វ៉ាស៊ីនតោន ៖ យោងតាមការចេញផ្សាយពីគេហទំព័រ VOA បានប្រាប់ឲ្យដឹងថា អ្នកជំនាញខាងសន្តិសុខតាមអ៊ីនធើណេត និងយុទ្ធនាការឥទ្ធិពលបរទេស តាមអ៊ីនធើណេតអាមេរិក អំពាវនាវឲ្យបណ្តាញ ផ្សព្វផ្សាយសង្គម Bluesky ដែលកំពុងមាន ប្រជាប្រិយភាពនាពេលថ្មីៗនេះ ធ្វើការទប់ទល់ឲ្យអស់ពីសមត្ថភាពរបស់ខ្លួន ដើម្បីការពារ សម្រាប់ការផ្សព្វផ្សាយព័ត៌មាន មិនពិតរបស់បរទេស ។
ក្នុងរយៈពេលមួយខែកន្លងមកនេះ បណ្តាញផ្សព្វផ្សាយសង្គម Bluesky ត្រូវបានគរឃើញថា មានការកើនឡើង ដ៏យ៉ាងខ្លាំងបំផុតមួយ នៃការចុះឈ្មោះអ្នកប្រើប្រាស់ថ្មីចាប់តាំងពីកម្មវិធី ត្រូវបានចេញផ្សាយ ជាសាធារណៈកាលខែកុម្ភៈ។ នាពេលបច្ចុប្បន្ននេះ មានអ្នកប្រើប្រាស់ជាង ២៥ លាននាក់កំពុងនៅលើវេទិកា ដែលជិតពាក់កណ្តាល នៃអ្នកបានចូលរួមបន្ទាប់ពីការបោះឆ្នោត ប្រធានាធិបតីអាមេរិកឆ្នាំ ២០២៤ ។
លោកស្រី Rose Wang នាយកប្រតិបត្តិរបស់ Bluesky បាននិយាយក្នុងបទសម្ភាសន៍ថ្មីៗនេះថា Bluesky មិនមានបំណងជំរុញមនោគមវិជ្ជា នយោបាយណាមួយឡើយ ។ លោកស្រីបានថ្លែងកាលពីដើមខែធ្នូថា យើងមិនមានទស្សនៈនយោបាយ ដែលយើងកំពុងព្យាយាម ផ្សព្វផ្សាយនោះឡើយ។
លោកស្រីបានបន្តថា អ្នកប្រើប្រាស់ ជាច្រើនដែលបានចូលរួមជាមួយ Bluesky បានលើកឡើងពី បទពិសោធន៍របស់ អ្នកប្រើប្រាស់ថា ជាហេតុផលមួយ សម្រាប់ការផ្លាស់ទីលំនៅពីប្រព័ន្ធផ្សព្វផ្សាយសង្គម X។ ពួកគេបានចូលរួមវេទិកានេះ បន្ទាប់ពីថ្ងៃបោះឆ្នោត ដោយសារតែពួកគេជាអ្នករិះគន់លោកElon Musk និងប្រធានាធិបតីជាប់ឆ្នោត Donald Trump ។
លោក Joe Bodnar តាមដានប្រតិបត្តិការឥទ្ធិពលបរទេស សម្រាប់វិទ្យាស្ថានសម្រាប់ កិច្ចសន្ទនាយុទ្ធសាស្ត្រ បានប្រាប់ VOA ភាសាចិនកុកងឺថា ការឃោសនារបស់រុស្ស៊ីជារឿយៗ អំពាវនាវ ដល់ការប្រឆាំងការបង្កើតឡើង ដោយអាមេរិក លើប្រធានបទដ៏ចម្រូងចម្រាស ដូចជាតំបន់ហ្គាហ្សា អំពើហិង្សាដោយកាំភ្លើង និងការគ្រប់គ្រងពិភពលោករបស់អាមេរិក៕
