កូរ៉េខាងត្បូង៖ទីភ្នាក់ងារអាកាសធាតុរបស់រដ្ឋបាននិយាយកាលពីថ្ងៃព្រហស្បតិ៍ដោយលើកឡើងពីការកើនឡើងនៃសីតុណ្ហភាពផ្ទៃសមុទ្រថា ឆ្នាំ ២០២៤ គឺជាឆ្នាំដែលក្តៅបំផុតក្នុងប្រទេសកូរ៉េខាងត្បូងចាប់តាំងពីការរក្សាកំណត់ត្រាទំនើបបានចាប់ផ្តើមកាលពី ១១៣ ឆ្នាំមុន នេះយោងតាមការចេញផ្សាយពីគេហទំព័រ Korea Times ។
រដ្ឋបាលឧតុនិយមកូរ៉េ (KMA) បាននិយាយថា សីតុណ្ហភាពប្រចាំឆ្នាំជាមធ្យមកាលពីឆ្នាំមុនគឺ ១៤.៥ អង្សាសេ ដែលខ្ពស់ជាង ២ អង្សារសេ ធៀបនឹងមធ្យមភាគ ៣០ ឆ្នាំមុនដែលមាន ១២.៥ អង្សារសេ។ តួលេខនេះគឺខ្ពស់បំផុតក្នុងរយៈពេល ៥២ ឆ្នាំចាប់តាំងពីការសង្កេតអាកាសធាតុទូទាំងប្រទេសបានចាប់ផ្តើមនៅឆ្នាំ ១៩៧៣ ។ វាក៏ជាតួលេខខ្ពស់បំផុតមិនធ្លាប់មានចាប់តាំងពីការសង្កេតឧតុនិយមបានចាប់ផ្តើមនៅទីតាំងចំនួន ៦ នៅលើឧបទ្វីបកូរ៉េ រួមមានទីក្រុងសេអ៊ូល ប៊ូសាន ដេហ្គូ និងហ្គាំងនឿង កាលពី ១១៣ ឆ្នាំមុនក្នុងឆ្នាំ ១៩១១ ។
KMA បានកត់សម្គាល់ថា កំណត់ត្រាមុនសម្រាប់សីតុណ្ហភាពប្រចាំឆ្នាំក្តៅបំផុតត្រូវបានកំណត់ត្រឹមតែមួយឆ្នាំមុនក្នុងឆ្នាំ ២០២៣ នៅ ១៣.៧ ដឺក្រេ ។ KMA បាននិយាយថា សីតុណ្ហភាពប្រចាំខែជាមធ្យមសម្រាប់រយៈពេល ១២ ខែកាលពីឆ្នាំមុន លើសពីសីតុណ្ហភាពជាមធ្យម ៣០ ឆ្នាំ។ ជាពិសេសសីតុណ្ហភាពប្រចាំខែជាមធ្យមក្នុងខែកញ្ញា គឺ ២៤.៧ អង្សារសេ ៤.២ អង្សារសេខ្ពស់ជាងមធ្យមភាគ ៣០ ឆ្នាំ។
ទីភ្នាក់ងារនេះបានលើកឡើងពីការកើនឡើងនៃសីតុណ្ហភាពលើផ្ទៃសមុទ្រថា ជាមូលហេតុចម្បងសម្រាប់សីតុណ្ហភាពប្រចាំឆ្នាំដែលបំបែកកំណត់ត្រាកាលពីឆ្នាំមុន។
KMA បានបញ្ជាក់ថា កាលពីឆ្នាំមុន សីតុណ្ហភាពជាមធ្យមប្រចាំឆ្នាំនៃផ្ទៃសមុទ្រក្នុងទឹកនៅជុំវិញឧបទ្វីប គឺ ១៨.៦ អង្សារសេ ដែលខ្ពស់ជាង ១.៣ អង្សារសេខ្ពស់ជាងមធ្យមភាគ ១០ ឆ្នាំ ១៧.៣ អង្សារសេ។ វាបានបន្ថែមថា ខែកញ្ញា សីតុណ្ហភាពជាមធ្យមលើផ្ទៃសមុទ្របានកើនឡើងដល់ ២៧.៤ អង្សារសេ និង ៣.២ អង្សារសេខ្ពស់ជាងមធ្យមភាគ ១០ ឆ្នាំដែលមាន ២៤.២ អង្សារសេ៕
