កូរ៉េខាងត្បូង ៖ យោងតាមការចេញផ្សាយពីគេហទំព័រ VN Express បានប្រាប់ឲ្យដឹងថា អ្នកទេសចរជនជាតិ វៀតណាមចំនួន ៣៨ នាក់បានបាត់ខ្លួននៅពេលធ្វើដំណើរនៅកោះ Jeju ប្រទេសកូរ៉េខាងត្បូង ដូច្នេះប្រទេសនេះអាចរឹត បន្តឹងនីតិវិធីទិដ្ឋាការ ដែលប៉ះពាល់ដល់ផែនការធ្វើដំណើរ របស់អ្នកទេសចរទូទាំង។
អ្នកនាង Minh Nghi នៃទីក្រុងហូជីមិញគ្រោង នឹងស្នើសុំទិដ្ឋាការកូរ៉េ សម្រាប់ក្រុមគ្រួសាររបស់នាង ដែលមានកូន៤នាក់ ដើម្បីធ្វើដំណើរ ក្នុងឱកាសបុណ្យចូលឆ្នាំថ្មី (Tet)។ សមាជិកទាំងអស់នៃគ្រួសារ របស់នាងមានលិខិតឆ្លងដែនទទេ ចាប់តាំងពីគ្មាននរណាម្នាក់ ធ្លាប់ធ្វើដំណើរទៅក្រៅប្រទេស។
ឥឡូវនេះ បន្ទាប់ពីមានឧប្បត្តិហេតុអ្នកទេសចរបាត់ខ្លួន នាងព្រួយបារម្ភថា ពួកគេប្រហែលជាមិនអាចទទួលបានទិដ្ឋាការកូរ៉េ ហើយពួកគេមិនទាន់បានទិញសំបុត្រយន្តហោះនៅឡើយ។
នេះបើយោងតាមកាសែត Korea Times បាននិយាយថា អាជ្ញាធរទេសចរណ៍ Jeju បានបញ្ជាក់កាលពីថ្ងៃអង្គារថា ភ្ញៀវទេសចរវៀតណាម ៣៨ នាក់ក្នុងចំណោម ៩០នាក់បានមកដល់តាមជើងហោះហើរពី Nha Trang កាលពីថ្ងៃទី ១៤ ខែវិច្ឆិកាបានបាត់ខ្លួនក្នុងអំឡុងពេលជើងចុងក្រោយនៃការធ្វើដំណើររបស់ពួកគេមុននឹងចេញដំណើរនៅថ្ងៃទី ១៧ ខែវិច្ឆិកា។
ពួកគេបានមកដល់ក្រោមកម្មវិធីគ្មានទិដ្ឋាការដែលអនុញ្ញាតឲ្យពលរដ្ឋមកពី ៦៤ ប្រទេស ក្នុងនោះមានប្រទេសវៀតណាមអាចស្នាក់នៅលើកោះបានរហូតដល់៣០ ថ្ងៃដោយគ្មានទិដ្ឋាការ។ អាជ្ញាធរកំពុងពិនិត្យមើលវីដេអូ កាមេរ៉ាសុវត្ថិភាព ដើម្បីស្វែងរកក្រុមបាត់ខ្លួន ។ ភ្នាក់ងារទេសចរណ៍វៀតណាម មានការព្រួយបារម្ភថា កូរ៉េខាងត្បូងអាចនឹងរឹតបន្តឹង នីតិវិធីអនុម័តទិដ្ឋាការបន្ទាប់ពីឧប្បត្តិហេតុនេះ។
លោក Nguyen Cong Hoan អគ្គនាយកក្រុមហ៊ុន Flamingo Redtours នៅទីក្រុងហាណូយ បាននិយាយថា មនុស្សមួយចំនួនបានធ្វើដំណើរ ទៅកាន់កញ្ចប់ដំណើរកម្សាន្ត ប៉ុន្តែបន្ទាប់មកបានស្នាក់នៅប្រទេសកូរ៉េខាងត្បូងវិញ ដើម្បីធ្វើការដោយខុសច្បាប់ ដែលដាក់សម្ពាធដល់ភ្នាក់ងារទេសចរណ៍ ឲ្យពិនិត្យមើលព័ត៌មានផ្ទាល់ខ្លួន របស់អ្នកដំណើរឲ្យបានហ្មត់ចត់ និងពេលខ្លះធ្វើឲ្យមានអារម្មណ៍មិនស្រួល។
លោក Pham Anh Vu អគ្គនាយករង នៃក្រុមហ៊ុន Viet Media Tourism បាននិយាយថា កេរ្តិ៍ឈ្មោះ របស់ក្រុមហ៊ុនទេសចរណ៍ វៀតណាមមានហានិភ័យជាមួយនឹងដៃគូកូរ៉េ ដែលចោទសួរពីសមត្ថភាពគ្រប់គ្រង អតិថិជនប្រកបដោយប្រសិទ្ធភាព។ លោក Vu បានបន្តថា ទោះបីជាមិនមានការប្រកាស ជាផ្លូវការណាមួយត្រូវបានធ្វើឡើង ក៏ដោយ វាអាចទៅរួច កូរ៉េខាងត្បូងអាចកំណត់ឡើងវិញ នូវតម្រូវការទិដ្ឋាការសម្រាប់អ្នកទេសចរ វៀតណាមទៅកាន់ Jeju ។
លោកស្រី Luu Thi Thu នាយករងក្រុមហ៊ុន Hoang Viet Travel បាននិយាយថា ក្រុមហ៊ុនរបស់នាង កំពុងពង្រឹងសមត្ថភាពនៃនាយកដ្ឋានត្រួតពិនិត្យពាក្យសុំទិដ្ឋាការរបស់ខ្លួន ដើម្បីការពារសិទ្ធិរបស់ភ្ញៀវទេសចរស្របច្បាប់។ លោកស្រី Vu បានសង្កត់ធ្ងន់លើតម្រូវការសម្រាប់យន្តការច្បាស់លាស់ និងក្របខណ្ឌច្បាប់សម្រាប់ទីភ្នាក់ងារទេសចរណ៍ ដើម្បីសហការជាមួយអាជ្ញាធរដើម្បីធ្វើបច្ចុប្បន្នភាពព័ត៌មាន និងផ្ទៀងផ្ទាត់ប្រវត្តិការធ្វើដំណើររបស់អតិថិជន៕
