តូក្យូ ៖ ការប៉ាន់ប្រមាណ របស់រដ្ឋាភិបាល បានបង្ហាញកាលពីថ្ងៃពុធថា ចំនួនភ្ញៀវបរទេសទៅកាន់ប្រទេសជប៉ុន បានកើនឡើងដល់ ៣៣ លាននាក់ចាប់ពីខែមករា ដល់ ខែវិច្ឆិកា ដោយបានបង្កើតកំណត់ត្រាប្រចាំឆ្នាំថ្មី ដែលត្រូវបានជំរុញដោយការកើនឡើង នៃវិស័យទេសចរណ៍ និង ប្រាក់យ៉េនដែលធ្លាក់ចុះ យោងតាមការចេញផ្សាយ ពីគេហទំព័រJapan Today ។
យោងតាមអង្គការ ទេសចរណ៍ជាតិជប៉ុន បានឲ្យដឹងថា ចំនួនសរុបមានចំនួន ៣៣,៣៧៩,៩០០ លើសពីកម្រិត ខ្ពស់ពេញមួយឆ្នាំមុនដែលមាន ៣១.៨៨ លានដែលបានកំណត់ក្នុងឆ្នាំ ២០១៩ ។ ខែវិច្ឆិកាតែមួយ ភ្ញៀវបរទេសបានកើនឡើង ៣០.៦ ភាគរយពីមួយឆ្នាំទៅមួយឆ្នាំដល់ ៣.១៨ លាននាក់។ ក្នុងមួយខែនៅឆ្នាំនេះមានកំណើនយ៉ាងហោចណាស់ ៣០ ភាគរយ បើធៀបនឹងរយៈពេលដូចគ្នាកាលពីឆ្នាំមុន។
ជាមួយនឹងផ្លូវហោះហើររបស់ក្រុមហ៊ុន អាកាសចរណ៍ទៅកាន់ប្រទេសជប៉ុន បានងើបឡើងវិញដល់កម្រិតឆ្នាំ ២០១៩ ចំនួនអ្នកទស្សនាខែវិច្ឆិកាត្រូវបានជំរុញបន្ថែមទៀត ដោយតម្រូវការកើនឡើង ក្នុងរដូវស្លឹកឈើជ្រុះ។ តាមប្រទេស និងតំបន់ មនុស្ស ៧៤៩,៥០០ នាក់មកពីកូរ៉េខាងត្បូង បានទៅលេងប្រទេសជប៉ុនកាលពីខែមុន កើនឡើង ១៥.៣ ភាគរយធៀបនឹងឆ្នាំមុន ។
នេះបើយោងតាមទិន្នន័យបឋម របស់អង្គការបាននិយយាថា ភ្ញៀវទេសចរមក ពីប្រទេសចិន បានកើនឡើងទ្វេដងដល់ ៥៤៦,៣០០ ខណៈតៃវ៉ាន់ជាប់ចំណាត់ថ្នាក់លេខ ៣ មានភ្ញៀវទេសចរចំនួន ៤៨៨,៤០០ នាក់ កើនឡើង ២១.០ ភាគរយ បន្ទាប់មកដោយអាមេរិក មានចំនួន២៤៧,៥០០ នាក់ កើនឡើង ៣៤.០ ភាគរយ។
ភ្ញៀវទេសចរណ៍ ប្រចាំឆ្នាំមកពីទីផ្សារចំនួនប្រាំ ដូចជា កូរ៉េខាងត្បូង ហុងកុង ឥណ្ឌូនេស៊ី វៀតណាម និងបារាំង – នីមួយៗ បានបង្កើតកំណត់ត្រាខ្ពស់ថ្មី គិតត្រឹមខែវិច្ឆិកា ។ ការដោះស្រាយបញ្ហាទាក់ទង នឹងទេសចរណ៍ហួសហេតុ ដូចជាការ កកស្ទះចរាចរណ៍ និង ការរំខានដល់ការរស់នៅ របស់អ្នកស្រុកនឹងមានសារសំខាន់សម្រាប់រដ្ឋាភិបាល ក្នុងការសម្រេច បាននូវគោលដៅ ទាក់ទាញភ្ញៀវទេសចរបរទេសចំនួន ៦០ លាននាក់ជារៀងរាល់ឆ្នាំនៅឆ្នាំ ២០៣០៕
