ជនជាតិកូរ៉េខាងត្បូង ២ នាក់ ត្រូវបានចាប់ខ្លួន ក្នុងប្រទេសថៃ ពីបទបើកទីតាំងល្បែងអនឡាញ

ថៃ ៖ អាជ្ញាធរថៃបាននិយាយថា ជនជាតិកូរ៉េខាងត្បូង ២ នាក់ ត្រូវបានចាប់ខ្លួនក្នុងប្រទេសថៃ កាលពីថ្ងៃពុធដោយសង្ស័យថា ពួកគេបានបើកគេហទំព័រ លេងល្បែង តាមប្រព័ន្ធអ៊ីនធើណេត ខុសច្បាប់ យោងតាមការចេញផ្សាយពីគេហទំព័រ VN Express ។

នេះបើយោងតាមប្រធានការិយាល័យ អន្តោប្រវេសន៍លោក Panumart Boonyalak ត្រូវបានដកស្រង់ដោយកាសែតBangkok Post បាននិយាយថា ការចាប់ខ្លួននេះ បានធ្វើឡើងនៅគេហដ្ឋានមួយ ក្នុងស្រុក Muang ខេត្ត Udon Thani បន្ទាប់ពីមានការផ្សព្វផ្សាយអំពីសកម្មភាពខុសច្បាប់នៅទីតាំងនេះ ។ ប៉ូលិសថៃបានប្រតិបត្តិការ ឆែកឆេរទ្រព្យសម្បត្តិ ក្នុងអំឡុងពេលនោះពួកគេបានរឹបអូសកុំព្យូទ័រ និងឧបករណ៍ផ្សេងទៀត ដែលពាក់ព័ន្ធនឹងប្រតិបត្តិការ ល្បែងស៊ីសង។

សារព័ត៌មានថៃបានរាយការណ៍ថា អាជ្ញាធរចោទប្រកាន់ថា ជនសង្ស័យកំពុងដំណើរការគេហទំព័រដូចជា Vinus Gaming Services និង 100d-1 ជាវេទិកាលេងល្បែងអនឡាញរបស់កូរ៉េខាងត្បូងដែលដំណើរការជាអន្តរជាតិ។ គេហទំព័រនេះត្រូវបានគេរាយការណ៍ថា បង្កើតបានប្រហែល៤ ពាន់លានវ៉ុន (២.៧៩ លានដុល្លារអាមេរិក) ក្នុងប្រាក់ចំណូលប្រចាំខែ។

ជនសង្ស័យបានអះអាងថា ពួកគេបានធ្វើការជាបុគ្គលិកផ្នែកព័ត៌មានវិទ្យា សម្រាប់កន្លែងលេងល្បែងស៊ីសង ដោយជួយអ្នកលេងល្បែង ក្នុងប្រទេសកូរ៉េខាងត្បូង ថៃ និងបណ្តាប្រទេសផ្សេងទៀត ដែលមានប្រតិបត្តិការ ហិរញ្ញវត្ថុ។

មេបញ្ជាការស្តីទី Warissiri Leelasiri នៃកងពលធំអន្តោប្រវេសន៍ទី៤ បាននិយាយថា បុគ្គលទាំងនោះបាន ចូលប្រទេសថៃក្នុងនាមជាអ្នកទេសចរ។ មន្ត្រីបាននិយាយថា ជនសង្ស័យឥឡូវប្រឈម នឹងការចោទប្រកាន់ពីបទធ្វើការដោយគ្មានការ អនុញ្ញាតត្រឹមត្រូវដូចជនបរទេស៕