តូក្យូ ៖ យោងតាមការ ចេញផ្សាយពីគេហទំព័រ Japan Today បានប្រាប់ឲ្យដឹងថា ចំនួនកំណើតនៅប្រទេសជប៉ុននាឆ្នាំ ២០២៤ ទំនងជាធ្លាក់ចុះក្រោម ៧០០,០០០នាក់ ជាលើកដំបូង បន្ទាប់ពីទិន្នន័យ របស់រដ្ឋាភិបាល បានបង្ហាញកាលពីថ្ងៃសុក្រថា តួលេខសម្រាប់រយៈពេល ១១ ខែដំបូង នៃឆ្នាំនេះបានធ្លាក់ចុះ ៥.១ ភាគរយមកនៅត្រឹម ៦៦១,៥៧៧ ។
តួលេខនេះគូស បញ្ជាក់អំពីនិន្នាការ ក្នុងប្រទេសជប៉ុន ដោយមនុស្សកាន់តែច្រើនជ្រើសរើសមិនរៀបការ ឬពន្យារពេលអាពាហ៍ពិពាហ៍ ដែលមួយផ្នែក ដោយសារ តែការព្រួយ បារម្ភអំពីការចិញ្ចឹមកូន ចំពេលតម្លៃរស់នៅកើនឡើង ។ ឥទ្ធិពលដ៏យូរអង្វែងនៃជំងឺរាតត្បាត COVID-19 ក៏ត្រូវបានគេគិតថា មានផលប៉ះពាល់ផងដែរ ។
ទិន្នន័យបឋមដែលចេញផ្សាយដោយក្រសួង សុខាភិបាល ការងារ និងសុខុមាលភាព សម្រាប់ការកើតពីខែមករាដល់ខែវិច្ឆិកា រួមមានជនបរទេស។ ទោះជាយ៉ាងណាក៏ដោយ តួលេខពេញមួយឆ្នាំ ត្រូវបានគេរំពឹងថានឹងមិនរាប់បញ្ចូលទារក ដែលកើតពីជនបរទេសឡើយ។ ចំនួនកំណើតក្នុងប្រទេសនេះ មាននិន្នាការធ្លាក់ចុះ ដោយធ្លាក់ចុះមកក្រោម ៩០០,០០០នាក់កាលឆ្នាំ ២០១៩ និងក្រោម ៨០០,០០០នាក់ក្នុងឆ្នាំ ២០២២។
តួលេខនេះបានធ្លាក់ចុះនៅឆ្នាំ ២០២៣ មកនៅត្រឹម ៧២៧,២៧៧ ដែលជាកំណត់ត្រា ទាបចាប់តាំងពីទិន្នន័យដែលអាច ប្រៀបធៀបបានមានកាលឆ្នាំ ១៨៩៩។ ការធ្លាក់ចុះ ៣.៨ ភាគរយពីឆ្នាំ ២០២៣នឹងនាំមកនូវតួលេខនេះ នៅក្រោម ៧០០,០០០នាក់ ។ ការធ្លាក់ចុះរវាងខែមករាដល់ខែសីហាឆ្នាំ ២០២៤ ធៀបនឹងឆ្នាំមុនគឺ ៥.៩ ភាគរយ ។
វិទ្យាស្ថានជាតិស្រាវជ្រាវ ប្រជាជន និងសន្តិសុខសង្គមបានប៉ាន់ ប្រមាណតួលេខ សម្រាប់ឆ្នាំ ២០២៤ ថា មានចំនួន ៧៥៥,០០០ ហើយបានព្យាករណ៍ថា ការសម្រាលកូន នឹងធ្លាក់ចុះក្រោម ៧០០,០០០នៅឆ្នាំ ២០៣៨ ។ ប្រទេសជប៉ុន ប្រឈមមុខនឹងកង្វះកម្លាំង ពលកម្មដែលគំរាមកំហែង ដល់និរន្តរភាព នៃប្រព័ន្ធសន្តិសុខសង្គម ដូចជាការថែទាំសុខភាព និងប្រាក់សោធន និវត្តន៍ជាដើម ។
រដ្ឋាភិបាលមានបំណង បង្កើន អត្រាកំណើតតាមរយៈវិធានការ ដូចជាការពង្រីកប្រាក់ឧបត្ថម្ភថែទាំកុមារ និងការផ្តល់អត្ថប្រយោជន៍ សម្រាប់ការឈប់ សម្រាកពីឪពុកម្តាយ ដោយចាត់ទុករយៈពេល រហូតដល់ដើមទសវត្សរ៍ឆ្នាំ ២០៣០ ជាឱកាសចុងក្រោយ ដើម្បីដោះស្រាយ វិបត្តិអត្រាកំណើត ៕
