ហ្វីលីពីន ៖យោងតាមការ ចេញផ្សាយពីគេហទំព័រ VN Express បានប្រាប់ឲ្យដឹងថា កម្មករបរទេសប្រហែល ២៤,០០០ នាក់បានចាកចេញ ពីប្រទេសហ្វីលីពីន បន្ទាប់ពីកាស៊ីណូអនឡាញ ដែលភាគច្រើនផ្គត់ផ្គង់ ដល់អតិថិជន នៅក្រៅប្រទេសបាន បិទទ្វារក្នុងការផ្លាស់ប្តូរ គោលនយោបាយ របស់រដ្ឋាភិបាល ។
យោងតាមរបាយការណ៍របស់ Nikkei Asia បានឲ្យដឹងថា ការិយាល័យអន្តោប្រវេសន៍ ដែលផ្តល់ទិន្នន័យ បានប្រាប់បុគ្គលិកបរទេស ដែលរងផលប៉ះពាល់ដោយការហាមប្រាម ឲ្យចាកចេញពីប្រទេស ។ រដ្ឋាភិបាលហ្វីលីពីនកាលពីខែកក្កដា បានបញ្ជាឲ្យប្រតិបត្តិករកាស៊ីណូ អនឡាញទាំងអស់បិទ នៅចុងឆ្នាំ ចំពេលមានការរិះគន់ថា ឧស្សាហកម្មនេះមាន ទំនាក់ទំនងទៅ នឹងសកម្មភាពឧក្រិដ្ឋកម្ម។
មជ្ឈមណ្ឌលដ៏ធំបំផុតរបស់ប្រទេសសម្រាប់ប្រតិបត្តិករលេងល្បែងអនឡាញ កោះខូវ ក្នុងខេត្ត Cavite ត្រូវបានបិទកាលពីថ្ងៃទី ១៧ ខែធ្នូ ។ នៅកម្រិតកំពូល របស់វា រោងចក្រទំហំ ៣៣ ហិកតា បានផ្តល់ការងារដល់ កម្មកររហូតដល់ ៣០,០០០ នាក់។
ប្រតិបត្តិករហ្គេមអនឡាញត្រូវបាន ផ្តល់អាជ្ញាប័ណ្ណក្នុងឆ្នាំ ២០១៦ ក្នុងអំឡុងពេល នៃការគ្រប់គ្រងរបស់ប្រធានាធិបតី Rodrigo Duterte នាពេលនោះ ។ កាស៊ីណូទាំងនេះ ដែលផ្តោតជាចម្បងទៅ លើអតិថិជនជនជាតិចិន ក៏បានទាក់ទាញកម្មករចិន មួយចំនួនធំមកកាន់ប្រទេស នេះផងដែរ ។
ទីភ្នាក់ងារព័ត៌មាន Reuters បានរាយការណ៍ថា នៅកម្រិតកំពូលរបស់ពួកគេ មានប្រតិបត្តិករចំនួន ៣០០ ប៉ុន្តែជំងឺរាតត្បាត និងច្បាប់ពន្ធកាន់តែតឹងរ៉ឹងបានបង្ខំមនុស្សជាច្រើនឲ្យផ្លាស់ទីលំនៅ ឬទៅក្រោមដី ។ គិតត្រឹមខែកក្កដា មានតែក្រុមហ៊ុនចំនួន ៤២ ប៉ុណ្ណោះដែលដំណើរការដោយមានអាជ្ញាប័ណ្ណ ផ្តល់ការងារដោយផ្ទាល់ និងដោយប្រយោលប្រហែល ៦៣,០០០ ពលករហ្វីលីពីន និងបរទេស។
យោងតាមទិន្នន័យ របស់រដ្ឋាភិបាល បានឲ្យដឹងថា ប្រាក់ចំណូលរបស់ ឧស្សាហកម្មល្បែងស៊ីសង របស់ប្រទេសហ្វីលីពីន ត្រូវបានគេព្យាករណ៍ថានឹងឈានដល់កំណត់ត្រាច្រើនជាង ៣៥០ ពាន់លានប៉េសូ ស្មើនឹង ៦.០៣ ពាន់លានដុល្លារ នៅឆ្នាំនេះ ដែលជំរុញដោយកំណើន ក្នុងវិស័យហ្គេមអេឡិចត្រូនិក ៕
