរ៉ឹង លើការនាំចេញក្រាហ្វិច ។
នេះបើយោងតាមរបាយការណ៍របស់គណៈកម្មការពាណិជ្ជកម្មអន្តរជាតិអាមេរិកឆ្នាំ ២០២១ បាននិយាយថា រ៉ែបែបនេះត្រូវបានចាត់ទុកថា សំខាន់សម្រាប់សន្តិសុខជាតិ។ ប្រទេសចិនគឺជាប្រទេសផលិតសារធាតុអង់ទីម៉ូនី ដ៏សំខាន់ ដែលត្រូវបានប្រើក្នុងការការពារអណ្តាតភ្លើង អាគុយ វ៉ែនតាការពារពេលយប់ និងការផលិតអាវុធនុយក្លេអ៊ែរ៕
